Thawj Pawg Thawj Tswj Hwm tsab Xov, Kaum Ib Hlis Ntuj 2010
Kev Ris Txiaj Yog qhov Khoom Plig uas Los Saum Ntuj Los
Yuav muaj kev ris txiaj … thaum uas peb ua peb Leej Txiv Saum Ntuj Ceeb Tsheej tsaug rau Nws tej koob hmoov thiab ua cov neeg uas nyob ntawm peb ib ncig tsaug rau txhua yam uas lawv ua rau peb hauv lub neej no.
Tuas no mas zoo kawg nkaus. Thaum kuv raug tsa ua tus Thawj Tswj Hwm ntawm lub Koom Txoos, kuv hais tias, “Kuv yuav tseg ib txoj hauj lwm rau kuv tus kheej ua. Kuv yuav ua tus uas tawm tswv yim pab Tsev Kheej pawg Hu Nkauj.” Kuv zoo siab heev txog kuv pawg hu nkauj no!
Muaj ib zaug kuv niam hais rau kuv hais tias, “Tommy, kuv zoo siab txog tag nrho txhua yam uas koj tau ua lawm. Tiam sis kuv xav hais ib qho rau koj. Kheev lam koj tau yeej meem xyaum ntaus nkauj.”
Ces kuv mus zaum rau ntawm lub phias ab naum thiab ntaus ib zaj nkauj rau nws: “Cia peb mus, [cia peb mus] koom ib lub rooj kev lom zem rau hnub yug.”1 Ces kuv hnia nws ib pas rau ntawm nws lub hauv pliaj, thiab nws khawm kuv.
Kuv xav txog kuv niam. Kuv xav txog kuv txiv. Kuv xav txog tag nrho cov Tuam Thawj Coj uas tau pab qhuab qhia kuv, thiab lwm tus neeg, suav cov poj ntsuam uas kuv tau mus xyuas ntshawv ntshis—85 tug tag nrho—nqa ib tug qaib mus rau lawv ci, los yog nqa me ntsis nyiaj mus muab pub rau lawv siv.
Nag hmo kuv mus xyuas ib tug poj ntsuam thiab. Twb yog ib tag hmo, thiab kuv mus tom lub tsev laus, thiab tus neeg txais tos qhua hais tias, “Tej zaum nws tsaug zog lawm tiag, tiam sis nws hais kom kuv tsa nws sawv, vim nws hais tias, ‘Kuv paub tias nws yuav tuaj xyuas kuv.’”
Kuv tuav nws txhais tes; nws hu kuv lub npe. Nws twb tsis tsaug zog lawm. Nws muab kuv txhais tes twb rau nws ob daim di ncauj thiab hais tias, “Kuv paub tias koj yuav tuaj tiag.” Kuv yuav ua li cas tsis tuaj li?
Tej nkauj zoo kawg kuj tshoov kuv lub siab ib yam nkaus li ntawd.
Kuv cov kwv tij thiab cov muam, peb twb hnov tej zaj xov txog qhov tseeb, kev cia siab, thiab kev hlub. Peb twb tig peb tej kev xav mus rau Nws tus uas tau theej peb lub txhoj, tus uas tau ua yam ntxwv rau peb saib seb yuav ua neeg zoo li cas thiab yuav thov Vajtswv li cas, thiab tau qhia los ntawm tej yam Nws ua hais tias kev pab lwm tus neeg yog ib txoj koob hmoov—twb yog peb tus Cawm Seej thiab tus Tswv, Yexus Khetos.
Nyob hauv phau Lukas, tshooj 17, peb nyeem ntawv txog Nws hais tias:
“Thaum Yexus mus nram lub nroog Yeluxalees, nws hla lub xeev Kalilais mus.
“Thaum nws tab tom yuav mus rau hauv ib lub zos, [nws ntsib] kaum tus mob ruas. Lawv sawv deb deb,
“Thiab hu nrov nrov hais tias, ‘Tswv Yexus! Thov koj hlub peb!’
“Thaum Yexus pom dheev lawv, nws hais rau lawv hais tias, Nej cia li mus cuag cov pov thawj kom lawv saib nej. Thaum cov neeg mob ruas ntawd tab tom mus, lawv tej ruas twb zoo lawm.
“Lawv cov ntawd muaj ib tug pom hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug.
“Nws txhos caug ntua ntawm Yexus ko taw ua Yexus tsaug. Tus ntawd yog neeg Xamalis.
