Yut
Misinari Krismes
Long taem blong nambatu Krismes blong mi olsem wan fultaem misinari, mi wetem kompanion blong mi, i stap visitim wan memba we i jes baptaes nomo wetem famle blong hem. Afta wan gudfala Krismes dina, mitufala i serem wetem olgeta, wan mesej blong Krismes.
Mitufala i bin askem famle ia blong droem ol pikja blong ol samting we i mekem olgeta i tingbaot taem ia blong Krismes, olsem ol sta, ol presen, ol samting we oli soem taem Jisas Kraes i bon mo ol Krismes tri. Afta mitufala i ridim sam skripja, mo tu, 2 Nifae 19:16: “Mo long yumi wan pikinini i bon; long yumi wan boe oli givim; mo gavman bae i stap long solda blong hem; mo nem blong hem bae oli singaotem, Gudfala wan, Kaonsela, Hae God, Papa we i no Save Finis, Boe blong King blong Pis.” Mifala i bin singsing “Once in Royal David’s City” (Hymns, no. 205), lukluk wan muvi abaot taem we Kraes i bon, mo serem testemoni abaot Jisas Kraes.
Hem i bin wan Krismes we i simpol nomo, longwe long ol famle blong mitufala mo ol lafet blong Krismes we oltaem mifala i stap gat; be taem mitufala i serem testemoni abaot Sevya, mi filim wan lav mo wan glad we i moa dip long Hem, mo tu, long taem we Hem i bon; hemia mi filim bitim wanem we mi bin save bifo. Mi luksave se bae hemia i las Krismes blong mi long fultaem misinari seves blong mi i go long Papa blong mi long Heven, be mi bin andastanem se Spirit blong Hem i save testifae long mi abaot Pikinini blong Hem long evriples we mi stap long hem.