Mensahe sa Visiting Teaching, Oktubre 2010
Ang Balaan nga Templo
Sa mga templo, ang mga miyembro sang Simbahan nga nagatinguha nga mangin takos sarang makapartisipar sa labing mataas sang nagatubos nga mga ordinansa nga ginpahayag sa katawhan.
Sa mga templo sarang kita magpartisipar sa labing mataas sang nagatubos nga mga ordinansa
Madamo sang rason nga ang isa ka tawo luyag magkadto sa templo. Bisan ang iya sini panggwa nga dagway daw nagapakita sang iya sini madalom nga espiritwal nga mga katuyuan. Mas labing maathag ang sa sulod sang mga pader sini. Sa pihak sang ganhaan pasulod sa templo makita ang pagpasidungog “Balaan sa Ginuo.” Kon magsulod kamo sa bisan diin sang ginpahanungod nga templo, yara kamo sa balay sang Ginuo.
Sa mga templo, ang mga miyembro sang Simbahan nga nagatinguha nga mangin takos sarang makapartisipar sa labing mataas sang nagatubos nga mga ordinansa nga ginpahayag sa katawhan. Didto, sa isa ka sagrado nga seremonya, ang isa ka indibidwal mahimo mahugasan kag mahaplasan kag matulinan kag ma-endow kag mahugpong. Kag pagkatapos nga mabaton naton ining mga bugay para sa aton mga kaugalingon, mahimo kita magpartisipar sa mga ordinansa sang templo para sadtong nagtaliwan nga wala makaangkon sang amo man nga oportunidad. Sa mga templo, ang sagrado nga mga ordinansa ginahikot alangay para sa buhi kag minatay.
Ang mga ordinansa kag mga seremonya sang templo simple, matahum, kag sagrado
Kon basahon sing maid-id ang balaan nga mga kasulatan ginapahayag sini nga ang Ginuo wala nagsugid sang tanan nga butang sa tanan nga tawo. May yara sang pila ka nahamtang nga kwalipikasyon nga kinahanglanon antes makabaton sang sagrado nga impormasyon. Ang mga seremonya sa templo nalakip sa sining kategorya.
Wala naton ginasugilanonan ang mga ordinansa sang templo sa gwa sang mga templo. Wala gid gintuyo nga ang ihibalo parte sining mga seremonya sa templo limitahan sa pila-pila lamang nga maobligar magsiguro nga ang iban indi na makahibalo parte sa mga ini. Sa pagkamatuod, kabaliskaran ini. Nga may dako nga paghimud-os, ginapaisog namon ang tagsa ka kalag nga mangin takos kag maghanda para sa eksperiyensya sa templo. Ang mga nakakadto na sa templo natudloan sang isa ka prinsipyo: Sa pila ka adlaw ang tagsa ka buhi nga kalag kag tagsa ka kalag nga nagkabuhi makaangkon sang oportunidad nga makabati sang ebanghelyo kag magbaton ukon magsikway sang ginatanyag sang templo. Kon pagasikwayon ining oportunidad, ang responsibilidad sa pagsikway iya sang tagsa ka indibidwal.
Ang mga ordinansa kag mga seremonya sang templo simple lamang. Matahum ang mga ini. Sagrado ang mga ini. Ginatipig ang mga ini nga confidential agud nga indi ini mahatag sa sinang indi handa. Ang pagkausyoso indi isa ka pagpanghanda. Ang dako nga interes mismo indi isa ka pagpanghanda. Ang pagpanghanda para sa mga ordinansa nagalakip sang panugod nga mga tikang: pagtuo, paghinulsol, pagbunyag, kompirmasyon, katakos, pagkahamtong kag dignidad nga nagakaangay sa isa nga nagakari bilang isa ka imbitado nga bisita sa balay sang Ginuo.
Ang yadtong takos makasulod sa templo
Ang tanan nga takos kag kwalipikado kaayo makasulod sa templo, kag didto makapasakop sa sagrado nga mga seremonya kag mga ordinansa.
Sa tion nga may yara kamo sang paghangop sang kaimportante sang mga bugay sang templo kag sang pagkasagrado sang mga ordinansa nga ginahikot sa templo, indi na ninyo pag-usisaon pa ang mataas nga mga sulukdan nga ginpahamtang sang Ginuo agud makasulod sa balaan nga templo.