“Yexus hais tias, ‘Kaum leej twb zoo huv tib si lawm? cuaj leeg dua twg tas lawm?
“‘Vim li cas tsuas muaj tib leeg uas yog lwm haiv neeg los ua Vajtswv tsaug xwb?’
“Thiab Yexus hais rau tus ntawd hais tias, Koj cia li sawv mus tsev; koj txoj kev ntseeg twb ua rau koj tej ruas zoo lawm.”2
Dhau los ntawm lub ntuj txoj kev pab, cov neeg mob ruas thiaj dim txoj kev tuag thiab tau txoj sia tshiab. Ib tug los ua tus Xib Hwb tsaug nws thiaj tau koob hmoov, es cuaj leej tsis muaj kev ris txiaj ua rau Nws poob siab.
Kuv cov kwv txij cov muam, peb puas nco qab ua Vajtswv tsaug rau tej koob hmoov uas peb txais? Txoj kev ris txiaj tiag tsis yog pab peb nco qab txog peb tej koob hmoov xwb, tiam sis qhov ntawd qhib lub ntuj ceeb tsheej thiab pab peb hnov Vajtswv txoj kev hlub.
Kuv tus phooj ywg uas kuv hlub Thawj Tswj Hwm Gordon B. Hinckley hais tias, “Thaum nej muaj kev ris txiaj, nej tsis muaj kev khav theeb thiab kev muab hlob thiab kev saib yus tus kheej siab heev; nej tsuas muaj tus ntsuj plig uas muaj kev ris txiaj uas ua rau nej ua neeg ntxim nyiam thiab yuav foom koob hmoov rau nej lub neej.”3
Nyob hauv Phau Vaj Lug Kub Npaiv Npaum hauv phau Mathais, peb nyeem ib zag dab neeg ntxiv txog kev ris txiaj, lub sij hawm no yog tus Cawm Seej txoj kev ua Vajtswv tsaug. Thaum Nws taug kev peb hnub hauv roob moj sab qhua, muaj coob tshaj 4,000 neeg uas raws qab thiab nrog Nws taug kev. Nws hlub lawv heev, vim lawv tsis tau mov noj rau peb hnub ntawd. Tiam sis Nws cov thwj tim nug hais tias, “Ntawm no yog roob moj sab qhua xwb, peb yuav mus nrhiav mov qhov twg los kom txaus cov neeg no noj?” Zoo li peb sawv daws feem coob, cov thwj tim tsuas pom qhov uas lawv tsis muaj lawm xwb.
“Yexus nug cov thwj tim hais tias, Nej muaj pes tsawg lub ncuav? [Cov thwj tim] teb hais tias, Peb muaj xya lub ncuav thiab ob peb tug ntses me me xwb.
“Yexus hais kom sawv daws zaum hauv av.
“Ces nws txawm muab xya lub ncuav thiab cov ntses ntawd los ua Vajtswv tsaug, thiab muab ntais cev rau cov thwj tim; cov thwj tim coj mus faib rau sawv daws noj.”
Nco qab ntsoov pom hais tias tus Cawm Seej ua Vajtswv tsaug rau tej yam uas lawv muaj—thiab txawm muaj ib qho txuj ci loj: “Txhua tus puav leej tau noj tsau huv tib si. Cov thwj tim mus sau cov ncuav seem uas sawv daws noj tsis tas, tau xya tawb puv nkaus.”4
Peb sawv daws twb pom muaj tej lub sij hawm thaum peb tsuas xav txog tej yam uas peb tsis muaj, es tsis nco qab txog peb tej koob hmoov. Tus neeg Kilis Epictetus hais paj lug hais tias, “Tus neeg txawj ntse yog tus neeg uas tsis tu siab rau tej yam uas nws tsis muaj, tiam sis zoo siab rau tej yam uas nws muaj xwb.”5
Kev ris txiaj yog ib txoj ntsiab cai uas los saum ntuj los. Tus Tswv tshaj tawm, dhau ntawm kev tshwm sim rau tus Yaj Saub Yauxej Xamiv, hais tias:
“Nej yuav tsum ua tus Tswv nej tus Vajtswv tsaug txog txhua yam. …
“Thiab tsis muaj ib yam dab tsi uas tub qaug Vajtswv, los sis yuav ua rau Nws npau taws, npaum li cov uas tsis lees paub tias nws pab lawv ua txhua yam.”6
Nyob hauv Phau Ntawv Maumoos peb kawm hais tias peb yuav tsum “ua neej nyob hauv txoj kev ua tsaug txhua hnub, vim tej kev hlub tshua thiab tej koob hmoov ntau uas Vajtswv tau muab rau nej.”7
Txawm peb ua neej nyob li cas los xij, peb txhua tus muaj ntau yam uas peb yuav tsum muaj kev ris txiaj yog tias peb yuav nres ib pliag thiab xav txog peb tej koob hmoov.
