Klumech er a First Presidency, Ongeteruich el buil 2010
Klengeltengat er a Templo
A templo a olterkokl a moktek er a klechad er kid. Nguchul a budech el mei er a delbenged—ngdiak el budech el mlara rechad ngbai budech el blel iaksok er ngii a Sechal Ngelekel a Dios sera ledung el kmo, “A budech a bo kbeskemiiu. Ngbudech er ngak a kumeskemiu.”
A de ngara templo ngsebeched el omelchesiu er kid el mo kmeed er a Rubak
A kumdasu eng diak a ngodech el basio er a beluulechad el kumelchesiu er ngak el mengai el mo kmeed er a Rubak ra edaol el templo er Ngii. Ak di kodebengii a kedeb el cheldecheduch:
Nguangerang a cherridel a babeluades?
Ngdiak el sal cheroid.
A elsel a templo er a Dios,
Ngara tiang el de ngarngii.
A Rubak a dilung el kmo:
“Lak mongudel a mekreos el klokliu er a beluulechad, el sebechel a charm el tomall e sebechel mo mechut, e sebechir a remerechorech el mei e ruchorech:
“Bai mongudel a mekreos el klokliu er babeluades, el diak el sebechel a charm el tomall ma ka bol mechut, e diak el sebechir a remerechorech el mei e rechorech:
“Le sel ngarngii a mekreos el klokliu er ngii, a le ngarngii a rengmiu er ngii el dirrek.”1
A rechedal a Ikelesia er a Jesus Kristo er a Uriul-klebesei el Santo, a templo a sel kot el edaol basio el ngara beluulechad. Ngblil a Rubak, e di uai sel llechukl el ngara ikrel a templo el kmo, a templo a “eledolel a Rubak.”
A templo a ongescheklid el morbab
A elsel a templo, ea mekreos el urungulel a Dios a mosischakl. Ngchelsel a templo a diak a ulebengelel telbiil a mekedmokl. A templo a ongescheklid el morbab, ngdechor el olbidel el rokui a sebechir el mesang, e omekrael er kid el kirel sel klebkall el ngara eanged. Ngblil a Dios. A rokui el duubech er a elsel a templo a olngeschekl e melisiich.
A templo a kirir a retelungalk, el tang er a kot el mekreos el tekoi el dorreked er ngii er a klechad. A Rubak a kmal bleketakl a cheldechedechal el mei er kid el edam, el ouchais er kid el kmo ngarngii a ngercheled el mo betik a rengud er a rebechid el olab a rengud el rokir e mo mengedmokl er tir me a rengeleked. Ngii a mla ouchais er kid el kmo a kot el klou el ureor el derellii a mekedmokl er a chelsel a blid, me a blid a sebechel babeluades, oumesingd sel merenged a chebechiiled er a chelsel a blil a Dios.
Ngkel mla remiid el Elder Matthew Cowley, el mle chedal a Chelchad er a Teruich me a Terung el Apostol, a mle tang el ouchais er a teletael el blol chau ngii el demal a demal a kekerei ngelekel a ngelekel el dil er a tang el chodechosong er a Sabadong er a blol oldingel er ngkel kekerei ngelekel a ngelekel el dil er a tanjobi er ngii—ngdimlak bo lomes a charm malechub e te molmes a katsudo tebai mlo ra mekesekesel a templo. Te ulelturk er ngkel mengedmokl er a mekesokes e merrael el mor a ikei el meklou el chesmerel a templo. Ngkang el chad a millekoi el kmo ngkal ngalk el dil a ungil dil ngai a chimal el mereked er a meduch el kboub e le dirrek el ngmai el mereked er tiang el klou el chesimer. E mekekokil el melekoi er ngii el ngalk el dil kmo, “Di blechoel lotkii el kmo ngtiang el sils ke riretechii a templo. A tang er a klebesei ke mo tmuu er a chelsel.” A mle beresent er ngii el mor ngkal kekerei el ngalk a dimlak el candy malechub eng ice cream ngbai teletael el lmuut el dmolech a belkul e diak a ulebengelel—a ultebengel er a blil a Rubak. Ngkang el dil a rirtechii a templo, me a templo a rirtechii a rengul.
