Poraus seni Fefein Chon Amwa, January 2011

Ewe Uruo me Porausen Fin Anisi

Kopwe aneani ekkei mettoch, nupwen ka tufich, kopwe aporausa ren ekkewe fefin ka churi. Kopwe aea ekkewe kapas eis an epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Eliza R. Snow a poraus usun ewe Soufos Joseph Smith pwe a afanafana pwe “ina mo ewe it [Fin Anisi] epwe eu it minefo, ewe mwich mi fis me non fansoun noom.”¹

Semach won Nang me Noun we At, Jises Kraist, mi churi Joseph Smith me, seni i, a aniwinsefanito unusen ewe kapas allim ngeni ewe fonufan. Fin Anisi mi eu kinikinin ewe niwinsefanito. Ewe mwich me non ewe Mwichefen ese unus tori ekkewe fefin mi chufengen.²

Non ekkei maram repwe feito, eu me eu Poraus Seni Fefin Chon Amwa epwe awora ngenikich ewe tufichin kaeo usun ewe uruon ewe mwichen Fin Anisi me wisan me non ewe kapas allim mi niwinsefanito. Ren chommong popun, ach weweiti ewe uruo ese chok auchea nge mi namot.

Aewin, ach weweiti ewe uruo mi pesei ngenikich ach sipwe winiti noun Kot kewe fefin mi namot pwe sipwe winiti. Seni ach tapweno mwirin ekkewe nenien appirun Sounengin fefin, sia tongeni kaeo seni fansoun noom ifa usun sipwe sopweno non fansoun mwach.³

Oruwan, ach uruo a aitikich pwe mi nonnochok ekkewe nongonongen ewe Mwichefen me akkomw tori ikenai. Ei mirit me ach popun—ne awatteno nuku me pwisin wenechar, apochokuna famini me imw, me anisi ekkewe ir mi osupwang—ne ochufengeni fansoun noom me fansoun ikenai.

Aunungatin, nupwen sia aucheani ach uruo, sia tongeni porausoch usun ach uruo. Preseten Henry B. Eyring, Aemonun Chon Aninis me non ewe Aewin Presetensi, a apasa “Oupwe sopweno ewe uruo nupwen oua anisi ekkoch ne angei ewe niffangen tong ennet. … Ewe uruon Fin Anisi mi mak non kapas me nampa, nge ewe uruo mi sopweno seni netip ngeni netip.”⁴

Iwe saingonon, ach weweiti ach uruo mi anisikich pwe sipwe winiti eu kinikinin Fin Anisi mi auchea. Preseten Spencer W. Kimball (1895–1985) a awewei, “Sia sinei pwe fefin mi fakkun kinisou chapur ren fansoun noom repwe achocho weires ne föfföroch ne aochu fansoun mwach.”⁵

Julie B. Beck, Presetenin Fin Anisi unus.

Seni Ekkewe Pukfel

Esther 9:28–29; Rome 16:1–2; Alma 37:8; Moronai 7:45–47

Seni Ach Uruo

“Fin Anisi mi ewe mwichen ewe Samon fan iten fefin.”⁶ Non wisan pwe emon soufos, Joseph Smith a föri ewe mwichen Fin Anisi non March 17, 1842. Ewe kukkun mwich, a chufengen ren ewe akkaewin fansoun mi uren fefin mi achocho weires, mi usun chok ekkewe chon Fin Anisi ikenai. “Ekkewe mi kukkun ekkoch fopun, me chinnap, emon fefin mi ukukun nime ierin. Engon me emon nein ekkewe fefin ra fen pupunu, ruemon ra mano punuer kewe, onomon rese mo pupunu, me ese fat porausen emon fefin. Ar sukkun me angang mi sokkono, pwan usun chok ukukkun pisekisekir. Sokkofesenir kewe epwe watteno fan chommong nupwen ekkewe ir mi choni ewe mwich mi sopweno ne awatteno, nge ir eu chok.”⁷

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun Visiting Teaching Message, January 2011. Chuukese. 09761 901