Klumech er a Oldingel e Olisechakl, Ongeteruich el Buil 2010
Sel Edaol Templo
Ngara templo, tirkei el chedal a Ikelesia el mla rulleterir el mo klikiid a sebechir el mo teloi er a ikei el kot el olngeschekl er a ikei el olsobel el ruoll el mla mocholt el mei er a rechad.
Ngara templo, ngsebeched el mo teloi er a ikei el kot el olngeschekl er a ikei el olsobel el ruoll
Ngarngii a betok el uchul ea chad a kirel soal mei er a templo. A ikrel a ochodtii sel kmal dmolech el moktek er ngii er a reng. Tiang a lmuut el kmal keltukl er a elsel. A bebul a tuangel eng llechukl “Eledolel el mora Rubak.” Sel bom siseb er a mla moterkokl el templo, e kau a ngara elsel a blil a Rubak.
Ngara templo, tirkei el chedal a Ikelesia el mla rulleterir el mo klikiid a sebechir el mo teloi er a ikei el kot el olngeschekl er a ikei el olsobel el ruoll el mla mocholt el mei er a rechad. .Sel belsechel a edaol omengedmokl, ea chad a metecholb e mechilt er a eluch e mosischakl e mechedaol e mesemosem. E sel bla dengai a klengeltengat el kired, eng sebeched el kudmokl a ruoll el kirir tirkei el mla mad e dimlak el bol chau a ikang el osisiu el techall. Ngara elsel a templo a ikang el edaol ruoll a sebechel mekedmokl el kirir a rekiei me a remla mad.
A ruoll me a omengedmokl er a templo a beot, klebokel, e edaol
A bo de kerkikl el mesuub er a edaol llechukl eng mo chemolt el kmo a Rubak a dimlak el locholt a rokui el tekoi el mora rokui el chad. Ngarngii a ulterkokl el semecheklel a klechad el kirel ma mekedmokl eng mochu sebechel a chad el ngmai a edaol klemedengei. A kedmeklel a chad er a elsel a templo a tang er a ikang el teletael
Ngdiak dosaod a ruoll er a templo er a rael. Ngdimlak a tang el moktek el kmo a klemedengei er a ruoll er a elsel templo a di mekesai el ngellitel a medengei el mo uchul ea rebebil a diak el bol lodengei. Ngmerang el diak el uaisei. Ngbai kmal a klou a ureor el mengesuseu er a rechad mel kedmekelterir el mo sebechir el mora templo e lesang tiang el teletael. Tirkei el mla mora templo a mla mosischakl er sel kot el ungil el teletael. A tang er a klebesei ea rokui chad me a rokui el chad el mla ngar a morngii a techellir el rongesii a osischakl e kongei malechub e totngakl a ikei el sebechel mekedmokl er a templo. Alsekum e tiang el techall a motngakl, e tiang a kmal di ngara chad.
A ruoll er a templo a di beot. Ngklebokel. Ngchedaol. Ngchokedeldaol meng diak el dil tobed el mor tirkei el diak el keldmokl. A chad el kuk di soal el mo medengei a diak el kedmeklii el mora a templo. A dmolech el klemeriar erreng a diak kedmeklii a chad el mora templo. A omengedmeklel a chad el mo meruul a ruoll er a templo a uldimukl er a kedmeklel a ikang er a chad: klaumerang er ngii, ouuchel a kngtil, techolb e elid, oterkeklel, kikiidel, utebechelel a klechad me a rengul el mo sebechel chad el mokedong el mei er a bllil a Rubak.
Tirkei el klikiid a klechad er tir a sebechir el mo soiseb er a tempol
A rokui el klikiid e oltirakl a rokui el teletael er a llemalt a sebechir el mo soiseb er a templo, e sel bong e te mocholt a edaol teletael me a ruoll.
Sel tang el bla molchesuar sel dmolech el belkul a klengeltengat er a templo me a eledolel a ruoll el mekedmokl er a elsel, eng mosarch a rengum meng mo diak el kerioll el kmo ngerang me a kerbai el bla loterkokl a Rubak el kired el oltirakl a bo desiseb er a edaol templo a kora kmal etituokel.
