Visiting Tijing Mesej, Disemba 2010
Responsabiliti blong Yumi blong Tekempat long Wok blong Tempol mo Famle Histri
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Fet• Famle • Givhan
Ova handred yia finis, plante pipol oli bin ded, be oli no save long gospel. Sam long ol pipol ia oli ol stret famle blong yu, o ol famle we oli longwe lelebet. Oli stap wet long yu blong mekem wok ia blong joenem tugeta ol famle blong yu mo mekem ol odinens blong sevem man long bihaf blong olgeta.
Kolosap evri tempol long wol oli no bisi inaf. Lod i bin promes se hat blong yufala bae i tanem i go long ol bubu, blong mekem se wol ia bae i no bon evriwan taem bae Hem i kambak (luk long D&C 2:2–3).
I gat ol blesing blong yuwan we yu stap kasem folem ol wok we yu mekem insaed long tempol mo famle histri. Wan long olgeta, hem i glad ia we yu filim taem yu stap givim seves long ol bubu blong yu. Wan narawan hem i we, yu kwalifae blong kasem wan tempol rekomen we i stap soemaot se yu stap klin inaf long fored blong Lod. Olgeta we oli no klin inaf tedei blong gat spesel janis blong gat wan rekomen, oli mas wok kwiktaem wetem wan bisop o branj presiden blong oli save kwalifae. Plis yu mas gat impoten kwalifikesen ia. Mi testifae se Atonmen ia i hapen tru mo yu save kasem fogivnes from ol sin blong yu sapos yu folem stret fasin blong sakem sin.
Taem yumi tekempat long wok blong tempol mo famle histri, yumi save stret se bambae yumi gat Spirit blong kamfotem yumi long ol jalenj blong yumi mo, blong lidim yumi blong mekem ol impoten desisen. Wok blong tempol mo famle histri, hem i pat blong wok blong yumi blong givhan o givim seves long ol bubu blong yumiwan.
I Kamaot long Histri blong Yumi
“Profet Josef Smit i bin talem, ‘Responsabiliti we i moa bigwan long wol ia we God i bin givim long yumi, i blong lukaotem ol famle blong yumi we oli ded finis’ (History of the Church, 6:313). Long stat, ol sista blong Rilif Sosaeti oli bin sapotem bigfala wok ia. Long Nauvu long 1842, strong tingting blong Sera M. Kimbol blong wantem tumas blong helpem ol wokman we oli stap bildim tempol, i bin mekem wan grup blong ol sista blong oganaesem olgetawan blong givim gudfala seves. Taem oli stat blong mit, Profet … i bin oganaesem fasfala Rilif Sosaeti folem fasin we oli bin oganaesem prishud. Stat long taem ia i go, ol Rilif Sosaeti sista oli bin muvum wok blong bildim Nauvu Tempol. …
“Long 1855, eit yia afta we ol Sent oli bin kasem Yuta blong fastaem, oli bin stanemap Endaomen Haos ia. Ilaesa R. Sno, we i bin wan long ol fas memba blong fas Rilif Sosaeti mo hem i bin kipim gud ol rekod blong oganaesesen ia, Presiden Brigham Yang i bin singaotem hem i kam jeneral Rilif Sosaeti Presiden long 1866. Hem mo ol nara sista oli bin ol fetful wokwoman long Endaomen Haos ia. Afta, taem oli komplitim Sent Joj, Logan mo Mantae Tempol, ol sista ia, oli bin go long wanwan long ol tempol ia blong mekem wok blong ol dedman insaed long ol tempol ia.”1
© 2010 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen: 6/09. Translesen blong Visiting Teaching Message, December 2010. Bislama. 09372 852
Wanem Nao Mi Save Mekem?
-
Olsem wanem nao mi save helpem ol sista blong mi blong oli lukaotem ol bubu blong olgeta mo blong oli mekem ol tempol odinens long bihaf blong olgeta? Tingting long situesen blong wanwan sista taem yu stap tingting hevi long wei we bae yu mitim ol nid blong olgeta. Ating bae yu wantem tingting se wok blong famle histri, plante taem, i save mekem ol niu memba, ol memba we oli kambak, mo ol memba we oli no kam tumas, oli kam strong moa.
-
Long wanem taem nao tempol mo wok blong famle histri i bin leftemap tingting blong mi long ol jalenj blong mi, o i bin lidim mi long ol impoten desisen?
Blong kasem moa infomesen, go long www.reliefsociety.lds.org.