Nov yog ib lub caij zoo heev los nyob hauv ntiaj teb no. Txawm tias niaj hnub no muaj ntau yam phem hauv ntiaj teb no los, tseem muaj ntau yam ncaj thiab zoo thiab. Muaj tej kev sib yuav uas kav ntev mus, niam thiab txiv uas hlub lawv cov me nyuam thiab txi ntau yam rau lawv, cov phooj cov ywg uas hlub peb thiab pab peb, cov nais khu uas qhia peb. Peb lub neej muaj ntau yam koob hmoov uas suav tsis txheeb.
Peb txhawb nqa tau peb tus kheej, thiab lwm tus neeg, thaum peb tsis kam pheej xav txog tej yam phem thiab kho peb tej siab tej ntsws kom ris Vajtswv txiaj tas mus li. Yog tias txoj kev tsis muaj kev ris txiaj yog ib txoj kev txhaum loj heev, ces kev ris txiaj thiaj yog ib qho kev tsim txiaj zoo tshaj plaws thiab. Muaj ib tug neeg uas hais tias, “kev ris txiaj tsis yog ib qho tseem ceeb tshaj ntawm tej kev tsim txiaj xwb, tiam sis yog lub hauv paus rau txhua yam kev tsim txiaj tiag.”8
Peb yuav ua li cas thiaj coj kom haj yam muaj kev ris txiaj hauv peb lub siab? Thawj Tswj Hwm Joseph F. Smith, tus Thawj Tswj Hwm thib rau ntawm lub Koom Txoos, tau teb lo lus nug ntawd. Nws hais tias, “Tus neeg ris txiaj pom ntau yam hauv ntiaj teb no uas nws xav ua Vajtswv tsaug rau, thiab nws pom muaj tej yam zoo ntau tshaj tej yam phem. Kev hlub kov yeej kev khib siab, thiab qhov kaj tshem kev tsaus ntuj tawm ntawm lub neej no mus.” Nws hais txuas ntxiv mus hais tias, “Kev khav txiv ua rau peb txoj kev ris txiaj puas tsuaj mus thiab tsuas ua rau peb ua neeg qias dub. Peb haj yam muaj kev zoo siab thaum peb nyob ze ib tug neeg uas muaj kev ris txiaj thiab hlub yus, thiab peb yuav tsum ua tib zoo thov Vajtswv hauv peb lub neej xwv kom peb thiaj yuav ua tau Vajtswv thiab tib neeg tsaug!”9
Thawj Tswj Hwm Smith tab tom qhia peb tias kev thov Vajtswv tsis tu tsis tseg yog tus yuam sij uas ua rau peb muaj kev ris txiaj.
Tej yam khoom ntiaj teb puas ua rau peb zoo siab thiab muaj kev ris txiaj? Tej zaum rau ib nyuag ntu xwb. Tiam sis, tej yam uas ua rau peb muaj kev zoo siab thiab kev ris txiaj uas kav ntev mus yog tej yam uas nyiaj txiag yuav tsis tau: xws li peb tsev neeg, txoj moo zoo, cov phooj ywg zoo, peb txoj kev noj qab nyob zoo, peb tej kev txawj, txoj kev hlub uas lwm tus neeg muab rau peb. Ntxim tu siab kawg, vim feem ntau mas peb tsis nco qab ua Vajtswv tsaug rau tej yam no.
Tus kws sau ntawv uas tuaj As Kiv teb tuaj hu ua Aldous Huxley tau sau hais tias, “Yuav luag txhua tus neeg muaj cuab kav tsis nco qab ua Vajtswv tsaug rau tej yam uas nws tau lawm.”10
Feem ntau peb tsis tshua nco qab txog cov neeg uas tiag tiag mas peb yuav tsum ris txiaj ntau tshaj plaws. Cia peb tsis txhob tos txog thaum lig lawm es peb mam li qhia lawv tias peb ris lawv txiaj. Hais txog cov neeg uas twb tso lub neej no tseg lawm, ib tug poj niam qhia nws txoj kev tu siab thaum nws hais tias: “Kuv nco qab tej lub caij muaj kev zoo siab thiab muaj ntau zaus uas kuv xav qhia kuv txoj kev ris txiaj rau cov neeg uas twb tuag lawm, tiag tiag lawv yuav tsum tau hnov tej lus ntawd thaum lawv tseem ua neej nyob.”11
Txoj kev xiam ib tug neeg uas peb hlub yeej ua rau peb tu siab me ntsis. Peb yuav tsis tu siab ntau npaud yog tias peb niaj hnub qhia lawv tias peb hlub lawv thiab ris lawv txiaj. Peb yeej tsis paub thaum twg thiaj yuav lig lawm.
