Poraus seni ewe Aewin Presetensi, JANUARY 2011
Mi Namot Misineri ren ewe Samon
Non ewe October non ewe mwichenapen mwichefen ua kokko ren pwan ekkoch misineri. Iteitan anuon, mi nimenimoch me tufich ar repwe ammoneta repwe föri angangen misineri. Ena angang mi eu wisen pristut—eu wis minne ewe Samon a anamota seni kich ekkewe sia angei chommong mettoch. Ami kana anuon, ua pesei ngenikemi oupwe ammoneta ngeni angangen misineri. Oupwe sopweno non nimenimoch pwe oupwe tupuni ewe Samon. Oupwe tumunuochu inisimi me ami pochokun. Oupwe kaeo ekkewe pukfel. Ika mi tufich, oupwe fiti sukkunen seminary. Oupwe sineiochu ewe puken misineri Afanafana Ai we Kapas Allim.
Ami kana fefin, ina mo ese wor ami wisen pristut ne föri usun chok ekkewe anuon ne föri angangen misineri, oua pwan auchea non ewe angangen misineri, me sia etiwa ami angang.
Ngeni ekkewe chon Mwichefen mi chinnap, ua achema ngenikemi pwe mi namot chommong neimi oupwe föri angangen misineri fan iten ewe Samon. Ika ese mo tori om fansounen föri angangen misineri fan iten chinnap, ua pesei ngenikemi oupwe ammoneta iei, pwe nupwen a tori ewe fansoun, me nupwen oua tufich ngeni, ami me punuwemi mi oupwe tongeni föri ewe angang. Mi wor ekkoch chok fansoun nupwen oupwe apwapwaiti ewe Ngun mi Fel me ewe apwapwa epwe feito seni ami angang ngeni ewe Masta.
Iei, ekkoch neimi oupwe sau are oua pwisin ekieki pwe ouse tongeni angangoch ngeni ewe wis. Oupwe chechemeni pwe iei ewe angangen ewe Samon, me nupwen sia föri angangen ewe Samon, sipwe angei aninis seni ewe Samon. Ewe Samon epwe apochokuna ewe afar pwe epwe tongeni eki mettoch mi chou mi nom won.
Pwan ekkoch, ir mi ekieki pwe ra nimenimoch ne angang, meni ra mefi pwe epwe wor ekkoch mettoch mi aucheanap. Ua fakkun chechemeni ewe pwon seni ewe Samon: “Upwe asamonu ekkewe mi asamonu ei” (1 Samuel 2:30). Ese wor emon neich epwe sufoniti Semach won Nang me ach Chon Amanau nap seni ach sipwe föri ewe angangen misineri non napanapoch.
Eu awewen ewe angangen misineri mi napanapoch mi fis ngeni Juliusz me Dorothy Fussek, minne mi kokko epwe föri angangen misineri me non Poland. Brother Fussek a uputiw me non Poland. A sinei fosun Poland. A tongei ekkewe aramas. Sister Fussek a uputiw me non England me a chok sinei ekkis usun Poland nge ese sisinei ekkewe aramasen ikkewe. Fan iten ar epinukunuku non ewe Samon, ra feino won wiser kewe. Ese fakkun wor chiener kewe chon angang, me a fakkun watte angang repwe föri. Ese mo förata eu misin me non Poland. Wisen ekkewe chon Fussek repwe ammonata ewe an pwe epwe tongeni wor eu misin me ikkewe.
Elter me Sister Fussek ra riaffou pokiten watten wiser kewe? Apw, esap ekkis chok. Ra sinei pwe ar kokko a feito seni Kot. Ra iotek fan iten An aninis, me ra fangeno manauer kewe ne föri ei angang.
A tori ewe fansoun nupwen Elter Russell M. Nelson seni ewe Mwichen Engon me Ruemon Aposel; Elter Hans B. Ringger, seni ewe Mwichen Fik; pwan ngang, aua fiti Elter Fussek, ne churi ewe souemwenin namanam non, Adam Wopatka, seni ewe kafomen me non Poland. Aua ausening ngeni a apasa, “Aua etiwa ami we mwichefen me ikkei. Oua tongeni kouta ami kewe imwen fen; oua tongeni tinato noumi kewe misineri. Ei mwan,” a itini Juliusz Fussek, “a angangoch fan iten om we mwichefen. Oua tongeni kinisou ngeni i ren an we nenien appiru me an angang.”
Usun chok ekkewe chon Fussek, sipwe föri met mi namot fan iten angangen ewe Samon. Iwe sipwe tongeni apasata ewe Kon Fel, fiti fengen ren Juliusz me Dorothy Fussek:
“Ai aninis epwe chok feito seni ewe Samon, ewe a förata nang me fonufan
“… Esap mut ngonuk om kopwe turutiw
“Pun nengeni, ewe chon tumunu Israel ese tongeni aiesum are annut” (Psalm 121:2–4).
© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun First Presidency Message, January 2011. Chuukese. 09761 901
Afanafan seni Ei Poraus
Teaching, No Greater Call a mak: “Kopwe aporausa eu porausen pwisin manauom won ifa usun om manaueni eu nongonongen ewe kapas allim mi efeiochu manauom. Kopwe tingorei ekkewe ir ka aiti repwe aporausa usun manauer” ([1999], 159). Kopwe anneani ei poraus me mwirin kopwe eisini chon ewe famini ion Preseten Monson a apasa pwe repwe föri angangen misineri. Kopwe aporausa ekkoch porausen met a fis ngonuk nupwen ka föri angangen misineri. Are kopwe aporausa om kokkoten föri angangen misineri non fansoun mwach. Kopwe tingorei chon famini repwe aporausa ar kewe kokkot me poraus mi och.