Naan in Katak an Kōrā ro, Nobōm̧ba 2010
Kōn Men ko Reļļap tata Tokjāer
Eļan̄n̄e mour im emōkaj kar kōmalūti im eļōn̄ inepata ko kar eppen n̄an eok n̄an en̄jaake āinwōt lan̄lōn̄, innām bōlen kiiō ej juōn iien em̧m̧an n̄an bar pedped wōt ioon ta ko reļaptata tokjāer.
Ekabwilōn̄lōn̄ jon̄an wāween ad maron̄ katak kōn mour jān katak kōn mejatoto. N̄an waanjon̄ak, rimālōtlōt ro remaron̄ reiļok n̄an doulul in wōjke ko im kōm̧m̧ane jeļāļo̧kjeņ in kajidede ko kōn mejatoto im wāween eddōk jibuki im barāinwōt taujin iiō remo̧o̧tļo̧k. Juōn iaan men ko jaar ekkatak jān ad katak kōn an wōjke eddōk ej ilo iien jijen ko n̄e wāween ko rej weppān, wōjke ko rej eddōk ilo juōn jon̄an em̧m̧an. Ijowōtke, ilo tōren jijen ko ijo wāween kaddōk ko rejjab weppān, wōjke ko erum̧wij aer eddōk im leļok aer kajoor n̄an m̧ōttan ko raorōk aikuji n̄an mour.
Ilo jekjek in komaron̄ kōlmenļo̧kjeņ, “Bwe aolep relukkuun em̧m̧an im jim̧we bōtaab ta eo an ļok ilo kattōre juōn baluun?” Ekwe, kōtļok bew in jiron̄ eok.
Em̧ōj ke am uwe ilo juōn baluun im en̄jake aen̄wāwā? Jorrāān eo eļaptata an aen̄wāwā ej jidimkij in oktak ilo m̧akūtkūt in mejatoto ekōm̧m̧an bwe waan keļok eo mejatoto en walōn̄ wanlal, ilo̧k turājet n̄an turājet, im ekōm̧m̧an an juōn pā wanlōn̄ wanlaļ. Ilo tōreo baluun ko rej ejaake n̄an jeļm̧ae aen̄wāwā ko reļļapļok jān men otemjej komaron̄ iiooni ilo juōn ekkake kōm̧m̧an iien otemjej, emaron̄ kainepataik bajinjea ro.
Ta eo kwoj ļōmņak pailōt ro rej aikuj kōm̧m̧ane n̄e rej iioon aen̄wāwā? Juōn rikatak pailōt emaron̄ ļōmņak bwe kōlapļo̧k jon̄an ej kapeel ak karōk em̧m̧an kōnke enaaj m̧ōkaj an bōkļok er jān aen̄wāwā eo. Bōtaab emaron̄ juōn men ebōd n̄an kōm̧m̧an. Pailōt ro retijem̧ļo̧k remeļeļe bwe ewōr jon̄an em̧m̧an n̄an em̧m̧akūt jān aen̄wāwā eo me enaaj kadikļok lakpokpok ko an aen̄wāwā in. Im enan̄in aolepen iien eo emaron̄ meļeļein kadikļok jon̄an eo am. Pedped eo ebarāinwōt eiokļo̧k n̄an ekkaj ko ilo iaļ.
Kōn menin, ej juōn rejan̄ em̧m̧an n̄an kadikdikļok jidik, etaļ in wōt juōn ilo iaļ eo, im pedped wōt ioon men ko raorōk n̄e ioon jorrāān ko rekauwōtata.
Bun̄tōn Mour ilo Raan Kein
En̄in ej juōn katak epidodo ak kauwōtata n̄an ekkatak. Emaron̄ alikkar an meļeļe n̄e likūt ilo kwaļo̧k kōjerbal naan ko kōn wōjke ak aen̄wāwā bōtaab ekabwilōn̄lōn̄ wāween an pidodo kōjekdoon katakin n̄e ej itok n̄an bōk pedped kein ilo mour ko ad raan otemjej. N̄e jon̄an inepata ko rej ļapļo̧k, n̄e inepata ej waļo̧k, n̄e jorrāān ubrar, barāinwōt emmakijkij ad kajjion̄ kōjerbal ejja bun̄tōn eo wōt ak kōlapļok jon̄an, lōmņake jet wāween me ej kōmōkajļok im kōlapļo̧k bun̄tōn eo ad, em̧m̧an ad naaj pād.