Kinahanglan ninyo mag-angkon sang isa ka bag-o nga recommend agud makasulod sa templo. Ining recommend kinahanglan pirmahan sang nagakaigo nga mga opisyal sang Simbahan. Ang yadtong takos lamang ang makakadto sa templo. Ang inyo lokal nga bishop ukon branch president may responsibilidad sa pagpangusisa parte sa inyo personal nga katakos antes ninyo mabaton ang inyo mga ordinansa sang templo. Ining interbyu tuman gid kaimportante, kay tungod ini isa ka kahigayunan sa pagsayasat upod sa isa ka gin-ordinan nga alagad sang Ginuo parte sa sahi sang inyo pagpangabuhi. Kon may yara sang diperensya sa inyo pagpangabuhi, ang bishop makabulig sa inyo sa pagsolbar sini. Paagi sining proseso, sarang kamo magdeklarar ukon sarang kamo mabuligan nga mapat-uran ang inyo katakos sa pagsulod sa templo nga may pahanugot sang Ginuo.
Ang interbyu para sa temple recommend ginahiwat sing pribado sa tunga sang bishop kag sang miyembro sang Simbahan nga nagapainterbyu. Diri ang miyembro ginapamangkot sang pat-od nga mga pamangkutanon parte sa iya personal nga pamatasan, katakos, kag katampad sa Simbahan kag sa mga opisyal sini. Ang miyembro kinahanglan magpamatuod nga may moral sia nga katinlo kag nagatipig sang Word of Wisdom, nagabayad sang bug-os nga ika-pulo [tithing], nagapangabuhi nga igo sa mga ginatudlo sang Simbahan, kag wala ginasakdag ang bisan ano nga pagdampig ukon pagbuylog sa mga grupo nga nagtalikod sa Simbahan. Ang bishop ginatulinan nga ang pagkapribado sa pagdumala sining mga butang sa tagsa ka aplikante amo nga labing importante.
Ang akseptable nga mga sabat sa mga pamangkot sang bishop sa masami nagapat-od sang katakos sang isa ka indibidwal agud makabaton sang temple recommend. Kon ang isa ka aplikante wala nagatuman sang mga kasuguan ukon may yara sang mga butang nga wala pa nahusay sa iya kabuhi nga kinahanglan pa areglahon, kinahanglanon nga magpakita anay sang matuod-tuod nga paghinulsol antes ihatag ang temple recommend.
Pagkatapos nga mahiwat sang bishop ang amo nga interbyu, ang stake president mainterbyu man sa inyo antes ninyo mabaton ang inyo mga ordinansa sang templo.
Ang pagtudlo sa templo puno sang simbolismo
Antes magkadto sa templo sa una nga bes, ukon bisan pa pila na ka beses, ayhan makabulig sa inyo nga marealisar nga ang pagpanudlo sa mga templo ginahimo nga nagagamit sang mga simbolo. Ang Ginuo, ang Dakong Manunudlo, naghatag sang kalabanan sang Iya mga panulin sa sini nga paagi.
Ang templo isa ka dakong buluthuan. Isa ini ka balay-tulun-an. Sa mga templo ang palibot ginamentenar agud nga ini nagakaigo para sa pagpanulin parte sa mga butang nga tuman ka espirituhanon. Ang nagtaliwan na nga si Elder John A. Widtsoe sang Korum sang Napulo’g Duha ka mga Apostoles isa ka kinilala nga presidente sang unibersidad kag ginakilala nga iskolar sa bug-os nga kalibutan. May dako sia nga pagtahod para sa buluhaton sa templo kag nagsiling sadto:
“Ang mga ordinansa sang templo nagalikop sang bilog nga plano sang kaluwasan, subong nga ginatudlo sang mga lider sang Simbahan, kag nagapaathag sang mga butang nga mabudlay hangpon. Indi na kinahanglan lubagon ukon liwaton agud mapasanto ang mga ginatudlo sang templo sa dakong plano sang kaluwasan. Ang mahunahunaon nga pagkakompleto sang endowment isa sang dako nga mga argumento parte sa pagkamatuod sang mga ordinansa sang templo. Dugang pa, ining kakompleto sang pagsayasat kag pagpaathag parte sa plano sang Ebanghelyo, nagahimo sang pagsimba sa templo nga isa sang labing epektibo nga mga pamaagi sa pagpapagsik liwat sang memorya nahanungod sa bilog nga istruktura sang Ebanghelyo” (“Temple Worship,” Utah Genealogical and Historical Magazine, Abr. 1921, 58).
