Visiting Tijing Mesej, Jenuware 2011

Histri mo Laef blong Rilif Sosaeti

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Pikja

Relief Society seal

Fet • Famle • Help

Ilaesa R. Sno i talem bakegen tijing blong Profet Josef Smit se “nomata nem ia [Rilif Sosaeti] i wan nem blong tedei, sosaeti ia hem i blong longtaem bifo finis.”¹

Papa long Heven mo Pikinini blong Hem, Jisas Kraes, Tufala i bin visitim Josef Smit mo, tru long hem, ful gospel i bin kambak long wol ia. Rilif Sosaeti i bin pat blong restoresen ia. Oganaesesen blong Jos i no bin komplit kasem taem we ol sista oli bin oganaes.²

Long ol manis we oli stap kam, wanwan Visiting Tijing Mesej bae i givim janis long yumi blong lanem moa abaot histri blong Rilif Soaeti mo ol pat blong hem insaed long gospel ia we i kambak. Blong plante risen, blong andastanem histri blong yumi, hem i no impoten nomo, be, i gat nid from.

Faswan, wan andastanding blong histri blong yumi i givim tingting i kam antap long yumi blong kam ol woman blong God we yumi nidim blong kam. Taem yumi folem ol eksampol blong ol gudfala Lata-dei Sent woman ia, yumi save lanem, aot long wanem we i pas finis, olsem wanem blong fesem fiuja.³

Nambatu, histri blong yumi i tijim se ol sem prinsipol ia we i bin stap finis long Jos bifo oli stap ol stamba prinsipol blong yumi tedei. Save ia mo stamba tingting blong yumi—i blong mekem fet i kam antap mo fasin blong stap stret mo gud blong yuwan i kam antap, mekem famle mo hom i kam strong moa, mo helpem olgeta we oli stap long nid—i mekem i gat wan samting i joenem taem blong yumi bifo mo taem blong yumi tedei.

Nambatri, taem yumi tekem histri blong yumi i impoten, i mekem se yumi save serem laef blong histri blong yumi long saed blong spirit long wan gudfala wei. Presiden Henri B. Aering, Fas Kaonsela long Fas Presidensi, i bin talem: “Yu pasem histri blong laef taem yu stap helpem ol narawan blong kasem presen blong jariti. … Histri blong Rilif Sosaeti oli rekodem long ol toktok mo ol namba, be laef blong hem i pas tru long wan hat i go long narafala hat.”⁴

Blong endem, blong andastanem histri blong yumi i helpem mekem yumi kam wan impoten pat blong fiuja blong Rilif Sosaeti. Presiden Spensa W. Kimbol (1895–1985) i bin eksplenem, “Yumi save se ol woman we oli gat bigfala glad from laef blong bifo, bae oli wari long olsem wanem blong mekem wan fiuja we i gud mo i stret.”⁵

Juli B. Bek, Rilif Sosaeti jeneral presiden.

Aot long Ol Skripja

Esta 9:28–29; Rom 16:1–2; Alma 37:8; Moronae 7:45–47

I Kamaot long Histri blong Yumi

“Rilif Sosaeti i wan oganaesesen we Lod i gat blong ol woman.”⁶ Wetem paoa we hem i gat olsem wan profet, Josef Smit i bin oganaesem Rilif Sosaeti long 17 Maj 1842. Smol grup we i stap long fas miting ia, i bin gat ol defren woman we oli bin givim taem blong olgeta, olsem ol sista long Rilif Sosaeti tedei. “I gat tri we oli moa yang, mo hem we i moa olfala, i wan woman blong fifti yia. Leven long olgeta oli mared, tu long olgeta tufala i wido, sikis oli no mared yet, mo wan we yumi no save sapos hem i mared o no. Edukesen mo laef blong olgeta i defren, semmak olsem situesen blong ekonomi blong olgeta. Oli bin tokbaot plante we oli bin ol defdefren woman taem membasip blong oganaesesen ia i gohed blong gro, be oli bin mo bae oli gohed blong stap wan.”⁷

© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, January 2011. Bislama. 09761 852