Ennaan eo an Būreejtōnji eo Kein Kajuōn, Tijem̧ba 2010
Jemaron̄ Ke Lo Kraist?
Juōn boñ juōn jim̧m̧aan eaar riiti juōn bwebwenato n̄an leddik eo jibūn emen iiō rettan ke eaar reilōn̄ļo̧k im ba, “Jim̧m̧a, reilo̧k n̄an iju kan!” Ļōļļap eo eaar ettōñ dikdik ilo jouj im ba, “Jepād lowa, jibū. Ejjeļo̧k iju ijin.” Bōtaab ajri eo eaar akweļap, “Ewōr am̧ iju ilo ruum̧ in am̧! Lale!”
Eo jim̧m̧aan eaar reilōñļo̧k im, n̄an an būllōn̄, eaar lo bwe jiļiin̄ eo eaar errabōl ļo̧k kōn errabōlbōl in juōn aeen. Ekkar jab waļo̧k enañin aolepān iien eo, bōtaab ke meram eo eaar itaak ippān errabōbōl eo ilo juōn wāween, eaar lukkuun āinwōt juōn meļaaj in iju ko. Eaar bōk mejen juōn ajri ñan loi, bōtaab kar errā ran. Im jān tōre eo m̧aanļo̧k, n̄e eo jim̧m̧aan eaar etetal ilo ruum̧ in im kar reilōn̄ļo̧k, emaron̄ kar lo ta eo eaar jab maron̄ in kar lo m̧okta ļo̧k.
Jej deļo̧ñe bar juōn iien kūrrijm̧ōj eaiboojoj eobōrak kōn kōjañjan̄ im ļait ko, bade ko im menin leļo̧k ko. Ak iaan aolep armej, kōj āinwōt membōr ro an kabun̄ eo me ej etōņake etan Rilo̧mo̧r eo aikuj in reim̧aanļo̧k eļļā jān iien eo im lale im̧we an m̧ool eo im aiboojoj eo an tōre in ilo iiō otemjeļo̧k.
Ij kōļmenļo̧kjen ewi lōñ in ilo Betleem raar jeļā bwe ilo ijeņ, iturrier, Rilo̧mo̧r eo eaar ļotak? Eo Nejin Anij, eo kar to kōttare im kar kallim̧ur kake Messaia—Eaar pād ilubūllijier!
Kom̧ij kememej ke ta eo enjeļ eo eaar ba ñan seperd ro? “Bwe rainin e ļotak n̄an kom̧ ilo jikin kweiļo̧k an Devid, Rilo̧mo̧r, E Kraist Irooj.” Im raar ba n̄an er make, “Kiiō jen ilo̧k n̄an Betleem im lo men in ej waļo̧k” (Luk 2:11, 15).
Āinwōt seperd ro retto, jej aikuj ba ilo būruwōd, “jen lo men in ej waļo̧k.” Jej aikuj kōņaan men in ilo būruwōd. Jen lo eo Ekwojarjar an Israel ilo menjer, ilo tampeļ eo, ioon toļ eo, im ioon rōbāāl eo. Āinwōt seperd ro, jen wūjtak im nebar Anij kōn ennaan in eļap lan̄lōn̄ kein!
Jet iien men ko reļļap tata aer pen n̄an loi rej men ko me relakkar pād im̧aad wōt jān jinoin. Āinwōt eo jimman eaar likjab in lo iju ko ilo jiļiin̄ eo, jet iien jej jab maron̄ lo ta eo epidodo n̄an loe.
Kōj ro jaar roñ ennaan eo aiboojoj kōn itok eo an Nejin Anij, kōj ro jaar bōk iood Etan im kar kōm̧m̧an bujen n̄an etetal ilo iaļ eo An āinwōt rijjilōk ro An—jej jab aikuj likjab ñan kebeļļo̧k būruwōd im lōļļāātāt ko im lukkuun m̧ool in lo E.
Iien Kūrrijm̧ōj ej em̧m̧an ilo elōn̄ wāween ko. Ej juōn iien m̧akūtkūt ko an leto letak in jouj ko im iakwe in jemjen jemjati. Ej juōn iien eo eļap kōļmenļo̧kjeņ kōn mour ko ad make im kōn elōn̄ kōjeraam̧m̧an ko me rej ad. Ej juōn iien in joļo̧k bōd im aer joļo̧k ad bōd. Ej juōn iien n̄an lañlōñ kōn kōjan̄jan̄ im ļait ko, bade ko im menin leļo̧k ko. Bōtaab errabōlbōl eo an iien in en jab kōmarok ļo̧k ad lo im bōbraeik kōj jen lukkuun loe Irooj in Aenōm̧m̧an eo ilo An utiej pōtata.
Jen aolep kōm̧m̧an bwe iien Kūrrijm̧ōj in ilo iiō in en juōn iien lem̧ōņōņō im kam̧oolol, juōn iien n̄e jej kile kabwilōn̄lōn̄ eo me ad Anij Kajoor Pōtata eaar jilkintok Eo Nejin Emake Wōt, Jisōs Kraist, n̄an lo̧mo̧o̧ren laļ!
© 2010 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin Pālle: 6/09. Kōmālim an Ukook: 6/09. Ukook eo an First Presidency Message, December 2010. Marshallese. 09372 874
Ļōmņak ko n̄an Katakin jān Ennaan In
-
“M̧akūtkūt in kakuktok ko remaron̄ in jerbal n̄an ejaak limotak im n̄an jipan̄ rikatak ro lukkuun letok aer ioon wūnin katak eo. … Pija ko rej jerbal ko raorōk ñan kōkajoorļo̧k wūnin kōnono eo an juōn katak im jipan̄ rikatak ro letok wōt aer” (Teaching, No Greater Call [1999],160, 176). Ilo am̧ jino kwaļo̧k ennan in, ļōm̧ņak in kōjerbal juōn m̧akūtkūt in kakuktok āinwōt kwaļo̧ke juōn pija ak kajeedede juōn pija im kajitōke baam̧le eo n̄an ļōm̧ņak kōn ewi wāweenan jerbal n̄an ennaan eo.
-
“Juōn iaan menin kōttōpar ko am̧ raorōk ej n̄an jipan̄ ro jet kōm̧m̧ani katak kōn ko̧o̧jpeļ ko ilo aolep jekjek in kajjojo raan ko. … Jipañ rikatak ro lo kōjeram̧m̧an ko me rej itok ñe jej mour kōn kojpeļ eo” (Teaching, No Greater Call,159). Ālikin kwaļo̧k ennaan in, ļōm̧ņak in karuwaineneik membōr ro an baam̧le eo n̄an kwaļo̧k imminene ko ewōr ippāer āinwōt aer kar kalimjōk wōt Rilo̧mo̧r eo ilo iien Kūrrijm̧ōj.