Kon magkadto kamo sa templo kag dumdumon nga ang pagpanudlo puno sang simbolismo, indi gid mahimo nga magsulod kamo dala ang nagakaigo nga pamatasan kag maggwa nga wala napasangkad ang inyo paghangop, nabayaw ang inyo balatyagon, kag nadugangan ang inyo ihibalo parte sa mga butang nga espirituhanon. Ang plano sa pagtudlo maayo gid. Inspirado ini. Ang Ginuo mismo, ang Dakong Manunudlo, nagtudlo pirme sa Iya mga disipulo sang mga paanggid [parables]—isa ka pamaagi sa paghambal agud marepresentar paagi sa mga simbolo ang mga butang nga ayhan mabudlay hangpon.
Ang templo mismo isa ka simbolo. Kon nakakita na kamo sang isa sang mga templo sa kagab-ihon nga puno sang kasanag, nakahibalo kamo kon ano kamakahalawhaw nga talan-awon ina. Ang balay sang Ginuo nga napalibutan sang kasanag, nga nagapangibabaw sa kadudulman, nagasimbolo sang gahum kag sang inspirasyon sang ebanghelyo ni Jesucristo nga nagatindog bilang kapawa sa isa ka kalibutan nga padayon nga nagalugdang sa espirituhanon nga kadulom.
Sa pagsulod sa templo, ginailisan ninyo ang inyo kinaandan nga panapton sang puti nga panapton sang templo. Ining pag-ilis sang panapton ginahimo sa dressing room, sa diin ang tagsa ka indibidwal ginahatagan sang locker kag isa ka hulot-ilislan nga pribado kaayo. Sa templo ang prinsipyo sang kaugdang maid-id nga ginapatuman. Sa inyo pagbutang sang inyo panapton sa locker, ginabilin ninyo ang inyo mga problema kag mga ginakabalakhan kag mga katublagan didto upod sang mga panapton. Magagwa kamo gikan sining pribado nga diutay nga hulot-ilislan nga nakasul-ob sing puti, kag makabatyag kamo sang pag-isa kag sang pagkapalarehas tungod ang tanan sa palibot ninyo palareho man ang panapton.
Ang kasal sa templo ang labing mataas nga ordinansa sang templo
Kamo nga nagapaabot sang kasal sa templo ayhan luyag makahibalo kon ano ang matabo. Wala naton ginamitlang ang mga pulong sang ordinansa sang paghugpong (kasal) sa gwa sang templo, apang mahimo naton ilaragway ang sealing room nga may matahum nga mga kasangkapan, mahipos kag malinong sa espiritu, kag ginpakabalaan paagi sa sagrado nga buluhaton nga ginahikot didto.
Antes ang manugpakasal magkadto sa altar para sa ordinansa sang paghugpong, prebilihiyo sang tagdumala nga maghatag, kag sang lamharon nga manugpakasal nga magbaton, sang laygay. Yari ang pila sang mga inspirasyon nga ayhan mabatian sang lamharon nga manugpakasal sa sining tion.
“Karon ang adlaw sang inyo kasal. Nalipay gid kamo sa inyo pagpakasal. Ang mga templo gintukod bilang santuaryo para sa kasubong sini nga mga ordinansa.Wala kita sa kalibutan. Ang mga butang sang kalibutan wala nagakaangay diri kag dapat wala sang impluwensya sa kon ano ang aton ginahimo diri. Naggwa kita sa kalibutan pakadto sa templo sang Ginuo. Ini amo ang labing importante nga adlaw sang inyo kabuhi.
“Ginbun-ag kamo, gin-agda sa duta, sang mga ginikanan nga naghanda sang mortal nga tabernakulo para puy-an sang inyo espiritu. Ang tagsa sa inyo ginbunyagan. Ang bunyag, isa ka sagrado nga ordinansa, simbolo sang katinlo, simbolo sang kamatayon kag pagkabanhaw, simbolo sang pagsulong sang isa ka bag-ong pagkabuhi. Nagalakip ini sang paghinulsol kag kapatawaran sang mga sala. Ang sakramento sang Panyapon sang Ginuo isa ka pagbag-o sang kasugtanan sang bunyag, kag sarang kita, kon tumanon naton ini, magtipig sang kapatawaran sang aton mga sala.
