Mensahe sang Unang Panguluhan, Oktubre 2010
Mga Bugay sang Templo
Ang templo nagahatag sang katuyuan sa aton kabuhi. Nagadala ini sang paghidaet sa aton kalag—indi ang paghidaet nga ginahatag sang tawo kundi ang paghidaet nga ginpromisa sang Anak sang Dios sang Sia nagsiling, “Ang paghidaet ginabilin ko sa inyo; ang akon paghidaet ginahatag ko sa inyo.”
Sa templo makabatyag kita nga malapit sa Ginuo
Nagapati ako nga wala sang iban pa nga duog sa kalibutan sa diin makabatyag ako nga mas malapit sa Ginuo sangsa sa isa sang Iya balaan nga mga templo. Sa pagpalip-ot sang isa ka binalaybay:
Ano kalayo ang langit?
Indi gid tuman kalayo.
Sa mga templo sang Dios,
Yara na kita dira mismo.
Ang Ginuo nagsiling:
“Dili kamo magtipon sa inyo kaugalingon sing mga bahandi sa duta, diin ang sipit kag ang tuktok nagapapas, kag diin ang mga makawat nagaguhab kag nagapangawat:
“Kundi magtipon kamo sa inyo kaugalingon sing mga bahandi sa langit, diin wala’y sipit kag tuktok nga nagapapas, kag diin ang mga makawat indi magguhab kag magpangawat:
“Kay kon diin ang inyo bahandi, didto man ang inyo tagipusuon.”1
Sa mga miyembro sang Ang Simbahan ni Jesucristo sang mga Santos sa Ulihing mga Adlaw, ang templo ang pinakasagrado nga duog sa kalibutan. Balay ini sang Ginuo, kag subong sang ginapahayag sang mga pulong sa gwa sang templo, ang templo “balaan sa Ginuo.”
Ang templo nagabayaw kag nagainspirar sa aton
Sa templo, ang bilidhon nga plano sang Dios ginatudlo. Sa templo mismo ginahimo ang wala’y katapusan nga mga kasugtanan. Ang templo nagabayaw sa aton, nagainspirar sa aton, nagatindog bilang kapawa agud makita sang tanan, kag nagagiya sa aton padulong sa selestyal nga himaya. Balay ini sang Dios. Ang tanan nga nagakalatabo sa sulod sang templo nagapabayaw kag nagainspirar.
Ang templo para sa mga pamilya, isa sang pinakadako nga bahandi nga may yara kita sa mortalidad. Ang Ginuo nangin tuman kaathag sa paghambal sa aton nga mga amay, nga ginadagmit nga may yara kita sang responsibilidad sa pagpalangga sang aton mga asawa sa bug-os naton nga tagipusuon kag sa pagsagod sa ila kag sa aton kabataan. Iya gindagmit nga ang pinakadako nga buluhaton nga mahimo naton nga mga ginikanan ginahikot sa aton mga puluy-an, kag ang aton mga puluy-an sarang mangin langit, ilabi na kon ang aton mga pag-asawahay nahugpong sa balay sang Dios.
Ang nagtaliwan na nga si Elder Matthew Cowley, nga sadto nangin isa ka miyembro sang Korum sang Napulo’g Duha ka Apostoles, sang una nagsaysay sang eksperiyensya sang isa ka lolo isa ka hapon sang Sabado nga samtang nagakaptanay kamot, gindala niya ang iya diutay nga apo nga babayi sa isa ka paglagaw-lagaw sa kaadlawan sini—indi sa zoo ukon sa mga sinehan kundi sa ugsaran sang isa ka templo. Nga may pahanugot sang manugbantay, ang duha nagpalapit sa dalagko nga mga ganhaan sang templo. Iya ginpanugyan sa iya apo nga ibutang ang kamot sini sa mabakod nga pader kag dayon sa dako nga ganhaan. Sing mapinalanggaon sia dayon nagsiling sa iya, “Dumduma nga sa sini nga adlaw gintandog mo ang templo. Sa pila ka adlaw magasulod ka dira.” Ang iya regalo sa diutay nga bata indi dulce ukon sorbetes kundi isa ka eksperiyensya nga mas labing importante kag wala’y katapusan—ang pag-apresyar sang balay sang Ginuo. Gintandog niya ang templo, kag ang templo nagtandog sa iya.
