Cov Mus Saib Xyuas tom Tsev tsab Xov, Ib Hlis Ntuj 2011
Keeb Kwm thiab tej Qub Txeeg Qub Teg ntawm lub Koom Haum Niam Tsev
Ua tib zoo kawm tej ntaub ntawv no thiab, raws li qhov tsim nyog, nrog cov viv ncaus uas koj mus xyuas siab tham txog tej no. Siv cov lus nug kom pab ntxiv dag zog rau koj cov viv ncaus thiab kom thiaj nruab tau lub Koom Haum Niam Tsev tej kev coj ua rau hauv koj lub neej.
Kev Ntseeg • Tsev Neeg • Kev Pab
Eliza R. Snow xav txog tus Yaj Saub Yauxej Xamiv cov lus qhia thaum nws hais tias “txawm hais tias lub npe [Koom Haum Niam Tsev] yog tsim tsis ntev tas los no los, lub koom haum no muaj puag thaum ub thiab.”1
Leej Txiv Saum Ntuj Ceeb Tsheej thiab Nws Leej Tub, Yexus Khetos, tau nqis los xyuas Yauxej Xamiv, thiab dhau los ntawm nws, tau txum tim txoj moo zoo rov qab los rau lub ntiaj teb. Lub Koom Haum Niam Tsev yog ib feem ntawm txoj kev txum tim rov qab los ntawd. Lub Koom Txoos tus txheej txheem tsis zoo tag nrho ua ntej cov viv ncaus lub koom haum ntawd raug txhim tsa.2
Nyob rau ob peb hlis tom ntej no, txhua tsab Xov rau cov Mus Saib Xyuas tom Tsev yuav muab ib lub cib fim rau peb kawm ntxiv txog keeb kwm ntawm lub Koom Haum Niam Tsev thiab nws feem xyuam hauj lwm hauv txoj kev txum tim txoj moo zoo rov qab los. Vim yog ntau yam, qhov uas peb to taub peb zaj keeb kwm tsis yog ib qho tseem ceeb xwb tiam sis yuav tsum ua thiab.
Qhov thib ib, thaum peb to taub peb zaj keeb kwm, qhov ntawd tshoov peb tej siab kom thiaj ua tau ib tsoom poj niam uas ntseeg Vajtswv thiab coj raws li peb yuav tsum coj. Thaum peb ua raws li tej yam ntxwv ntawm cov poj niam Ntseeg hauv Hnub Nyoog Kawg uas coj kev yam zoo kawg nkaus, ces peb yuav kawm txog tej yam uas tau muaj yav nram ntej, kom thiaj kov yeej tau tej kev cov nyom nyob rau yav tom ntej.3
Qhov thib ob, peb zej keeb kwm qhia hais tias tib co ntsiab cai uas muaj hauv lub Koom Txoos thaum ntxov yog tib co ntsiab cai uas peb coj ua raws li niaj hnub nim no. Qhov uas peb paub txog tej no thiab paub txog peb tej hom phiaj—kom ua rau txoj kev ntseeg thiab txoj kev coj ncaj ncees loj hlob tuaj, kom ntxiv dag zog rau tsev neeg thiab tsev nyob, thiab kom pab cov neeg uas xav tau kev pab—tej no puav leej ua rau peb lub caij niaj hnub nim no thiab lub caij yav nram ntej sib txuas khov kho.
Qhov thib peb, thaum peb saib peb zaj keeb kwm rau nqi, peb sib faib tau tej yam qub txeeg qub teg ntawm sab ntsuj plig uas muaj los rau peb. Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm, tau hais tias: “Nej muab tej qub txeeg qub teg no faib rau lwm tus neeg thaum nej pab lwm tus neeg txais qhov txiaj ntsim ntawm kev siab hlub. … Zaj keeb kwm ntawm lub Koom Haum Niam Tsev yog sau tseg rau hauv ntawv ua lus thiab zauv, tiam sis tej qub txeeg qub teg yog faib mus ib lub siab dhau ib lub siab.”4
Qhov kawg no, qhov uas peb to taub txog peb zaj keeb kwm pab peb ua peb lub luag hauj lwm kom txhim tsa lub Koom Haum Niam Tsev mus lawm yav tom ntej. Thawj Tswj Hwm Spencer W. Kimball (1895–1985) piav hais tias, “Peb paub hais tias cov poj niam uas saib lub caij yav nram ntej rau nqi yuav xav txog qhov uas kho lub caij yav tom ntej kom ncaj ncees thiab zoo mus.”5
Julie B. Beck, Koom Haum Niam Tsev tus tuam thawj tswj hwm.
Los ntawm cov Vaj Lug Kub
Exathaws 9:28–29; Loos 16:1–2; Amas 37:8; Maulaunais 7:45–47
Los ntawm Peb zaj Keeb Kwm
“Lub Koom Haum Niam Tsev yog tus Tswv lub koom haum rau cov poj niam.”6 Ua raws li nws muaj peev xwm ua ua ib tug yaj saub, Yauxej Xamiv tau txhim tsa lub Koom Haum Niam Tsev thaum lub Peb Hlis Ntuj hnub tim 17, xyoo 1842. Pawg me me uas xub sib ntsib ua ke nyob rau ntawm thawj thawj kev sib ntsib ntawd yog ib pawg poj niam uas rau rau siab, ib yam li cov viv ncaus hauv lub Koom Haum Niam Tsev niaj hnub nim no thiab. “Cov hluas tshaj plaws yog peb tug ntxhais hluas uas nyuam qhuav tiav nkauj tsis ntev, ho tus laus tshaj plaws, yog ib tug poj niam uas muaj hnub nyoog tsib caug xyoo tawm. Kaum ib tug poj niam twb yuav txiv lawm, ho ob tug yog poj ntsuam, rau tus tseem tsis tau yuav txiv, thiab peb tseem tsis paub saib ib tug puas tau yuav txiv los tsis tau. Qhov uas lawv tau kawm ntawv qib siab los tsis tau, thiab saib lawv tau tuaj qhov twg tuaj, nyias txawv nyias, ib yam li qhov uas lawv ib txhia muaj nyiaj ib txhia tsis muaj. Qhov uas nyias txawv nyias no yuav loj hlob tuaj thaum cov poj niam uas koom lub koom haum no coob zuj zus tuaj, tiam sis, txawm yog li ntawd, lawv puav leej yeej meem yuav ua ib siab.”7
© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais Visiting Teaching Message, January 2011. Hmong. 09761 295