Ngkirem el obang a beches el babier er a kengei el mora templo eng mochu sebechem el mo soiseb er a templo. Tiang el babier a kirel saing er ngii ngkel obang a klisiich el merreder er a Ikelesia. Te di tirkei el chad el klikiid a sebechir el mora templo. A bisob malechub eng president er a branch el mngarngii a ngerchelel mengedecheduch kau er a semcheklel a klechad er kau er a uchei er a bochung el sebechem el kudmokl a ruoll el kirem er a templo. Tiang el cheldecheduch a kmal klou a ultutelel, leng belsechel lengesukau a telutk el mesiungel a Rubak el mo ungil tirterii a klechad er kau. Alsekum eng diak el ungil selmechokl a klechad er kau, ea bisob e sebechel ngosukau el sumecheklii. A otireklel tiang el teletael, a mo uchul eng sebechem el ochotii a ngelsengesem e mongeseu el sumecheklau meng mo sebechem el soiseb er a templo el ultuil er a kengei er a Rubak.
A cheldecheduch el kirel a babier er a kengei el mora templo a di delongelel a bisob me a ngkel chedal a Ikelesia el ousbech er ngii. A kerioll er a ngkal chad a blekerdelel a klechad er ngii, kikiidel a rengul, me a klaumerang er ngii er a Ikelesia me a remerredelel. Ngkirel a chad el sebechel di beches el dmung el kmo ngklikiid a rengul e oltirakl a Llach el kirel a Omelisiich er a bedenged, melechang er a mui el ongeltacher, e selmechokl a klechad er ngii el oltirakl a osischakl er a Ikelesia, e diak el oltirakl er a rechad el mekngit a omerellir. A bisob a medengei el kmo a ikang el cheldecheduch el obengkel a dertang el chad a kmal okedeldaol meng kerkikl meng diak el renges a diak a ngerchelir el orrenges.
A nger er a chad er a keril a bisob a sebechel ochotii a semecheklel a klechad er a chad meng nguu a babier er a kengei el mora templo. Alsekum a chad a diak el oltirakl a llechul a Dios malechub eng diak el ungil selmechokl a klechad er ngii meng semechekill, eng kirel mo chemolt el kmo ngkmal ouuchel er a rengul el kirel a kngtil er a uchei er al nguu a babier er a kengei el mora templo.
Uriul er cheldecheduch el obengkel a bisob, ea president er a stake el mngarngii a dirrek el mo mengedecheduch er kau er a omkedmokl a ruoll er a templo.
A osischakl er a templo a ousbech a okesiul a tekoi
A uchei er a ketengem el mora templo, malechub eng mla betok el bong, eng sebechel ngosukau a obomodengei el kmo a osischakl er a templo a ousbech a okesiul a tekoi. A Rubak, el Mastang el Sensei, a uluusbech er tiang el teletael er al olsischakl.
A templo a kmal ungil skuul Ngblil a omesuub. A chelelleklel a elsel a templo a blechoel di uaisei meng kmal ungil ngarngii a omesubel a dmolech el tekoi er a reng. A mla mad el Elder John A. Widtsoe er a Chelchad er a Teruich me a Terung el Apostol a kmal mle chetengakl el president er a daingaku e mle lodengelii er a beluulechad el ngarbab a skulel. Nguluumerang el kmo a teletael er a elsel a templo a kuoll e mle tang el dung el kmo:
“A ruoll el mekedmokl er a templo a kirel a uldasu er a osebelir a rechad, el mla lolsischakl er a klemengetel a taem a remerreder er a Ikelesia, e omeketakl a tekoi el meringel el bo dodengei. Ngdiak a omelodech er a osischakl er a templo el morrebet er a elsel tiang el klou el uldasu er a osebelir a rechad. Sel dmolech el uldasu er a iiul a omelisiched a tang er a kmal mesisiich el omsodel a klemerang er a ruoll er a templo. E lmuut kung, sel mui el omesubel me a omeketeklel sel uldasu el ngar osischakl a uchul ma omeluluuch er a templo a tang er a kot el bedochel rolel e kede smisiich a omeledked er a cherrengelel a Osischakl” (“Temple Worship,” Utah Genealogical and Historical Magazine, Ongeuang el Buil 1921, 58).
