Mensahe ti Umuna a Panguluen, Disiembre 2010
Makitatayo kadi ti Cristo?
Maysa a rabii ibasbasaan ti maysa a lelong ti estoria iti apokona a babai nga agtawen iti uppat idi tumangad daytoy ket kinunana, “Lelong, kitaem dagidiay bituen!” Immisem a siaayat ti lakay ket kinunana, “Addata iti uneg, dungngo. Awan dagiti bituen ditoy.” Ngem impetteng ti ubing, “Adda dagiti bituen ditoy siledmo! Kitaem!”
Timmangad ti lelong ket, iti siddaawna, nakitana a nawarasan ti kisame iti sumilsileng a metal. Saan a makita daytoy iti kaaduan a gundaway, ngem no kasdiay nga anninawan ti lawag ti sumilsileng, pudno a kasla maysa daytoy a tay-ak dagiti bituen. Inurayna ti mata ti maysa nga ubing a kumita kadagitoy, ngem addada idiay. Ket manipud iti dayta a kanito, idi immuneg ti lelong iti daytoy a siled ket timmangad, nakitana no ania ti saanna pay pulos nakitkita idi.
Sumsumrektayo iti sabali pay a nakaskasdaaw a panawen ti Paskua a napnuan kadagiti musika ken silaw, kadagiti pasken ken sagsagut. Ngem maiduma iti amin a tattao, datayo a kas miembro ti simbaan a mangik-ikut iti nagan ti Mangisalakan ket kasapulan a kumitatayo iti labes ti akinruar a pannakaiparang ti panawen ti paskua ken kitaentayo ti nangayed a kinapudno ken kinapintas daytoy a panawen ti tawen.
Mano ngata idiay Betlehem ti makaammo nga idiay mismo, iti asidegda, ti naikaipasngayan ti Mangisalakan? Ti Anak ti Dios, ti nabayagen nga inur-uray ken naikari a Mesias—ket adda Isuna iti nagbabaetanda!
Malagipyo kadi no ania ti imbaga ti anghel kadagiti agpaspastor? “Nayanak kadakayo idiay ili ni David ti maysa a Manangisalakan, isu ti Cristo nga Apo.” Ket kinunada iti bagbagida, “Intayo ngarud idiay Betlehem, ket kitaentayo daytoy a naaramid” (Lucas 2:11, 15).
Kas kadagiti agpaspastor idi punganay, masapul a sawentayo iti puspusotayo, “Kitaentayo koma daytoy a naaramid.” Masapul a tarigagayantayo daytoy iti puspusotayo. Kitaentayo koma ti Maysa a Nasantuan ti Israel iti kulloong, iti templo, iti rabaw ti bantay, iti krus. Kas kadagiti agpaspastor, itandudo ken idaydayawtayo koma ti Dios gapu kadagitoy a damdamag maipapan iti naindaklan a rag-o!
No dadduma dagiti karigatan a bambanag a makitatayo ket isu dagitay mismo nga adda a kanayon iti imatangtayo. Kas iti lelong a napaay a nakakita kadagiti bituen iti kisame, no dadduma ditayo met makita dagiti nalawag a makita.
Datayo a nakakitan iti nagloriaan a mensahe maipanggep iti yaay ti Anak ti Dios, datayo nga immawaten iti bagbagitayo ti naganna ken nakitulagen a magnatayo iti dalanna a kas disipulona—nasken a saantayo a mapaay a manglukat iti puspuso ken pampanunottayo ket sipupudno a kumitatayo Kenkuana.
Nakaskasdaaw ti panawen ti Paskua iti adu a wagas. Daytoy ti panawen ti naasian a panagaramid kadagiti aramid a kinaimbag ken nainkabsatan a pammateg. Daytoy ti panawen ti panagbalintayo a managutob maipapan iti bukodtayo a panagbiag ken maipapan kadagiti adu a parabur nga aw-awatentayo. Daytoy ti panawen ti panangtedtayo iti pammakawan ken pannakapakawan. Daytoy ti panawen a panagragragsaktayo kadagiti musika ken silaw, kadagiti pasken ken sagsagut. Ngem ti silengsileng ti panawen ket saan koma a mangpakudrep wenno mangpalidem iti panagkitatayo ken manglapped kadatayo iti pudno a panangimatangtayo iti Prinsipe ti Kappia iti kinatan-okna.
Aramidentayo amin koma daytoy a panawen ti Paskua ita a tawen a maysa a panawen ti panagrag-o ken panagrambak, maysa a panawen a pakabigbigantayo ti milagro a ti Mannakabalin a Diostayo ket imbaonna ti Bugbugtong nga Anakna, a ni Jesucristo, tapno mangsubbot iti lubong!
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, December 2010. Ilokano. 09372 864
Dagiti Kapanunotan para iti Panangisuro manipud iti Daytoy a Mensahe
-
“Dagiti aktibidad a pangawis iti panagdengngeg ket mabalin a mausar a pangparnuay iti interes ken makatulong kadagiti sursuruan a mangipamaysa iti panagdengngegda iti topiko ti adalen. … Dagiti ladawan ket napateg a ramit para iti panangpapigsa iti kangrunaan a kapanunotan ti maysa nga adalen ken pangtulong kadagiti sursuruan nga agtalinaed iti kinapasnekda” (Teaching, No Greater Call [1999],160, 176). Bayat ti panangrugim iti panangiburay iti daytoy a mensahe, ibilangmo ti panangusar iti aktibidad a pangawis iti panagdengngeg kas iti panangipakita iti maysa a ladawan wenno panangiburay iti maysa a nasantuan a kasuratan wenno panangkiddaw iti maysa a pamilia a mangpanunot no kasano a mayaplikar daytoy iti mensahe.
-
“Maysa koma kadagiti kapatgan a panggepmo a tun-oyen ket mangtulong kadagiti dadduma a mangyaplikar kadagiti pagbatayan ti ebanghelio kadagiti inaldaw a kasasaad. … Tulongam dagiti sursuruan a mangtakuat kadagiti parabur a sumangbay no agtungpaltayo iti ebanghelio” (Teaching, No Greater Call, 159). Kalpasan ti panangiburay iti daytoy a mensahe, ibilangmo ti panangawis kadagiti miembro ti pamilia tapno iburayda dagiti padasda bayat ti panangipamaysada maipapan iti Mangisalakan kabayatan ti panawen ti Paskua.