Pweng sin Prestuhnsi Se Met, Tisacmpuh 2010

Yac Kuht Kuh in Liye Kraist?

Sel Prestuhn Dieter F. Uchtdorf

Mwet in Kahsruh Ahkluo ke Prestuhnsi Se Met

Sie fong ah pahpah mahtuh se sruhmuhn soko pihlenfong nuh sin tuhlihk muhtwacn yac ahkosr se nuhtin nahtuhl ke el ngwetack nuh luhng ac fahk, “Pahpah mahtuh, liye itu ah!” Mukul mahtuh sac isrwacsr srihsrihk kuhlwacnglac ac fahk, “Kuht oasr lun lohm uh, uhni. Wacngihn itu inge.” Tuhsruhktuh tuhlihk sac kwacfe, “Oasr itu lun infuckihl lom uh! Liye!”

Pahpah mahtuh sac ngwetack nuh lucng ac, ke lut lal, el akihlenwack lah siling sac usriucklac ke mwe ahksahromrom ke mukutkut in osra. Inkaiyen pacl uh tiac liyeyuck, tuhsruhktu ke pacl ma kahlwem se srweyac mwe ahksahromrom ke sie atac, pwacyena lah oacna in acn se luhn itu uh. Muhtuhn tuhlihk se pa liyacack ah, tuhsruhk elos oasr. Ke pacl sac fahlac, pacl nuh kwewa pahpah mahtuh sac utyak nuh lun infuckihl se inge ac ngwetack nuh lucng uh, el kuh in liye ma suc el koflah liye met.

Kuht ilyak nuh ke sie pacl in Christmas wolacna suc sesseslah ke on ac lahm, toeni in aengani ac mwe sang. Tuhsruhk tuh mwet uh nuh kwewa, kuht suc mempucr luhn alu uh suc ekihn en Mwet Lahngo enenuh in ngwetlah liki mwe na luhmah luhn pacl se inge ac liye ma yohk srihpac pwacye ac kahto ke pacl se ke yac inge.

Nga ke etuh lah mwet ekahsr fin acn Bethlehem etuh inpacl sac na, fototo nuh yohrohlos, ma Mwet Lahngo El isuslac? Wen nuhtin God, Misaia tuhpanyuck ac uliyuck ke pacl loeloes—El oasr inmahsrlolos!

Kowos esam ma lupufacn se fahk nuh sin mwet liacacng sip ah? “Tuh isuslac nuh suwos misenge, in siti sel David, sie Mwet Lango, suc Leum Kraist.” Ac elos fahk nuh selos sifacna, “Lwelah kuht in som nuh Bethlehem, ac liye ma suc sikyak inge” (Luk 2:11, 15).

Oacna mwet liacacng sip somlah ah, kuht enenuh in fahk ke insiacsr, “Lwelah kuht in liye ma suc sikyak inge.” Kuht enenuh in kena kac ke insiacsr. Lwelah kuht in liye God Muhtahl luhn Israel lun iwen muhta luhn kosro, lun tempuhl, fin eol uh, ac fin sahkseng uh. Oacna mwet liacacng sip an, lwelah kuht in ahkfuhlwactye ac kaksahkihn God ke pweng wo ke engan luhlahp!

Kuhtuh pacl uh ma upac emet in liye uh pa ma ma oan ye muhtahsr pacl nuh kwewa uh. Oacna pahpah mahtuh se ma koflah liye itu ke siling sac ah, kuhtuh pacl uh kuht koflahna liye ma mahnweklac ye muhtahsr uh.

Kuht suc lohng tari pweng wolacna ke tuhkuh luhn Wen nuhtin God, kuht suc eis nuh facsr Inel ac olwelah in fahsr ke inkacnek Lal in ekihn mwet sap Lal—kuht enenuh in tiac muhnahslah in ikacslah insiacsr ac nuhnak lasr ac liyacl na pwacye.

Pacl in Christmas uh wolacna ke inkacnek pucspucs. El sie pacl in orwaclah mukwikwi ke luhngse pwacye in pahkomuhta ke kuhlwacng ac aluhngsei luhn tamuhlwel. El sie pacl in lihksrweni lohacng nuh ke moul lasr sifacna uh ac ke mwe insewowo pucspucs lasr uh. El sie pacl in nuhnak muhnahs ac oayacpac eis nuhnak muhnahs. El sie pacl in pwacrkihn puhsrwen on ac lahm uh, toeni aengani ac mwe sang an. Tuhsruhk tuh kuht in tiac lwelah ma wolacna ac sahromrom ke pacl se inge in ahklohsryelah muhtahsr in liye Fihsrack in Mislac ac fuhlwactlacna Lal.

Lwelah kuht in oruh pacl in Christmas ke yac se inge in mwe ahkengan ac ahkfuhlwact, sie pacl fal kuht in akihlen usrnguck luhn God Kuhlacna suhpwacma Wen Sefanna Nahtuhl, Jisus Kraist, in molwelah facluh!

© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message, December 2010. Kosraean. 09372 868

Nuhnak in Luti ke Pweng se Inge

“Mukwikwi in lohacng uh kuh in orekmakihnyuck in orwaclah insacnweacng ac in kahsruh mwet lutlut an in lohacng lalos an nuh ke sifac ke mwe lutlut an. … Petsac uh kuhfa na yohk srihpac se in sang ahkkweye mwe nuhnak yohk ke mwe lutlut se ac kahsruh mwet lutlut uh in insacnweacng” (Luti, Wacngin Pang Yohk Liki 1999], 160, 176). Ke kowos muhtwacwack sruhmuhn pweng se inge, motko in orekmakin mukwikwi in lohacng ma oacna in ahkkahlwemyeyuck sie petsac kuh akacsruhi ke sie ma suhmuhslah ac siyuck sin sucu an in nuhnkuh lah ac orekmakihnyuck fuhkah nuh ke pweng an.
“Sie ngwetngwet kuh finsrak yohk lowos an pa in kahsrwelos in kuh in orekmakin masap kuh akwuck luhn wosasuc uh ke ohiyac nuh kwewa ke lwen nuh kwewa uh. … Kahsruh mwet lutlut an in kuh in konwacack mwe insewowo tuhkuh ke kuht moulkihn wosasuc uh” (Luti, Wacngin Pahng Yohk Liki, 159). Tukun sramsramkihn pweng se inge, motko in siyuck sin mwet ke sucu an in sruhmuhn kuhtuh ma elos puhlakihn ke pacl somlah ke elos lohacng nuh sin Mwet Lahngo ke pacl in Christmas uh.