Mensahe iti Visiting Teaching, Disiembre 2010
Ti Pagrebbengantayo a Makiramam iti Aramid iti Templo ken Pakasaritaan ti Pamilia
Adalem daytoy a material ken, no mayannatup, ilawlawagmo daytoy kadagiti kakabsat a babbai a sarungkaranyo. Usarem dagiti saludsod a makatulong kenka a mangpapigsa kadagiti kakabsat a babbai ken tapno mangaramid iti Relief Society kas aktibo a paset ti bukodmo a biag.
Pammati • Pamilia • Tulong
Kadagiti napalabas a siglo adu a tattao ti natay nga awan ti ammoda maipapan iti ebanghelio. Sumagmamano kadagita a tattao ket isu dagiti nasinged ken adayo a kabagyam. Agur-urayda kenka a mangaramid iti napateg a panagsukisok tapno mabegkes a sangkamaysa dagiti pamiliam ken mangannong kadagiti pangisalakan nga ordinansa nga agpaay kadakuada.
Kaaduan kadagiti templo ti lubong ket bassit laeng ti agipatpatungpal iti daytoy nga aramid. Inkari ti Apo a maisublinto ti puspusoyo kadagiti amma tapno saanto a naan-anay a madadael ti daga iti yaayna (kitaen iti DkK 2:2–3).
Adda dagiti bukod a bendision nga awatem kas bunga ti pannakiramanmo iti aramid iti templo ken pakasaritaan ti pamilia. Maysa kadagitoy ket ti rag-o a mariknam bayat ti panagserbim kadagiti kapuonam. Maysa pay ket ti pannakabaelmo a maikari iti maysa a rekomenda ti templo, a mangitanda iti pannakaikarim iti imatang ti Apo. Dagitay saan a maikari ita iti pribilehio a panangikut iti maysa a rekomenda ket kasapulanda ti mangitrabaho iti maysa a bishop wenno branch president tapno maikarida iti kabiitan a panawen no mabalin. Dikayo maaddaan no awan daytoy napateg unay a kasapulan. Paneknekak nga agpaypayso ti Pannubbot ken mabalin a mapakawan dagiti basbasol babaen iti umisu a panagbabawi.
Bayat ti pannakiramantayo iti aramid iti templo ken pakasaritaan ti pamilia, awan duadua nga adda kadatayo ti Espiritu a mangliwliwa kadatayo kadagiti pannuboktayo ken mangtarabay kadatayo kadagiti napapateg a pangngeddeng. Ti aramid iti templo ken pakasaritaan ti pamilia ket paset ti aramidtayo a panangipaay iti tulong, wenno serbisio, kadagiti bukotayo a kapuonan.
Manipud iti Pakasaritaantayo
“Kinuna ni Propeta Joseph Smith, ‘Ti kaindaklan a pagrebbengantayo iti daytoy a lubong nga insangrat ti Dios kadatayo ket ti panangsapultayo kadagiti pimmusayen a kabagiantayo’ (History of the Church, 6:313). Manipud pay idi rugina, sinuportaranen dagiti kakabsat iti Relief Society daytoy naindaklan nga aramid. Idiay Nauvoo idi 1842, ti tarigagay ni Sarah M. Kimball a makatulong kadagiti trabahador iti pannakapatakder ti templo ket nangguyugoy iti grupo dagiti kakabsat a babbai a mangbuangay iti bagbagida tapno makapagserbida a nasamsamay. Bayat ti panangirugida nga agtataripnong, ti Propeta … binukelna ti umuna a Relief Society a maibatay iti pagtuladan ti priesthood. Manipud iti dayta a panawen, agtultuloy a nagtitinnulong dagiti kakabsat iti Relief Society a nangpadur-as iti aramid iti Templo ti Nauvoo. …
“Idi 1855, walo a tawen kalpasan ti isasangpet dagiti Santo iti Utah, naipasdek ti Endowment House. Ni Eliza R. Snow, a maysa kadagiti sigud a miembro ti umuna a Relief Society ken nangtaginayon kadagiti kasuratan dayta a timpuyog, ket inawagan ni Presidente Brigham Young idi 1866 tapno agbalin a sapasap a presidente ti Relief Society. Isuna ken dagiti dadduma pay a kakabsat a babbai ket napudnoda a trabahador iti Endowment House. Kalpasanna, bayat ti pannakaileppas dagiti Templo ti St. George, Logan, ken Manti, nagbiahe dagitoy a kakabsat a babbai iti tunggal templo tapno makaaramidda iti trabaho nga agpaay kadagiti pimmusayen idiay.”1
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, December 2010. Ilokano. 09372 864
Ania ti Maaramidko?
-
Kasano a matulongak dagiti kakasatko a babbai a mangsukisok kadagiti kapuonanda ken mangannong kadagiti ordinansa iti templo nga agpaay kadakuada? Ibilangmo dagiti kasasaad ti tunggal kabsat a babai bayat ti panangutobmo no kasano a maipaay dagiti kasapulanna. Mabalin nga ibilangmo a ti aramid iti pakasaritaan ti pamilia ket masansan a makapapigsa kadagiti kabarbaro, agsubsublin, ken saan unay nga aktibo a miembro.
-
Kaano a naliwliwanak kadagiti pannubokko wenno natarabaynak kadagiti napapateg a pangngeddeng ti aramid iti templo ken pakasaritaan ti pamilia?
Para iti ad-adu pay a pakaammo, inkayo iti www.reliefsociety.lds.org.