Juōn iaan kadkadin mour ad rainin ealikkar bwe jej em̧m̧akūt ilo jon̄an eo ej lapļo̧k, ekūtpuuj aen̄wāwā ak menin apan̄ ko.
Kōtļo̧k bwe jen m̧ool, emaron̄ pidodo n̄an boub. Kōj aolep jemaron̄ ļōmņak juōn laajrak in jerbal ko me renaaj kōkajoorļok jikujuul eo ad. Jet remaron̄ lo̧mņak bwe aer aorōk pedped ioon aitokan aer laajrake jerbal ko im̧wwe juōn emaron̄ kōtōbrake. Rej kobrak iien ko aer kōn laajrak in kweiļok ko im men ko edik aer aorōk—men̄e ilo iien inepata ko im iien mōk ko. Kōnke rejjab aikuj kabōk mour ko aer, emmakijkij aer en̄jake eļapļok inepata, kapidik ļo̧k lan̄lōn̄, im ebarāinwōt dik en̄jake meļeļein ilo mour ko aer.
Ej bar bwe jabdewōt wānōk, n̄e bōkļo̧k n̄an kōļapļoke emaron̄ erom̧ juon jerawiwi nana. Kalōn̄ļo̧k jikejuul in raan ko ad emaron̄ m̧ool ekkar n̄an menin. Ej itok juōn wunin kōnono ijo tōprak ko remaron̄ erom̧ kabbeerer ko kōttōpar ko remaron̄ erom̧ menin bōbrae.
Ta Uwaak eo?
Meļeļe eo emālōtlōt im bōke katak ko an doulul in wōjke ko im aen̄wāwā imejatoto. Rej jumae kapo ko n̄an ekairir ko en̄jaki an mour aolep raan. Rej ļoor rōjan̄ eo, “Eļōn̄ļo̧k n̄an mour jān kōļapļo̧k jon̄an.”1 Ilo tukaduin. Rej pedped ioon men ko me eļaptata tokjāer.
Eļtōr Dallin H. Oaks, ilo juōn kweiļok eļap emootļo̧k, ear katakin, “Jej aikuj joļo̧k jet men ko rem̧m̧an n̄an kālōt ko jet me rem̧m̧an ak em̧m̧antata kōnke rej kōļapļo̧k tōmak ilo Irooj Jisōs Kraist im kōkajoorļo̧k baam̧le ko ad.”2
Pukōt men ko rem̧m̧an tata em̧ool etōl n̄an pedped ko raorōktata an kojpeļ an Jisōs Kraist—m̧ool ko repidodo im aiboojoj rej kwaļok n̄an kōj jān juōn ekea, indeeo im aolep jeļā kajjien Jemed Ilan̄. Katak im pedped kein raorōk, men̄e ebwe an pidodo n̄an an juōn ajri meļele, kwaļok uwaak ko n̄an kajjitōk ko rellōn̄ an mour.
Ewōr juōn aiboojoj im alikkar me ej itok jān tupidodo in me kōj jet iien ejjab kile ilo ad kōņaan n̄an uwaak ko reļōn̄ļok.
N̄an waanjon̄ak, ejjab to ālkin an rimālōtlōt im armej ro rej kamminene ilo mejatoto deļo̧n̄e laļ eo me rej kile bwe jekjek in edoulul āinwōt pen jab maron̄ jerbal ilo mejatoto. Innām jet armej ro relukkun mālōtlōt rar etaļ n̄an jerbale jorrāān eo. Eaar bōk taujin awa ko im million talla ko bōtaab, ilo jem̧ļo̧kin, raar ejaake juōn pen, me emaron̄ jeje jabdewōt jikin, ilo jabdewōt kain mejatoto, im ioon jabdewōt kain wāween. Bōtaab ekar ewi wāween an rimālōtlōt im armej jam̧aiki m̧ae eo ekar mijal apan̄ eo? Rekar lukkuun kōjerbal juon pinjōļ.
Leonardo da Vinci ej kout ilo an ba bwe “Ta eo epidodo ej wāween eo em̧m̧antata n̄an kōļapļo̧k.”3 N̄e jej lale pedped ko raorōk an Karōk in M̧ōņōņō eo eļap, karōk in lo̧m̧or, jemaron̄ kile im nebar ilo em̧m̧an im pidodo im aiboojoj in mālōtlōt an Jemedwōj Ilan̄. Innām, mour kōn mour ko ad ilo An kōņaan n̄an kōj bwe jen mour ej jinoin ad mālōtlōt.