“Ikaw, nga nobyo, gin-ordinan sa priesthood. Una nga ginhatag sa imo ang Aaronic Priesthood kag ayhan nag-uswag sa tanan nga mga palangakuan sini—deacon, teacher, kag priest. Dayon ang adlaw nag-abot sang ikaw napat-od nga takos sa pagbaton sang Melchizedek Priesthood. Inang priesthood, ang mas mataas nga priesthood, ginalaragway bilang ang priesthood suno sa pinakabalaan nga paagi sang Dios, ukon ang Balaan nga Priesthood suno sa Paagi sang Anak sang Dios (tan-awa sa Alma 13:18; Helaman 8:18; Doctrine and Covenants 107:2–4). Ginhatagan ikaw sang palangakuan sa priesthood. Isa na ikaw karon ka elder.
“Ang tagsa sa inyo nakabaton sang inyo endowment. Sa sinang endowment ginpuhunan kamo sang wala’y katapusan nga potensyal. Apang ining tanan nga mga butang, sa isa ka paagi, nangin introduksyon kag panugod pa lamang sa inyo pagkari sa altar agud ihugpong bilang bana kag asawa sa katuigan kag wala’y katapusan. Karon isa na kamo ka pamilya nga hilway sa pagpadayon sa pagtuga sang kabuhi, sa pag-angkon sang oportunidad paagi sa kaukod kag sakripisyo nga dalhon ang kabataan sa kalibutan kag batition sila kag buligan sila nga luwas sa ila kabuhi; nga makita sila nga nagakari pila ka adlaw, subong sang inyo pagkari, agud magpartisipar sa sining sagrado nga mga ordinansa sang templo.
“Nagkari kamo sa inyo kabubut-on kag ginpamat-uran nga takos. Ang pagbaton sa isa kag isa sa kasugtanan sang pag-asawahay isa ka dako nga responsibilidad, isa nga nagadala upod sini mga bugay nga di-maisip.”
Ang gahum sa paghugpong nagagapos sa duta kag sa langit
Kon gusto naton hangpon alangay ang kasaysayan kag ang doktrina sang buluhaton sa templo, kinahanglan naton hangpon kon ano ang gahum sa paghugpong. Kinahanglan naton makita, bisan sa isa lang ka punto, kon ngaa ang mga yabi sang awtoridad sa paggamit sang gahum sa paghugpong importante kaayo.
“Karon sang nagsulod si Jesus sa ginsakpan sang Cesarea ni Filipo, nagpamangkot sia sa iya mga gintoton-an, Sin-o bala siling sang mga tawo ang Anak sang tawo? …
“Nagsabat si Simon Pedro, Ikaw ang Cristo, ang Anak sang Dios nga buhi.
“Kag si Jesus nagsabat sa iya, Bulahan ikaw, Simon Bar-Jonas: kay wala pag-ipahayag ini sa imo sang unod kag dugo, kundi sang akon Amay nga yara sa langit.
“Kag ako man nagasiling sa imo, Ikaw si Pedro, kag sa ibabaw sining igang tukuron ko ang akon iglesia; kag ang mga gahum sang kamatayon indi makalandas sa iya.
“Sa imo akon ihatag ang mga yabi sang ginharian sang langit: kag ang bisan ano nga imo gapuson sa duta gapuson sa langit: kag ang bisan ano nga imo hubaran sa duta hubaran sa langit” (Mateo 16:13, 16–19).
Si Pedro ang nagkapot sang mga yabi. Si Pedro ang nagkapot sang gahum sang paghugpong, inang awtoridad nga nagadala sang gahum sa paghugpong ukon pagpat-in sa duta ukon paghubad sa duta kag amo man sini sa mga kalangitan. Ang yadtong mga yabi iya sang Pangulo sang Simbahan—sang propeta, manugtulok (sang palaabuton), kag manugbugna. Inang sagrado nga gahum sa paghugpong yara na karon sa Simbahan. Wala na sang may ginakabig nga mas tuman pa ka sagrado nga pagpanghunahuna sang sadtong nakahibalo sang kaimportante sining awtoridad. Wala na sang iban pa nga tuman nga ginatipigan. May pila lamang ka lalaki nga ginhatagan sining gahum sa paghugpong sa duta sa natalana nga tion—sa tagsa ka templo may mga kauturan nga ginhatagan sang gahum sa paghugpong. Wala sang may makakuha sini luwas lang kon gikan sa propeta, manugtulok (sang palaabuton), kag manugbugna kag Pangulo sang Ang Simbahan ni Jesucristo sang mga Santos sa Ulihing mga Adlaw.