Yog li ntawd, yuav muaj kev ris txiaj thaum uas peb ua peb Leej Txiv Saum Ntuj Ceeb Tsheej tsaug rau Nws tej koob hmoov thiab ua cov neeg uas nyob ntawm peb ib ncig tsaug rau txhua yam uas lawv ua rau peb hauv lub neej no. Yuav tsum rau siab ntso ua—mus txog rau thaum peb twb kawm tau thiab txawj muaj kev ris txiaj tiag. Feem ntau peb yeej ris lwm tus neeg txiaj thiab xav hais tias peb yuav ua tus ntawd tsaug, tiam sis tsis nco qab los sis pheej tsis hais xwb Muaj ib tug neeg uas hais tias “qhov uas ris lwm tus neeg txiaj es tsis hais qhia tawm rau tus neeg ntawd yeej zoo ib yam li qhov uas muab ib qho khoom plig qhwv cia es tsis muab pub rau leej twg li.”12
Thaum twg peb muaj kev cov nyom thiab teeb meem hauv peb lub neej, feem ntau mas nyuaj nyuaj rau peb xav txog peb tej koob hmoov. Tiam sis, yog peb sib zog thiab nrhiav kom tau, peb yeej yuav to taub thiab pom hais tias peb twb txais tau ntau yam lawm tiag.
Kuv xav qhia nej txog ib yim neeg uas nrhiav tau tej koob hmoov ntau, txawm tias lawv raug teeb meem ntau heev. Nov yog ib zaj kuv tau nyeem ntau xyoo tas los lawm thiab tau muab khaws cia vim nws qhia ib zaj xov zoo. Tus kws sau yog Gordon Green thiab nws zaj no yog luam tawm hauv Teb Chaw Amelikas ib phau ntawv xov xwm li 50 xyoo tas los lawm.
Gordon piav tias nws loj hlob tuaj hauv ib thaj teb pem Canada teb, nws thiab nws cov kwv tij cov muam tau lawb ntawv thiab khiav tiaj loos los tsev thaum lwm cov me nyuam mus ua si thiab ua luam dej. Tiam sis, lawv txiv txawj pab lawv to taub tias tej hauj lwm uas lawv ua yuav pab tau lawv li cas. Qhov no haj yam tseem ceeb thaum txog lub caij mus sau qoob loo, thaum lawv tsev neeg ua koob tsheej nco txog hnub Thanksgiving, vim hnub ntawd lawv txiv tau muab ib qho khoom plig zoo kawg rau lawv. Nws ntsuam xyuas seb lawv muaj khoom npaum li cas.
Hnub Thanksgiving yav sawv ntxov, nws coj lawv mus rau hauv chav khaws zaub mov cia es lawv pom tej thoob txiv av paum, qos liab, lauj pwm liab hauv cov av xuab zeb, pom tej pawg qos yaj ywm, thiab muaj cov taum mog, pob kws, taum lag, kua txiv hmab pleev khob cij, txiv pos nphuab thiab lwm yam khoom txawb rau saum cov txee yam puv nkaus li. Nws kom cov me nyuam ua tib zoo suav txhua yam. Ces lawv txawm mus rau hauv lub nkuaj tsiaj txhu thiab xyuas seb lawv twb khaws tau cov zaub nyuj ntau npaum li cas thiab xyuas seb muaj tej hnab nplej ntau npaum li cas hauv lub txhab nplej. Lawv tau suav cov nyuj, cov npua, cov qaib, cov qaib ntxhw, thiab cov os. Lawv txiv hais tias nws xav paub seb lawv nyob li cas, tiam sis nws xav kom lawv paub tias thaum ua rooj mov noj ntawd, Vajtswv twb foom koob hmoov rau lawv ntau npaum li cas lawm thiab nws pom zoo rau lawv tej hauj lwm lawm. Thaum kawg, thaum lawv zaum yuav noj pluas mov uas lawv niam tau ua lawm, lawv thiaj paub zoo txog lawv tej koob hmoov.