Kajoor an Pedped ko Raorōk
Bwebwenato eo ej kwaļo̧k bwe ikkure in Amekda eo kouj Vince Lombardi ewōr an m̧akūtkūt ak jerbal ko ej kōm̧m̧ani ilo raan eo kein kajuōn in kamminene. Emaron̄ dāpij im kotak juōn football, kwaļo̧ke n̄an rikkure ro an wōn eo eaar ikkure kōn ikkure eo elōn̄ iiō rem̧ootļok, im ba, “Em̧m̧aan ran, en̄in ej football. Ej kōnnaan kōn jon̄an im jekjekin, wāween an maron̄ juji, bōke, ak letoletak. Ekar bōk tiim eo namōjļo̧k n̄an melaaj eo ejjeļo̧k kobban im ba, “En̄in ej juōn melaaj in football.” Ekar ketetaļ er, kōmeļeļik aitokan, jekjekin, kien ko an, im wāween ikkure kōn ikkure eo.4
Kouj in ejeļā bwe men̄e rikkure rein reminene, im lukkuun tiim eo, maron̄ wōt erom rikkure ro rejeļā jen maajtaik pedepd ko. Remaron̄ joļo̧k iien ko aer kamminene meļeļe kōn ikkure ko reppen, bōtaab m̧ae iien eo rej maajtaik pedped ko raorōk an ikkure eo, rejjamin erom tiim eo em̧ōkade.
Ij ļōmņak bwe eļōn̄ iaad remeļeļe jon̄an aorōk in pedped ko rej. En̄in ej bwe kōj jet iien jej mad kōn elōn̄ men ko me relļap im ealikkar aer kareel kōj.
Kein katakin em̧ōj je, eoktak jipan̄ ko ilo jikin pija, kein jerbal ko kōjerbal jarom ak mijiin ko—aolep eļap aer jipan̄ n̄e ejim̧we kōjerbali—maron̄ erom ukoktak ko rekōmetak ak kien nana ko rejenolok.
Kiiō iolaplap in elōn̄ļo̧k ainikien im kālōt ko, Em̧m̧aan in Galilee eo ettā eaar jutak erļo̧ke pein. Kōttar. An ennaan epidodo: “Itok, im ļoor eō.”5 Im E eaar jab kōnono kōn juōn megaphone ak kein kōnnaan eo ekajoor bōtaab kōn juōn ainikien edik im meļak.6 Elukkuun pidodo n̄an ennaan eo an ko̧jpeļ eaorōk n̄an an jako ioļapen ibwijlep in meļeļe eo me ej jelōt kōj jān aolepen tōrerein ko.
Jeje ko Rekwojarjar im naan eo kōnono kake an rikanaan ro remour letok kōmeļele ko jān pedped ko raorōk im katak ko an kojpeļ. Kōttōpar ak wunin eo jej jepļaak n̄an pedped in katak ko, n̄an katak ko rerreo, ej kōnke rej iaļ eo n̄an m̧ool eo meļele kōn aorōkin. Rej kōjem eo n̄an en̄jake im̧we eo eaorōk me emaron̄ ilo bar juōn wāween le ilikin kajoor ko ad n̄an meļeļe kake. Jon̄ak kein, eaorōk pedped ko rej ki eo n̄an mour ilo aenōm̧man ippān Anij im armej. Rej ki ko n̄an kōpeļļoke wintō ko an lan̄. Rej tōl kōj n̄an aenōm̧m̧an, lan̄lōn̄, im meļele bwe Jemedwōj Ilan̄ eaar kallim̧uri n̄an ajri ro Nejin ro rej ron̄ im pokake E.
