Fas Presidensi Mesej, Jenuware 2011
Lod I Nidim Ol Misinari
Las Oktoba long jeneral konfrens, mi bin singaotem moa misinari. Evri yangfala man we oli klin inaf, mo save mekem rere blong go long wan misin. Seves ia i olsem wan prishud diuti—wan wok we yumi mas mekem we Lod i wantem luk se, yumi, we yumi stap kasem plante finis, i mas mekem. Ol yang man, mi talem long yufala blong rere from seves ia olsem wan misinari. Kipim yufala i stap klin mo klin gud mo klin inaf blong representem Lod. Kipim yufala i stap helti mo strong. Stadi olgeta skripja. Tekem pat long seminari mo institiut sapos i gat long ples blong yufala. Save gud misinari hanbuk Prijim Gospel blong Mi.
Ol sista, nomata we yufala i not gat semmak prishud responsabiliti olsem ol yang man oli gat blong givim wan seves olsem ol fultaem misinari, be yufala i mekem wan gud kontribusen tu olsem ol misinari, mo mifala i glad long seves blong yufala.
Long ol olfala brata mo sista blong Jos, mi mekem yufala i tingbaot se Lod i nidim plante plante moa long yufala blong givim seves olsem ol fultaem misinari. Sapos yufala i no stap yet long taem blong yufala blong givim seves olsem wan kapol misinari, mi askem yufala blong rere naoia from dei ia, we taem i stret, yufala mo waef, o hasban blong yufala i save go. Bae i gat sam taem long laef we bae yufala i glad long swit spirit mo gud taem we yufala i kasem from seves we yufala i bin givim fultaem tugeta long wok blong Masta.
Naoia, sam long yufala oli ol man blong sem, o yufala i tekem se yufala i no inaf blong akseptem koling ia blong givim seves.Tingbaot se hemia i wok blong Lod, mo taem yumi stap ol wokman blong Lod, yumi dipen long help blong Lod. Bae Lod i stretembak taem Hem i karemaot hevi samting we i stap biaen.
Ol narawan, nomata we oli klin inaf blong givim seves, ating oli filim se oli gat sam narafala samting we oli moa impoten. Be mi tingbaot promes blong Lod: “Naoia, man we i ona long mi, mi bambae mi ona long hem” (Fas Samuel 2:30). I no gat wan long yumi bae i save ona long Papa blong yumi long Heven mo Sevya moa bitim we blong givim seves olsem wan misinari we i givim evri samting, i gat lav mo sore.
Wan eksampol blong kaen seves ia i bin wan misinari eksperiens blong Julius mo Doroti Fasek, we oli bin singaotem tufala blong go long wan misin long Polan. Brata Fasek i bin bon long Polan. Hem i toktok lanwis Polan. Hem i lavem ol pipol blong Polan. Sista Fasek i bin bon long Inglan mo save smol abaot Polan mo no save wan samting abaot ol pipol blong hem. Wetem tras long Lod, tufala i go long wok we oli givim long tufala. Tufala nomo i stap mekem wok ia, mo wok blong tufala i bigwan. I no bin gat wan misin yet long Polan. Wok ia we oli givim long ol Fasek hem i blong mekem rere blong save gat wan misin longwe.
Yu ting se Elda mo Sista Fasek i lusum hop from bigfala wok we tufala i gat? No i nogat. Tufala i bin save se koling blong tufala i bin kam long God. Tufala i bin prea from help long Papa long Heven, mo tufala i givim hat blong tufala fulwan long wok blong tufala.
Long taem ia, Elda Rasel M. Nelson blong Kworom blong Olgeta Twelef Aposol; Elda Hans B. Ringa, blong Olgeta Seventi; mo mi wetem Elda Fasek, i bin mitim minista blong afea blong relijin, Adam Wopatka, blong gavman blong Polan. Mifala i harem hem i talem, “Mifala i welkamem jos blong yufala long ples ia. Yufala i save bildim ol bilding; yufala i save sendem ol misinari blong yufala. Man ia,” mo poentem Julius Fasek, “i bin givim gud seves long jos blong yufala. Yufala i save talem tangkyu long hem from eksampol mo wok blong hem.”
Olsem ol Fasek, bae yumi mekem wanem we yumi mas mekem long wok blong Lod. Afta yumi save talem wetem Julius mo Doroti Fasek, ol toktok blong Ol Sam:
“Hae God ya we i mekem skae mo graon, hem nomo i stap givhan long mi.
“… Hem i no save slip, mo oltaem hem i stap lukaot gud long yumi.
“Yumi ol laen blong Isrel, mo oltaem hem i stap lukaot gud long yumi. Neva ae blong hem i kam hevi, mo neva hem i slip.” (Ol Sam 121:2–4).
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong First Presidency Message, January 2011. Bislama 09761 852
Ol Tingting blong Tij Wetem Mesej Ia
Teaching, No Greater Call i talem: “Serem wan eksperiens blong yuwan abaot olsem wanem blong laef folem wan gospel prinsipol i blesem laef blong yu. Invaetem olgeta we yu tijim blong serem smol eksperiens blong olgetawan” ([1999], 159). Ridim mesej ia mo afta askem ol famle memba huia nao Presiden Monson i bin talem blong oli mas go long wan misin. Serem ol eksperiens blong yu o ol narawan we oli bin gat taem blong stap olsem ol fultaem misinari. O serem ol plan blong yu blong givim seves olsem wan misinari long fiuja. Askem ol famle memba blong serem ol plan blong olgeta mo ol gud eksperiens blong olgeta.