Tiam sis, Gordon qhia tias hnub Thanksgiving uas nws muaj kev ris txiaj ntau tshaj plaws yog xyoo uas zoo nkaus li lawv tsis muaj dab tsi yuav ua Vajtswv tsaug txog.
Thaum lub xyoo pib ntawd zoo li txhua yam yeej yuav zoo: lawv tseem tshuav cov zaub nyuj, muaj noob nplej ntau ntau, plaub tug me nyuam npua; thiab lawv txiv twb tseg me ntsis nyiaj xwv kom lawv yuav tau lub tshuab hlais zaub nyuj—yog ib lub tshuab zoo heev uas lwm cov neeg ua liaj ua teb feem coob yuav ua npau suav txog xwb. Xyoo ntawd lawv lub zos tau pib txuas tej xov hluav taws xob thiab—tab sis mas lawv lub tsev tseem tsis tau muaj, vim lawv tsis muaj nyiaj txaus yuav hluav taws xob.
Muaj ib hmo Gordon niam tab tom ntxhua ris tsho, es Gordon txiv los pab ntxhua ris tsho thiab tau hais kom nws tus poj niam mus so thiab xaws paj ntaub me ntsis. Nws hais tias, “Koj siv sij hawm ntxhua ris tsho ntau dua koj siv tsaug zog. Es koj puas xav tias peb yuav tsum txuas hluav taws xob?” Txawm tias qhov ntawd ua rau tus niam zoo siab los, nws los kua muag vim nws paub hais tias yog tias nkawd ua li ntawd ces, nws tus txiv yuav yuav lub tshuab hlais zaub nyuj tsis tau.
Ces lawv thiaj tau txuas txoj xov hluav taws xob xyoo ntawd. Txawm tsis yog ib yam loj heev, lawv twb yuav tau ib lub tshuab ntxhua ris tsho uas ntxhua tau tej ris tsho tag ib hnub thiab tej teeb uas dai ncuv ntawm lub qab nthab rau lawv sawv daws pom tau kev. Tsis tas txhab roj rau tej teeb roj, tsis tas yim cov teeb xeeb, thiab tsis tas txhuam qhov chaw tso pa hluav taws lawm. Lawv txawm muab cov teeb roj tso cia.
Qhov uas lawv thaj teb txuas tau hluav taws xob lawm yog yam zoo kawg uas muaj los rau lawv xyoo ntawd. Thaum lawv tej qoob loo tab tom ncau tawm hauv av los, lub ntuj pib los nag hlob heev. Thaum cov dej ntws mus tas lawm, tsis tshuav ib hom qoob loo qhov twg hlo li. Lawv rov qab cog qoob loo dua ib zaug, tiam sis tseem los nag hlob heev es ua rau txhua yam puas tsuaj mus xwb. Lawv cov qos yaj ywm lwj tas hauv cov av nkos. Lawv muab lawv ob peb tug nyuj thiab txhua tus npua thiab lwm yam tsiaj txhu uas tiag tiag lawv xav khaws cia muag lawm, es muab muag pheej yig xwb vim sawv daws tau ua tib yam li ntawd thiab. Xyoo ntawd lawv tsuas sau tau ib co zaub uas ntug hauv paus uas tseem ciaj txawm los nag hlob heev.
Twb rov qab txog hnub Thanksgiving dua. Lawv niam hais tias, “Tej zaum xyoo no cia li kav liam xwb. Peb twb tsis tshuav ib tug os hlo li.”
Tiam sis, Hnub Thanksgiving yav sawv ntxov, Gordon txiv twb mus tua tau ib tug luav thiab hais kom Gordon niam ua mov rau lawv noj. Gordon niam txawm pib ci nqaij, es hais tias yuav siv sij hawm ntev heev ci cov nqaij luav tawv tawv ntawd. Thaum lawv pib noj cov nqaij luav ntawd ntxuag ib co zaub uas ntug hauv paus, cov me nyuam twb tsis kam noj. Gordon niam txawm quaj quaj, ces nws txiv txawm ua ib yam txawv txawv. Nws txawm mus saum nthab thiab muab ib lub teeb roj, es muab tso rau ntawm lub rooj noj mov thiab tau taws teeb. Nws hais kom cov me nyuam mus tua cov teeb hluav taws xob. Thaum tsuas muaj lub teeb roj xwb, lawv xav tsis thoob vim chav tsev ntawd tsaus ntuj heev. Lawv tsis paub hais tias lawv tau ua li cas thiaj pom tau kev ua ntej muaj teeb hluav taws xob.