Būratōr im Jejtōr, jemaron̄ kōm̧m̧an em̧man n̄an kwaļo̧k jidik, wōnm̧aanļok ilo em̧m̧aan jon̄an n̄an wāween ko ad, kejokļokjeņ kōn aorōkin, tore mejād, im lukkuun lale men ko eļap tokjāer. Kōtļok bwe jen kōļmenļo̧kjeņ wōt kōn kien ko Jemedwōj Ilan̄ eaar litok n̄an ajri ro Nejin me enaaj ejaake mour jimwe eo ejeram̧m̧an im eļap leen kōn kallim̧ur ko an m̧ōņōņō indeeo. Rej kōm̧m̧an ilo lolātat im kwoņ, bwe e jab aikuj bwe juōn armej en ettōr m̧ōkajļo̧k jān kajoor eo an. Im bar juōn alen im emenin aikuj bwe en tiljek, bwe en maron̄ tōblaļ e wōnan eo, kōn menin aolep men kein rej aikuj kōm̧m̧an ilo kwoņ.7
Būratōr im Jejtōr, niknik kōm̧m̧ane men otemjej me eļap tokjen enaaaj tōl kōj n̄an Rilo̧mo̧r eo an laļ. En̄in ej wunin ad kōnono kōn Kraist, jej kwaļo̧k kōn Kraist, jej kanaan kōn Kraist, bwe jen maron̄ jeļā ta jipan̄ eo jej maron̄ pukōte n̄an jeorļo̧k jerawiwi ko ad.8 Ilo an lapļok, pok im wāween mour rainin, en̄in ej “iaļ eo em̧m̧anļo̧k.”9
Innām Ta Pedped ko?
Ilo ad oktakļok n̄an Jemedwōj Ilan̄ im pukōt An mālōtlōt ejelōt men ko raorōk tata, jej katak elōn̄ im lōn̄ kōttan aorōk an jemjerā ko an ki ko emen: ippān ad Anij, ippān baam̧le ko ad, ippān armej ro ad, im ippān kōj make. Ilo ad etale mour ko ad make kōn juōn ļōmņak in kōņaan jenaaj lo ijo jaar etaļe jāne iaļ eo em̧m̧an tata. Mejen kōlmenļo̧kjeņ ko ad renaaj peļļok, im jenaaj kile ta aikuj ko n̄an kadedeļo̧k n̄an karreoik buruwōd im bar kejokļokjeņ kōn mour ko ad.
Kein kajuōn, jemjerā eo ad ippān Anij ekwojarjar im aorōktata. Kōj jej ajri in jetōb eo Nejin. E je Jemed. Ekōņaan m̧ōņōņō eo ad. Ilo ad pukōte E, ilo ad katak kōn Nejin Man, Jisōs Kraist, ilo ad kōpeļļoke buruwōd n̄an kareel an Jetōb Kwojarjar, mour ko ad eļapļok aer em̧m̧an im koņ. Jej en̄jake eļapļok aenōm̧man, lan̄lōn̄, im kakūrm̧ooli ilo ad kōm̧m̧ane ijo ad em̧m̧antata n̄an mour ekkar n̄an karōk indeeo an Anij im kōjparok kien ko An.
Jej kōkm̧anm̧anļok jemjerā ko ad ippān Jemedwōj Ilan̄ jen katak kake E; jen bwebwenato Ippān, ukweļo̧k jān jerawiwi ko ad, im niknik ļoor Jisōs Kraist; “ejjeļo̧k armej ej itok n̄an Jema eļan̄n̄e jab kōn [Eō].”10 N̄an kōkajoorļok jemjerā eo ad ippān Anij jej aikuji jet iien eļap tokjāer makeļo̧k Ippān. Ilo melak kejokļo̧kjeņ kōn jar an juōn make aolep raan im katak jeje ko rekwojarjar, iien otemjej kappukōt n̄an erreo an peba in mālim an tampeļ—men kein renaaj jet deļo̧n̄ļok ko remālōtlōt n̄an iien im kijejeto ko ad n̄an epaakļo̧k im kepaakļo̧k Jemed Ilan̄. Kōtļo̧k bwe jen ron̄jake kūr an Sam “Kom̧win pād wōt im jeļā bwe N̄a Anij.”11
Jemjerā in ki eo ad kein karuo ej ippān baam̧le ko ad. Jen ad “bar ejjeļo̧k tōbrak maron̄ oktak n̄an likjab”12 ijin, jej aikuj likūt kōttōbar eo eutiejtata ilo baam̧le ko ad. Jej ejaak jemjerā eo em̧wilaļ im iakwe an baam̧le jen kōm̧m̧ane men ko repidodo ippān doon, āinwōt kōjota an baam̧le, im nokon in jota an baam̧le, im jen baj m̧ōņōņō wōt. Ilo jemjerā ko an baam̧le iakwe ej lukkuun jipeel i-i-e-n, iien. Kōm̧m̧an iien n̄an doon ej bar ki eo juōn im jej kile oktak ko ad barāinwōt men ko raorōktata ad. Jej kōnono ippān, im jab kōn, doon kajjojo. Jej ekkatak jān doon kajjojo, im kam̧oolol kōn oktak ko ad barāinwōt kōn meļeļe ko ad. Jej ejaake juōn kōta kwojarjar n̄an doon ilo ad waļo̧k ippān doon im̧aan mejen Anij kōn jar an baam̧le, katak kōn ko̧jpeļ, im kabun̄jar ilo Jabōt.