A templo a ochau a budech el mei er a delbenged
Sel dertechii a templo e bol betik a rengud er a templo, a klechad er kid a mo ochotii a klaumerang er kid. Sel debong er tiang el edaol blai, e delatk a telbiil el deriruul er a chelsel, ngmo sebeched el otekau a rokui el ongarm e mtok a bekel ongetikaik. A templo a oterkokl a moktek er a klechad er kid. Nguchul a budech el mei er a delbenged—ngdiak el budech el mlara rechad ngbai budech el blel iaksok er ngii a Sechal Ngelekel a Dios sera ledung el kmo, “A budech a bo kbeskemiiu. Ngbudech er ngak a kumeskemiu. Bol chelellakl a rengmiu, e lak komedakt.”2
Ngarngii a mesisiich el klaumerang er a reSanto er a Uriul-klebesei. A Rubak a meskid a techall e omes el kmo kede oltirakl a llechul, alsekum e kede mo oeak a rael el uleak ngii a Jesus er a Nazareth, e kid kede mo betik a rengud er a Rubak er a rengud el rokir, a duch er kid, a uldesued me a klisiched, e dirrek el betik a rengud er a rengara bitang er kid el di uai kid.3
A kmal oumerang er sel bades “Multuil er a Rubak el obang rengum er rokir; e lak multuil er a klemedengei er kau. Me a rokui el moruul e bo er ngii, e ngii a mo mekrolau.”4
Tiang a di mla teletelel; tiang a di mo blechoel teletelel. Alsekum e kede meruul a ngercheled e di mui el ultuil er a Rubak, eng mo uchul e kede mo betok el mora templo er Ngii el diak di doruul a ruoll el kired, ngdirrek el mo sebeched el meruul a ureor el kirir a rekuk bebil. Kede moutubaruach er a edaol altar el mo chomtechei er a rechad e oldak er a resechal me a rebecherir me a rengelekir el mo cherchar. A reklikiid el ngeasek el sechal me a redil el sebechir el kmal kekerei el 12 a rekrir a sebechir el omtechei er tirkei el mla mad e dimlak el metecholb. Tiaikid sel kmal urungulel a Chedam er a Babeluades el oureng er ngii el kirem me a ngak.
A tekoi le chelid a dilubech
A betok el rak er a mla memong, a ngar iou a rengul e mesisiich a klaumerang er ngii el patriarch, el Brother Percy K. Fetzer, a mlokedong el mo mseterir a klengeltengat er a patriarch el mor a rechedal a Ikelesia el sersoll er a Kabelment er a Kiosanto.
A Brother Fetzer a mlora beluu er a Poland er a ikang el mle milkolk el taem. A oliochel er a beluu a mle sersoll, me a rechad er a beluu a dimlak el sebechir el tuobed el merael. A Brother Ferzer a mloldingel er a reSanto el chad er a Dois el milcheseches er elsel a beluu ser al mengodech a oliochel er a beluu er a uriul er Ongerung el Mekemad er a Beluulechad e a chutem el lekiliei er ngii a mlo tedbechel a beluu er a Poland.
A merreder er kemam el mle tang er tirkei el Santo el chad er a Dois a mle Brother Eric P. Konietz, el kiliei er sei ngii ma bechil me a rengelekel. A Brother Ferzer a milseterir a Brother me a Sister Konietz me a tirkei el meklou el ngalk patriarchal blessings.
A Brother Fetzer ser al luut er a Merikel, ngulmekedong e olengit el mei mes er ngak. Meng dengchokl er a obis er ngak, e longelang. Ngdilung el kmo, “Brother Monson, ak lechang a chimak er a bderrir a rechedal a telungalk er a Konietz, ak riruul a iaksok el diak el sebechel mo tekoi. Ak mle iaksok er a Brother me a Sister Konietz el kmo to mo lmuut er a belurir er a Dois, e mo diak el sersoll er a uldesuel a mlo mesisiich er a mekemad el beluu e tir a mo moak el telungalk er a blil a Rubak. Ak mle iaksok el kmo a sechal ngelekir a mo messiou er mision, e dirrek el mle iaksok el kmo a ngelekir el dil a mo bechiil er a edaol templo er a Dios. Kau me a ngak a medengei el kmo a oliochel a telnget, meng diak el sebechir el mo mes a ikang el klengeltengat el mo tekoi. Ngerang tiang el blak rellii?”
Ak dilung el kmo, “Brother Fetzer, ak kmal ungil medengelkau el kmo ke rirellii sel soal a Demad er a Babeluades a omrellii.” Kemau el terung a mlo utubaruach er a bitang er a tebelek e kmal di milok a rengmam el mora Demad er a Babeluades, e ochotii el kmo a iaksok el mirruul el mora kmal blak a rengrir telungalk el kirel a templo er a Dios me a kuk bebil er a klengeltengat el diak el sebechir el ngmai. Ngdi tang el Ngii a sebechel kudmeklii a tekoi le elid el ki mousbech er ngii.