Alsekum e ke mora templo e di meladk el kmo a osischakl a ousbech a okesiul a tekoi, eng diak ko bong el ngar a melemalt el reng er omesuub e mtobed el dimlak el bol cheroid a osengem, ma ka molchesuar el kmo ke mlongeschekl, ma klemedengei er kau el kirel a tekoi er a reng blol klou. Tiang el teletael er a osischakl a kmal cheroid el ungil. Ngmlokrael el mei. Ng Rubak, el Mastang el Sensei, meng ulelsischakl el uaisei er a rurebengkel el di mle blechoel ousbech a okesiul a tekoi—el cheldecheduch el olchotel a suobel el meringel el bo dodengei.
A templo meng ngii a okesiul a teletael. Sel tang el mesang a templo al klebesei, el di kmard a olbdelel rokui, e kede mesang el kmo ngkmal olchaumad el osongel. A blil a Rubak, el ngara kerdel olbidel, el dechor er a ilkolk, a mo bedochel okesiul a klisichel a osischeklel a Jesus Kristo el dechor el olbdelel a beluulechad el rosengang er a ilkolk er a reng.
Sel msiseb er a templo, e ke oitkau er a bilem er a rael e lochang a becheleleu el bail er a templo. Ke oleiuid er kau er elsel a delmerab, el bekel chad a ngarngii a lechang bilir er ngii. Sel de ngara templo e kede kerkikl meng diak de sal olechau mad. Sel moitkau e bechei a bilem er a blil a bail, ke dirrek el di mechei a omeldmek er a beluulechad meng diak el longesang er kau. Sel mtobed er a delmerab el oubail er a becheleleu, e ke mo melchesuar a kltang kau me a rebebil el di osisiu a bilir.
A chebechiil er a templo a kmal klou a ultutelel ruoll er a templo
Tirkei el meladk el mo bechiil er a templo al tang eng sorir el mo medengei el kmo ngerang a mo duubech. Ngdiak dolekoi a tekoi el medung er sel ruoll er a semesemel a chebechiil er a ikrel a templo, ngdi sebeched el ouchais er a teletelel sel delmerab el ngarngii tiang el ruoll el kmo ngklebokel a elsel e kellechakl e kede melchesuar a reng er ngii le edaol ruoll a mekedmokl er a elsel.
A uchei er tirkang el obekel a lebong er a altar e le mesemosem, eng ngerchelel a chad er a templo el odersii el mor tir , me a tir el obekel el nguu a kedeb el omellach. A ikakid a bebil er a tekoi el locha bol renges tirkang el ngeasek el obekel er tiang el belsechel a chebechiilir.
“Elechang el sils e ko mo kaubuch. Kom kora di chemaot er a reng er a chebechiiliu. A templo a mo dechor el olsechelel a ruoll el uai tiang. Kid a diak de ngar tiang el beluulechad. A tekoi er a beluulechad a diak el oureor er tiang e diak el rutech a tekoi el de kedmokl er tiang. Kede mla tuobed er a beluulechad e me dmuu er a templo er a Rubak. Tiang a mocha kot el klou a ultutelel sils er a klechad er kemiu.
“Ko milchell, ko mlokedong el mei er a beluulechad er a demmiu me a delmiu, e tir a kildmeklii a bedengiu el bol kiei er ngii a rengmiu. A dertang er kemiu a mla metecholb. A techolbe elid, el edaol ruoll, a okesiul a omerisu, el okesiul a kodall me a okiis er a kodall, el okesiul a omerollem el mo soiseb er a beches el klengar. Nguldimukl er a kngtil a rengum me a ngbetel a kngtim. Sel sakrament el belsilel a Rubak a omekbeches er a telbiiled er a techolb elid e sebeched a dotireklii, e kede di urrekodel er a ngbetel a kngtid.