Lawv foom koob hmoov rau cov khoom noj, thiab sawv daws tau noj. Thaum noj hmo tas, sawv daws zaum ntsiag tos. Gordon sau hais tias:
“Thaum ua siab mos siab muag zaum ntawm lub teeb roj uas tsaus tsaus ntawd peb thiaj tau pom kev khav dua ib zaug ntxiv. …
“Yog ib pluag mov qab heev. Tus luav yeej qab li qaib ntxhw, thiab cov zaub uas ntug hauv paus yeej qab tshaj txhua yam uas peb tau noj dua. …
“… [Peb] lub tsev … , txawm tsis zoo tag nrho, yeej muaj txhua yam uas peb xav tau.”13
Kuv cov kwv tij thiab cov muam, txoj kev ris lwm tus txiaj yog ib yam zoo thiab ntxim qhuas; txoj kev ris lwm tus txiaj yog kev ua siab loj thiab dav; tiam sis yog yus ua neej nyob muaj kev ris txiaj hauv peb lub siab tas li yuav ua rau peb txais tau lub ntuj ceeb tsheej.
Tag kis no thaum kuv xaus kuv cov lus, kuv thov Vajtswv kom txawm peb ris Vajtswv txiaj ntau npaum li cas rau txhua yam uas peb muaj, thov kom peb yuav qhia peb tus Tswv thiab tus Cawm Seej, Yexus Khetos, saib peb ris nws txiaj npaum li cas. Nws txoj moo zoo teb tej lo lus nug tseem ceeb tshaj plaws hauv lub neej no hais tias: Peb tuaj qhov twg tuaj? Vim li cas peb thiaj los nyob hauv no? Peb cov ntsuj plig mus qhov twg thaum peb tuag lawm? Txoj moo zoo coj qhov kaj uas yog qhov tseeb los rau rau cov neeg uas nyob hauv kev tsaus ntuj nti.
Nws qhia peb tias peb yuav tsum thov Vajtswv li cas. Nws qhia peb tias peb yuav tsum ua neeg zoo li cas. Nws qhia peb tias peb yuav tsum tso lub neej no tseg li cas. Nws lub neej qhia txog txoj kev hlub tag nrho. Nws tau kho cov neeg uas muaj mob; Nws txhawb nqa cov uas poob siab; Nws cawm tau tus neeg uas ua txhaum dim.
Thaum kawg, Nws nyob Nws ib leeg xwb. Ib txhia Thwj Tim ua xyem xyav; ib tug tau ntxeev siab rau Nws. Cov tub rog Loos tau siv hmuv nkaug nws sab tav. Cov neeg siab phem tau tua Nws pov tseg. Tiam sis tseem hnov Nws cov lus zoo los ntawm lub Rooj Khauj Khaum Taub Hau uas hais tias, “Txiv, thov koj zam txim rau lawv! Rau qhov lawv tsis paub hais tias lawv ua dab tsi.”14
Tus neeg uas “muaj kev nyuaj siab, … thiab paub txog kev tu siab” yog leej twg?15 Tus “Vaj Ntxwv ntawm yeeb koob,”16 no, tus Tswv uas loj dua lwm tus tswv no yog leej twg? Nws yog peb tus Xib Hwb. Nws yog peb tus Cawm Seej. Nws yog Vajtswv Leej Tub. Nws yog tus uas muab kev cawm dim rau peb. Nws hu hais tias, “Cia li nrog kuv mus.”17 Nws txib hais tias, “Cia li mus ua ib yam li ntawd.”18 Nws taij thov peb hais tias, “Ua raws li kuv cov lus txib.”19
Cia peb raws Nws qab. Cia peb yoog Nws tus yam ntxwv. Cia peb mloog Nws lus. Thaum ua li no, peb thiaj muab tau qhov khoom plig pub rau Nws uas yog ris Nws txiaj.
Kuv ua ib siab thov Vajtswv kom peb yuav ua neej nyob xwv kom sawv daws yuav pom hais tias peb ris Vajtswv txiaj ntau npaum li cas. Thov kom kev ris txiaj yuav tog mus hauv peb lub nruab siab, tam sim no thiab tas mus ib txhis. Los ntawm Yexus Khetos lub npe dawb ceev, amees.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais First Presidency Message, November 2010. Hmong. 09371 295