Cov Hluas
Caij lub Luv Thij Mus rau Yav Tom Ntej
Cov tub hluas feem coob tseg nyiaj txiag tseg kom npaj mus ua tub txib. Nyob hauv Africa teb chaws, ib feem ntawm tej kev npaj ntawd yog khwv nyiaj txiag txaus kom thiaj yuav tau daim ntawv hla ciam teb. Sedrick Tshiambine khwv tau tej nyiaj txiag nws xav tau ua ib txoj kev ua lag luam zoo kawg: nws caij luv thij mus ub no muab txiv tsawb muag.
Sedrick ua neej nyob hauv Luputa, Democratic Republic of Congo. Nws yog ib tug tub hluas ntawm 45 tug tub hluas hauv koog chaw Luputa uas ua hauj lwm tseg nyiaj cia kom thiaj yuav tau ib daim ntawv hla ciam teb thiab mus ua tub txib qhia txoj moo zoo. Hauv DR Congo ib daim ntawv hla ciam teb tus nqi yog $250, uas yog ob feem peb ntawm tus nqi uas yuav tsum them kom thiaj ua tau ib lub tsev nyob.
Tiam sis Sedrick tsis kam tso tseg li. Nws khwv nyiaj txiag npaj mus ua tub txib thaum nws caij luv thij 15–30 kis laus mev (9–19 mais) tuaj mus ntawm Luputa mus rau tej lub zos me me, ces nws yuav ib co txiv tsawb, ces nws caij luv thij rov qab mus hla Africa teb chaws tej roob moj sab qhua, thauj nws cov txiv tsawb mus muag tim nroog. Txhua lub lis piam nws caij luv thij taug tej kev xuab zeb mus deb li 180 kis laus mev (112 mais), thiab tsuas muaj ib zaug uas nws lub nra ntawd ua rau nws vau.
Tag nrho tej kev khwv nyiaj no Sedrick tsuas khwv tau kwv yees li $1.25 tauj ib lis piam, los yog $65.00 tauj ib xyoos. Nws siv sij hawm li plaub xyoos kom thiaj txuag tau nyiaj txaus mus yuav nws daim ntawv hla ciam teb, tiam sis nim no nws paub hais tias muaj ib hnub twg nws mam li mus ua hauj lwm pab ua ib tug tub txib qhia txoj moo zoo vim nws twb tseg tau nyiaj txaus mus ua hauj lwm pab thaum nws raug hu mus ua li ntawd.