Jemjerā in ki eo kein kajilu ewōr ippād ej m̧aan ro m̧ōttad. Jej ejaake jemjerā in juōn armej ilo juōn iien—jen jino meļeļe aikuj ko an ro jet, jipan̄ ak jerbal n̄an er, im leļo̧k iien im talōn ko ad. Iaar bwilōn̄ jen juōn jejtōr eo me eaar eddo kōn apan̄ ko an rūtto im nan̄inmej bōtaab ļōmņak bwe men̄e ejjab maron̄ kōm̧m̧an eļap, emaron̄ ron̄jake. Innām kajjojo wiik liin ej lale armej ro reinepata ak jōperan im ej jolok iien ippāer, ron̄jake. Juōn kōjeram̧man liin ekar pād ilo mour ko an eļōn̄ armej.
Jemjerā in ki eo kein kemen ej ippād make. Emaron̄ ealikkar an pen n̄an ļōmņak n̄an wōr juōn jemjerā ippād make, bōtaab jej. Jet armej rejjab maron̄ kōm̧m̧an em̧m̧an ippāer make. Rej kōnanaik im watōk er ejjeļo̧k tokjāer aolep raan m̧ae iien rej jino dike er make. Imaron̄ ke ļōmņak bwe kwoj kadikļok m̧ōkaj in im bōk jidik iien n̄an an em̧m̧an am jeļā kōn kwe make. Etetaļ ilo ioon laļ, lale takin al, lan̄ļōn̄ kōn kōm̧anm̧an ko an Anij, ļōmņak kōn m̧ool ko an ko̧jpeļ eo ear jeplaaktok, im pukōt ta meļeļeier n̄an eok makmake. Katak n̄an lale eokmake āinwōt an Jemedwōj Ilan̄ lale eok—āinwōt leddik ak ļaddik aorōk Nejin kōn aorōk ekwojarjar.
M̧ōņōņō ilo Erreo an Ko̧jpeļ
Būratōr im jejtōr, kōtļo̧k bwe jen mālōtlōt. Kōtļo̧k bwe jen oktak n̄an erreo im katak dān ko an ko̧jpeļ eo eaar jepļaaktok an Jisōs Kraist. Kōtļo̧k bwe jen m̧ōņōņō in bōk m̧ōttan aer pidodo im alikkar. Lan̄ ko rej bar juōn alen peļļok. Kojpeļ eo an Jisōs Kraist ej pād ioon laļ juōn kōttan, im pidodo in m̧ool ko an rej wunin jipan̄ eļap an lan̄lōn̄.
Būratōr im jejtōrm lukkuun ewōr ippāer wun eļap n̄an m̧ōņōņō. Eļan̄n̄e mour im jon̄an an m̧ōkaj im eļōn̄ inepata ko kar kōm̧m̧an bwe en pen n̄an am en̄jake lan̄lōn̄, innām bōlen kiiō ej juōn iien em̧m̧an n̄an kejokļo̧kjeņ kōn ta ko eļap tata tokjāer.
Kajoor ej itok jān m̧akūtkūt ak jān jino amņak ioon pedped eo epen im kijn̄en̄e an m̧ool im meram. Ej itok jān likūt ļōmņak im kijejeto ko ad ioon pedped ko raorōk an ko̧jpeļ eo ear jepļaaktok an Jisōs Kraist. Ej itok jān kōlmenļo̧kjen kōn men kwojarjar ko eļap tokjāer.
Kōtļo̧k bwe jen kapidodoik jidik mour ko ad. Kōtļo̧k bwe jen kōm̧m̧ane oktak ko remenin aikuj n̄an pedped e mour ko ad ioon aiboojoj in an pidodo, iaļ ettā an Christian kipilie—iaļ eo me iien otemjej ej tōl m̧aanļo̧k juōn mour elōn̄ meļeļein, em̧ōņōņō im aenōm̧m̧an. Kōn menin Ij jar, ilo Aō likūt ippāmi aō kōjeram̧m̧an, ilo etan Jisōs Kraist, amen.
© 2010 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin Pālle: 6/09. Kōmālim an Ukook: 6/09. Ukook eo an Visiting Teaching Message, November 2010. Marshallese. 09371 874