Ang templo nagadala sang paghidaet sa aton mga kalag
Sa aton pagtandog sang templo kag pagpalangga sang templo, ang aton mga kabuhi magaimpluwensya sang aton pagtuo. Sa aton pagkadto sa balaan nga balay, sa aton pagdumdom sang mga kasugtanan nga ginahimo naton didto, masarangan naton ang tagsa ka pagtilaw kag malampuwasan ang tagsa ka tentasyon. Ang templo nagahatag sang katuyuan sa aton kabuhi. Nagadala ini sang paghidaet sa aton mga kalag—indi ang paghidaet nga ginahatag sang tawo kundi ang paghidaet nga ginpromisa sang Anak sang Dios sang Sia nagsiling, “Ang paghidaet ginabilin ko sa inyo, ang akon paghidaet ginahatag ko sa inyo: indi subong sang paghatag sang kalibutan ang paghatag ko sa inyo. Dili malisang ang inyo mga tagipusuon ukon mahadlok.”2
May dako nga pagtuo sa tunga sang mga Santos sa Ulihing mga adlaw. Ang Ginuo nagahatag sa aton sang mga oportunidad agud lantawon kon sundon naton ang Iya mga kasuguan, kon sundon naton ang alagyan nga gin-usoy ni Jesus sang Nasaret, kon palanggaon naton ang Ginuo sa aton bug-os nga tagipusuon, puwersa, hunahuna, kag kusog, kag palanggaon ang aton isigkatawo subong sa aton mga kaugalingon.3
Nagapati ako sa hulubaton “Salig sa Ginuo sa bug-os mo nga tagipusuon; kag dili magsandig sa imo kaugalingon nga paghangop. Sa tanan mo nga dalanon kilalaha sia, kag magatuytuy sia sa imo mga banas.”4
Nangin amo sini sadto pa; mangin amo sini sa gihapon. Kon himuon naton ang aton tulumanon kag magsalig sing bug-os sa Ginuo, mapuno naton ang Iya mga templo, nga indi lamang nagahimo sang aton kaugalingon nga mga buluhaton sa ordinansa, kundi makaangkon man sang prebilihiyo nga makahimo sang buluhaton para sa iban. Nagaluhod kita sa sagrado nga mga altar agud mangin tal-os sa mga paghugpong nga nagaisa sang mga bana kag mga asawa kag mga kabataan sa katubtuban. Ang takos nga young men kag young women nga nagaedad sang 12 anyos sarang magtal-os para sadtong mga nagtaliwan nga wala nakabaton sang mga bendisyon sang pagbunyag. Amo ini ang handum sang aton Amay nga Langitnon para sa imo kag sa akon.
Isa ka milagro ang natabo
Sang nagligad nga pila ka tuig, isa ka mapainubuson kag tampad nga patriarka nga si Brother Percy K. Fetzer, gintawag agud maghatag sang mga patriarchal blessing sa mga miyembro sang Simbahan nga nagapuyo sa sulod sang mga dulonan sang Iron Curtain (komunista nga pungsod).
Si Brother Fetzer nagkadto sa dutang Poland sadtong mabudlay nga panahon. Ang mga dulonan ginsira, kag wala sang pumuluyo ang ginatugutan nga makagwa. Nakigkita si Brother Fetzer sa Aleman nga mga Santos nga nahunong didto sang ginliwat ang mga dulonan pagkatapos sang Ika-duhang Inaway Pangkalibutanon kag ang duta nga ila ginapuy-an sadto nangin kabahin sang Poland.
Ang aton lider sa tanan sadtong Aleman nga mga Santos amo si Brother Eric P. Konietz, nga nagpuyo didto upod ang iya asawa kag kabataan. Ginhatagan ni Brother Fetzer sanday Brother kag Sister Konietz kag ang mas hamtong nga kabataan sang mga patriarchal blessing.
Sang si Brother Fetzer nagbalik sa Estados Unidos, nagtawag sia kag nagpangabay kon puede sia makigkita sa akon. Pagpungko niya sa akon opisina, nagsugod sia sa paghibi. Nagsiling sia, “Brother Monson, sang ginatakdong ko ang akon mga kamot sa mga ulo sang mga miyembro sang pamilya-Koneitz, naghatag ako sang mga promisa nga indi sarang matuman. Nagpromisa ako kanday Brother kag Sister Konietz nga makabalik sila sa ila tumandok nga Alemanya, nga indi sila pagbihagon sang mga mapiguson nga desisyon sang nagasakop nga mga pungsod kag nga sila mahugpong bilang pamilya sa balay sang Ginuo. Nagpromisa ako sa ila anak nga lalaki nga makalakat sia sa misyon, kag nagpromisa ako sa ila anak nga babayi nga magapakasal sia sa balaan nga templo sang Dios. Ikaw kag ako nakahibalo nga tungod sang ginsira nga mga dulonan, indi sila makabaton sang katumanan sadtong mga bugay. Ano ining nahimo ko?”
Nagsiling ako, “Brother Fetzer, kilala ko gid ikaw gani nakahibalo ako nga ginhimo mo ang bagay nga luyag sang Amay nga Langitnon nga himuon mo.” Nagluhod kami nga duha sa kilid sang akon lamisa kag ginbubo ang amon mga tagipusuon sa aton Amay nga Langitnon, nga ginapaathag nga may mga promisa nga ginhatag sa isa ka matutom nga pamilya nahanungod sa templo sang Dios kag iban pa nga mga bugay nga sa karon ginabalibad sa ila. Sia lamang ang makapahanabo sang milagro nga amon ginkinahanglan.