A tekoi le elid a dilubech A telbiil a blel saing er ngii a remerreder er a kabelment er a Poland me a remerreder er a Federal Republic of Germany, me le nguu a kengei tirkei el chad er a Dois el ngara ikei el basio el sersoll er a mla mengodech el oliochel me lolukl el mora West Germany. Brother me a Sister Konietz me a rengelekir a millukl el mora beluu er a West Germany, ea Brother Konietz a mlo bisob er a ward er sel kiliei er ngii.
Sel rokir el telungalk er a Konietz a mlor sel edaol templo el ngara Switzerland. E techang ngkel mle president er a templo el uluutkeu er ngii e becheleleu a bilel? Ngdiak el ngodech el chad ngbai Percy Fetzer—ngkel patriarch el milseterir sel iaksok. Elechang, el ngar a deruchellel el president er a templo er a Bern Switzerland, ngmilngemedaol er tir el mei ra blil a Rubak, er a otutel a iaksok, e silmesemii a sechal me a bechil me a rengelekir el mor tir.
Ngkel kekerei el ngelekir el dil a di mlochu bechiil er a blil a Rubak. Ngkel kekerei el ngelekir el sechal a mlokedong e rirekir a mision er ngii.
”Di bo de kaseues er a elsel a templo!”
A bebil er kid, a omerolled el mora templo a di kmeed. Ea rebebil, e te imuul er a daob me a betok el mael el lorael e mochu soiseb er a edaol templo er a Dios.
A bebil rak er a mla memong, ra uchei er a bol merek a templo er a beluu er a South Africa, e ak mlara ongdibel er a district er sel beluu er al Salisbury, Rhodesia, e ak mlo kaseues ngak me a president er a district, el Reginald J. Nield. Ngii me a bechil me a rengelekir el redil a mle outkeu er ngak er a bok siseb er a kekerei el ikelesia. Te uluuchais er ngak el kmo te blak a rengrir el mengudel a ududir e mengedmokl er tir el mo sebechir el mora templo er a Rubak er a tang er a klebesei. Ngdi, a templo a kmal imis el cheroid.
A bochang el merek a miting, e tirkei el teuang el ngelekir el dil a okerei er ngak er a templo:“A templo nguangerang? A ki di mla mes a siasing er ngii e merkong.” “Ngerang a aki molchesuar sel ki msiseb er a templo?” “Ngerang sel kot el ki bo molatk er ngii?” Nglocha mle tang el sikang el ngarngii a techellek el mengedecheduch er tirkang el teuang el dil el kirel a blil a Rubak. Ma kurolang el mora skojo, e te milmesumech er ngak, e ngkel kot el ngeasek el dil a dilung el kmo, “Di de kaseues er a templo!”
Uriul er a tang el rak e ngak a mlorngii a techellek el outkeu er a telungalk er a Nield er a templo er a Salt Lake. A ki ngara elsel a kellechakl el delmerab eng mlarngii a techellek el somesemeterir el mo cherchar, a Brother me a Sister Nield. Ea chesmerel tiang el delmerab a milngai, e tirkei el klebokel el ngelekir el redil, el oubail a becheleleu e diak a cheisech er ngii el bail a me dmuu. Te milchulterir a derrir, eng demerir. Ngmlarngii a iuchel a mederir, me a dmolech el omerang el saul el ngara rengrir. Ngua ki di blem keed er a babeluades. A der tang er tir a sebechel dmung el kmo, “Elechang ea ki telungalk el mo cherchar.”
Tiang sel kmal dmolech a belkul klengeltengat el mengiil el tirkei el mei er a templo. Kol bol sebechel a der tang er kid el mo klikiid a klechad er kid, e beches a chimad e bliochel a rengud me bol sebechel a templo el sumechokl a klechad er kid me a telungalk er kid.
Nguangerang a cherridel a babeluades? A kuuchais el kmo a edaol templo a diak el kirir a rokui—leng sel edaol basio el babeluades me a beluulechad a me chachuchau ea Demad er a Babeluades a mseterir a rengelekel sel kot el klou el klengeltengat er Ngii.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a First Presidency Message, October 2010. Palauan. 09370 881