“Kau, el sechal, a milchedaol el mora priesthood. A kot e ke mlo meluchel er a Priesthood er a Aaron e locha mlo ra ikei el rokui el obis er ngii—deakon, sensei, me a priest. Esolang eng mlei sel temem el bom klikiid el nguu a priesthood er a Melhisedek Sel priesthood, el ngar bab el priesthood, a ulecholt el oltirakl er sel kot el cheledolel a Dios, malechub eng Edaol Priesthoof el oltirakl er a Sechal Ngelekel a Dios(mesang a Alma 13:18; Helaman 8:18; Doctrine and Covenants 107:2–4). Ke mlo ngara obis er a priesthood. Ke elder er elechang.
“A dertang er kemiu a mla nguu a olisiich er kemiu. Ngar sel olisiich el mngiluu e ngmloterkokl a klisichem el mo cherchar. Ngdi a ikang el rokui, a di, omengedmekliu el mei er a altar e mesemosem el kaubuch el sechal me a redil el mo cherchar. Ko mocha telungalk, mocha mimokl el omechell, e mocharngii a techelliu el omechell er a rengelekiu el mei er a beluulechad e omekeroul e mengeluolu er tir er a klechad, e mesterir el mei er a tang er a klebesei el uai kemiu el me teloi er a edaol ruoll er a templo.
“Ngdi mle kemiu el somiu el mei e meteriter el klikiid. Sel mkengei el soiseb er a telbiil er a chebechiil a kmal klou el ngerachel, el ngii a uchul a klou el klengeltengat el kmal diak el ngesonges.”
A klisiich er a omelmosem a melmosem er a beluulehad me a babeluades
Alsekum eng soad el momedengelii a reksi me a blechebechel a ureor er a templo, eng kired el mo medengei el kmo ngerang a klisiich er a omelmosem. Ngkesengil , eng kired el sebeched el mesang el kmo ngerang a uchul ma llemeltel a usbechel a klisiich er a omelmosem a klou a ultutelel.
A Jesus ser al mei er a tkul a beluu er a Caesarea Philippi, nguleker er a rulebengkel el kmo, a rechad te kmo ngak el ngelekel a chad ak techang? …
“Me a Simon Petrus a ulnger el kmo, Kau a Kristo, el Sechal Ngelekel a ngar el Dios.
“Me a Jesus a ulnger e dulang er ngii el kmo, Ke kmal ngeltengat, e Simon Bar-jona: le tech me a rasech a dimlak el ochotii tiang er kau, ngbai Demak el Ngii a ngar babeluades.
“E Ak kuuchais er kau el kmo, Kau a Petrus, ea bebul tiang el bad a boku decherur a ikelesia er ngak er ngii; ea euatelel a beluu er a ngau a diak el sebechel mtekengii.
“E ngak a mo meskau a kisel a rengedel babeluades: me a ngii dil ngerang el semesemii er a beluulechad a mesemosem er babeluades: ea ngii dil ngerang el mkedekedii er a beluulechad a mekedoked er babeluades” (Mateus 16:13, 16–19).
A Petrus a ulab a ikang el kiis. A Petrus a ulebang a klisiich el melemosem, sel llemeltel el obang a klisiich el melemosem er a beluulechad malechub eng mengedoked er a beluulechad eng mo uaisei er babeluades. A ikang a kisel a President er a Ikelesia—ngkel profet, e omes e dirrek el olecholt. Tiang el edaol klisiich el melemosem a ngara Ikelesia er elechang. Ngdiak a ngodech el tekoi el lmuut el edaol er a omeledkir tirkei el medengei el kmo ngklou a belkul tiang el klisiich. Ngdiak a lluut el mesisiich el urrekodel er ngii. Te di mekesai el chad a mla moterkokl er tir tiang e klisiich el melemosem er a beluulechad er a ngii dil taem—a elsel a bekel templo a rodam el mla mong er tir a klisiich el melemosem. Ngdiak a ngodech el sebechel a chad el nguu er ngii ngdi ngkel profet, el omes, e olecholt e President er a Ikelesia er a Jesus Kristo er a Uriul-klebesei el Santo.