Ang milagro natabo. Isa ka kasugtanan ang ginpirmahan sa tunga sang mga lideres sang gobyerno sang Poland kag sang mga lideres sang Pederal nga Republika sang Alemanya, nga nagatugot sa mga Aleman nga nahunong sa sina nga duog nga magbalhin sa Katundan nga Alemanya. Sanday Brother kag Sister Konietz kag ang ila mga kabataan nagbalhin sa Katundan nga Alemanya, kag si Brother Konietz nangin bishop sang ward nga ila ginbalhinan.
Ang bilog nga pamilya-Konietz nagkadto sa balaan nga templo sa Switzerland. Kag sin-o sadto ang pangulo sang templo nga nakaputi nga mapinalanggaon nga nag-abiabi sa ila? Wala’y liwan kundi si Percy Fetzer—ang patriarka nga naghatag sa ila sang amo nga promisa. Karon, sa iya kapasidad bilang pangulo sang templo sang Bern Switzerland, gin-abiabi niya sila sa balay sang Ginuo, sa pagpatuman sinang promisa, kag ginhugpong ang bana kag asawa kag ang mga kabataan sa ila mga ginikanan.
Sang ulihi ang lamharon nga anak nga babayi nagpakasal sa balay sang Ginuo. Ang lamharon nga anak nga lalaki nakabaton sang iya tawag kag nagtapos sang isa ka full-time nga misyon.
“Kit-anay kita sa templo!”
Para sa iban sa aton, malapit lang ang templo. Para naman sa iban, matabok pa sila sa mga dagat kag milya-milya ang biyaheon antes sila makasulod sa balaan nga templo sang Dios.
Sang nagligad nga pila ka tuig, antes nahuman ang templo sa Bagatnan nga Aprika, samtang nagatambong sa isa ka pang-distrito nga komperensya nga sadto amo pa ang Salisbury, Rhodesia, nakilala ko ang pangulo sang distrito nga si Reginald J. Nield. Sia kag ang iya asawa kag matahum nga mga anak nga babayi nagsugata sa akon sa pagsulod ko sa kapilya. Ila ginpaathag sa akon nga nagasupot sila sang kuwarta kag nagahanda sa adlaw nga makabiyahe na sila pakadto sa templo sang Ginuo. Ugaling, kalayo kaayo sang templo.
Sa katapusan sang miting, ang apat ka matahum nga mga anak nga babayi nagpamangkot sa akon parte sa templo: “Ano ayhan dira sa sulod sang templo? Larawan lang gid sini ang nakita namon.” “Ano ayhan ang amon mabatyagan kon magsulod kami sa templo?” “Ano ang amon labing madumduman?” Sa halos isa ka oras naagoman ko ang oportunidad nga maghambal sa apat ka bataon nga mga babayi parte sa balay sang Ginuo. Sang nagpaalam na ako para magpa-airport, nagkaway sila sa akon, kag ang pinakamanghod nga babayi nagsiling, “Kit-anay kita sa templo!”
Pagligad sang isa ka tuig naagoman ko ang oportunidad nga mag-abiabi sa pamilya-Nield sa templo sang Salt Lake. Sa malinong nga sealing room nakaangkon ako sang prebilihiyo nga ihugpong sa katubtuban, subong man sa katuigan sanday Brother kag Sister Nield. Ang mga ganhaan nian ginbuksan, kag yadtong matahum nga mga anak nga babayi, ang tagsa sa ila nakasul-ob sing matin-aw nga puti, nagsulod sa hulot. Ginhakos nila ang ila iloy, dayon ang ila amay. May mga luha sa ila mga mata, kag may kapasalamatan sa ila mga tagipusuon. Pamatyagan namon halos yara na kami sa langit. Gani ang tagsa makasiling, “Karon pamilya na kita sa katubtuban.”
Ini ang makahalangyag nga bugay nga natigana para sadtong nagakari sa templo. Kabay nga ang tagsa sa aton magkabuhi sing takos, nga may matinlo nga kamot kag putli nga tagipusuon, agud nga ang templo magtandog sang aton kabuhi kag sang aton mga pamilya.
Ano kalayo ang langit? Nagapamatuod ako nga sa balaan nga mga templo indi ini malayo—kay tungod sa diri mismo sining sagrado nga mga duog nga ang langit kag ang duta nagatabuay kag ang aton Amay nga Langitnon nagahatag sa Iya mga anak sang Iya pinakahalangdon nga mga bugay.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, October 2010. Hiligaynon. 09370 861