Ang Propetang Joseph Smith nagsiling nga pirme sia ginapamangkot “‘Indi bala mahimo nga maluwas kita nga wala nagabaton sang tanan sinang mga ordinansa, kag iban pa?’ Akon ginasabat, Indi, indi ang kabug-usan sang kaluwasan. Si Jesus nagsiling, ‘Sa balay sang akon Amay may madamong hulot, kag magalakat ako kag maghanda sa inyo sing duog.’ [Tan-awa sa Juan 14:2.] Ang Balay nga gingamit diri dapat ginlubad nga ginharian; kag ang bisan sin-o nga ginbayaw sa pinakamataas nga mansyon kinahanglan magtuman sang selestyal nga layi, kag ang bug-os man nga layi” (sa History of the Church, 6:184).
Ang buluhaton sa templo ginahalinan sang espirituhanon nga gahum
Ang mga templo ang mismo nga sentro sang espirituhanon nga kusog sang Simbahan. Dapat naton paabuton nga ang kasumpong magatinguha sa pagpamalabag sa aton bilang Simbahan kag sa aton bilang indibidwal sa aton pagtinguha sa pagpasakop sa sining sagrado kag inspirado nga buluhaton. Ang buluhaton sa templo nagadala sang tuman nga pagpamatok bangod ini ang ginahalinan sang tuman nga espirituhanon nga gahum sa mga Santos sa Ulihing mga adlaw kag sa bilog nga Simbahan.
Sa pagpahanungod sang pamag-ang [cornerstone dedication] sa templo sang Logan Utah, si Pangulong George Q. Cannon, sadto anay sang Unang Panguluhan, nagpahayag:
“Ang tagsa ka pundasyon nga bato nga ginapahamtang sa isa ka Templo, kag ang tagsa ka Templo nga nahuman suno sa sugo nga ginapahayag sang Ginuo para sa iya balaan nga Priesthood, nagabuhin sang gahum ni Satanas sa duta, kag nagadugang sang gahum sang Dios kag Pagkadiosnon, nagaidog sang mga kalangitan sing makagalahum para sa aton, nagapangayo kag nagapangabay para sa aton sang mga bugay sang Wala’y Katapusan nga mga Dios, kag sang sadtong nagapuyo sa ila presensya” (sa “The Logan Temple,” Millennial Star, Nob. 12, 1877, 743).
Kon ang mga miyembro sang Simbahan ginagamwan o kon ang importante kaayo nga mga desisyon nagapabug-at sang ila mga kaisipan, kinaandan na para sa ila nga magkadto sa templo. Maayo ini nga duog nga dalhan sang aton mga kabalakhan. Sa templo makabaton kita sang espirituhanon nga panan-awan. Didto, sa tion sang pag-alagad sa templo, kita “gikan sa kalibutan.”
Kon kaisa ang aton mga kaisipan napabug-atan sang mga problema kag kadamo kaayo sang mga butang nga nagakinahanglan sang gilayon nga atensyon nga indi na kita makapamensar sing maathag kag makakita sing maathag. Sa templo ang yab-ok sang pagtublag daw nagahawan, ang alipuok kag ang tun-og daw nagatahaw, kag “makita” naton ang mga butang nga wala naton makita sadto kag makita naton ang paagi agud nga malampuwasan ang aton mga kabalakhan nga wala naton mahibaloan sadto.
Ang Ginuo magabugay sa aton sa aton paghikot sang sagrado nga buluhaton sang ordinansa sang mga templo. Ang mga bugay didto indi limitado sa aton pag-alagad sa templo. Pagabugayan kita sa tanan naton nga mga kahiwatan.
Ginasagang kita sang taming kag sang pag-amlig sa aton mga ginabuhat sa templo
Wala sang buluhaton ang may mas labing pag-amlig sa sining Simbahan sangsa buluhaton sa templo kag pag-usisa sang family history nga nagasakdag sini. Wala sang buluhaton nga mas labing makatinlo sing espirituhanon. Wala sang buluhaton nga ginahimo naton ang nagahatag sa aton sang mas dako nga gahum. Wala sang buluhaton ang nagakinahanglan sing mas mataas nga sulukdan sang pagkamatarong.
Ginasagang kita sang taming kag sang pag-amlig sa aton mga ginabuhat sa templo, alangay nga indibidwal kag bilang katawhan.
Gani magkari sa templo—magkari kag dawata ang inyo mga bugay. Isa ini ka sagrado nga buluhaton.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, October 2010. Hiligaynon. 09370 861