A Profet Joseph Smith a mle blechoel loker ngii el kmo “‘Ngdiak el sebeched el suobel e diak doruul a ikang el betok el ruoll?’A nger er ngak, a Ngdiak, ngdiak el sel mui el osebelel a chad. A Jesus a dilung el kmo, ‘Ngbetok a delmerab er a blil a Demak, ak mo kudmeklii a basio el kiriu.’ [Mesang a Johanes 14:2.] A blaiel llechukl er tiang a mle kirel moiuid el renged; ea ngii dil chad el mongeschekel el mor sel kot el ngar bab el blai a kirel oltirakl a llechul a celesstial, e sel cherrengelel rokir” (ngara History of the Church, 6:184).
A ureor er a templo a uchul a klisiich er a reng
A templo a sel kmal uchul a klisichel a reng er a Ikelesia. Ngsebeched el mesang a cherarou el melasem el mengesang er kid el Ikelesia me a dertang er kid sel bo doruul a ikang el edaol e ulekrael ureor. A ureor er a templo a kmal klou a ultekengel eleng uchul a klou el klisichel a reng el mor a reSanto er a Uriul-klebesei me a Ikelesia el rokir.
Ser a omengedaol er a okedecherul sel kot el saus er a Templo er a Logan Utah, President George Q. Cannon, el mle ngara First Presidency, a dillii tiang:
“A bekel bad a mokedechor el mo saus er a templo me a bekel templo a mokedechor el oltirakl er a teletelel el Rubak a ulchotii el mora edaol el Priesthood er Ngii, a oitechetur a klisichel a Diablong er a beluulechad, e dirrek el kilungii a klisichel a Dios me a KleDios, e mo melmesim er a babeluades el obang a klou klisiich el omtechei er kid, e ochau a klengeltengat er a Diak a Ulebengelel Demad el mei er kid, me a tirkei el chemau Ngii” (ngara “The Logan Temple,” Millennial Star, Nov. 12, 1877, 743).
A rechedal a Ikelesia sel bol ouedikel a rengrir malechub e te mo chemau a chetituokel tekoi, e te kmal mora templo. Ngkmal ungil olsechelel a mengesang er a rengud el tekoi. Sel de ngara templo eng morngii a osenged er a reng er a tekoi. Sel de ngarngii er a belsechel a omeluluuch, e kid a mo “ultobed er a beluulechad.”
Sel bebil ea uldesued a di mo meseked er a betok el cheliseksikt el tekoi meng di mo diak el mededaes a uldesued e di mo mengab a osenged. A dengara templo a ikei el mengerechar er a uldesued a kora di mo kiei, me a chetchat a kora di suebek, meng kora di mo meiusech a osenged ea rael el ochib a olibesongel el dimlak desang er a uchei a kora di mo keltukl.
A Rubak a mo omekngeltengat er kid sel deruul a edaol ruoll el kedmekill er a templo. A klengeltengat a diak dil kirel a urered er a templo. Kede mukngeltengat er a rokui el tekoi el dechau.
A urered er a elsel a templo a euateled el mengeluolu er kid
Ngdiak a ureor el lmuut el mesisiich el euatelel a Ikelesia er a ureor er a templo me a omelchesel a reksi er a telungalk el oltekau er ngii. Ngdiak a ngodech el ureor el lmuut el mesisiich el omiich er a reng. Ngdiak a ngodech el ureor el meskid a lmuut el klou el klisiich. Ngdiak a ngodech el ureor el ultuil er a lmuut el melemalt el semecheklel a klechad.
A urered er a templo a euateled el mengeluolu er a dertang er kid me a kid el rokui el dmak el tang el chad.
Me mei er a templo—e mngai a ikei el kirel klengeltengat el kirem. Ng edaol ureor.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a Visiting Teaching Message, October 2010. Palauan. 09370 881