Parau Poro‘i na te Peresideniraa Matamua, Tenuare 2011
Te Oraraa i te Oraraa Hau Atu i te Maitai
I te omuaraa o te hoê matahiti apî, te titau nei au i te feia mo‘a i te mau mahana hopea nei i te mau vahi atoa ia rave i te hoê tutavaraa no’na iho, u‘ana e te faufaa rahi o ta‘u e pii te oraraa hau atu i te maitai—te hoê oraraa tei î i te mau haamaitairaa, te manuïaraa, e te maitai. Mai te au i te rave‘a i faaohipahia i te fare haapiiraa no te tauturu ia tatou ia haapii mai i te mau parau tumu matamua, e pûpû atu ïa vau i ta‘u iho parau tumu matamua ma te faaohipa i na reta parau HTI no te tauturu ia tatou paatoa ia noaa te hoê oraraa hau atu i te maitai.
A faatupu i te hoê Huru Anaanatae
H i roto i ta‘u na reta parau HTI o te huru ïa. Ua papa‘i o William James, te hoê feruri parau e taote hi‘opo‘a atoa i te feruriraa taata no te fenua Marite i tahito ra, « te iteraa rahi roa‘e tei noaa mai i to tatou u‘i o te iteraa ïa e e nehenehe ta te mau taata e taui i te hi‘oraa rapae no to ratou mau oraraa na roto i te tauiraa i te huru rapae o to ratou mau feruriraa ».1
Te rahiraa o te mea e tupu i roto i te oraraa tei te huru ïa o to tatou huru. Na te huru o ta tatou ma‘itiraa i te hi‘o atu i te mau mea e te pahonoraa atu ia vetahi ê e faatupu i te taato‘araa o te huru-ê-raa. Te raveraa i te mea maitai roa‘e ta tatou e nehenehe e rave e te ma‘itiraa i muri iho ia oaoa i te mau mea atoa e tupu mai i ni‘a iho ia tatou, noa’tu te huru o taua mau mea ra, e nehenehe ïa te reira e afa‘i mai i te hau e te oaoa.
Ua parau o Charles Swindoll—e taata papa‘i buka, e orometua haapii e e orometua Keresetiano—e : « No‘u nei, e mea faufaa a‘e te huru… i te mea tahito… i te moni, i te mau tumu, i te mau topatariraa, i te mau manuïaraa, i te mea ta te tahi atu mau taata e feruri aore râ e parau aore râ e rave. E mea faufaa a‘e te reira i te mau hi‘oraa, i te aravihi aore râ i te ite. E mea faufaa a‘e te reira i te mau hi‘oraa, i te aravihi aore râ i te ite. E faatupu aore râ e vavahi te reira i te hoê taiete, te hoê ekalesia, te hoê utuafare. Te mea faahiahia roa tei ia tatou ïa te ma‘itiraa i te mau mahana atoa i te huru ta tatou e rave no taua mahana ra ».2
Eita ta tatou e nehenehe e arata‘i i te tereraa o te mata‘i, e nehenehe râ ta tatou e faatiti‘aifaro i te mau ie. No te hoê oaoa rahi, te hau e te poupou, ia ma‘iti ana‘e tatou i te hoê huru anaanatae.
A Ti‘aturi ia Outou iho
T no te ti‘aturi—ia outou iho, i te feia i piha‘iho ia outou, e i te mau ture mure ore.
Ia vai parau-ti‘a noa outou ia outou iho, ia vetahi ê e i to outou Metua i te Ao ra. Te hoê taata tei ore i vai parau-ti‘a i mua i te Atua e tae noa’tu ua maoro roa o te Karatino Wolsey ïa tei ora mai te au i te papa‘iraa a Shakespeare i te hoê oraraa roa i te taviniraa e toru arii e tei fana‘o i te moni e i te mana. I te pae hopea, ua faaerehia oia i to’na ra mana e ta’na mau taoa na te hoê arii faaoroma‘i ore. Ua ta‘i te Karatino Wolsey :
Ahani vau i tavini noa i to‘u Atua i te afaraa o te itoito
I te taviniraa i to‘u arii, eita roa ïa Oia e
Vaiiho vaitaha noa ia‘u i mua i to‘u ra mau enemi.3
Ua papa‘i o Thomas Fuller, te hoê taata Paratane faatere Ekalesia e e taata papa‘i aai atoa tei ora na i te 17raa o te tenetere, i teie nei parau mau : « Te taata o te ore i ora mai te au i to’na faaroo aita ïa oia e ti‘aturi ra ».4
Eiaha e ta‘oti‘a ia outou iho e eiaha e vaiiho ia vetahi ê ia parau mai ia outou e ua ta‘oti‘ahia outou i roto i te mea ta outou e nehenehe e rave. A ti‘aturi ia outou iho e i muri iho a ora ia noaa ia outou ta outou mau tutavaraa.
E nehenehe outou e faatupu i te mea ta outou i ti‘aturi e e nehenehe ia outou. A ti‘aturi e a mau i te faaroo.
A Faaruru i te mau Titauraa ma te Itoito
E riro mai te itoito ei viretu hoonahia e te faufaa rahi ia ore ana‘e te reira e faarirohia mai te hoê hinaaro o te hoê taata ia pohe, mai te hoê râ faaotiraa ia ora maitai.
Ua parau te taata papa‘i buka Marite o Ralph Waldo Emerson : « Noa’tu eaha ta outou e rave, e ti‘a ia outou ia farii i te itoito. Noa’tu eaha te e‘a ta outou e faaoti i te rave, e vai noa mai â te tahi taata no te parau mai ia outou e ua hape outou. E vai noa mai â te mau fifi o te tupu mai no te faahema ia outou ia ti‘aturi e ua tano te mau faahaparaa. E titau te faataaraa i te hoê faaotiraa ohipa e te peeraa i te reira e tae atu i te hopea i te tahi o taua itoito ra e hinaarohia e te hoê taata faehau. Te vai ra te mau manuïaraa no te hau, e titauhia râ te mau tane e te mau vahine itoito no te faatupu i te reira ».5
Te vai ra te mau taime e ri‘ari‘a e e paruparu outou. E mana‘o paha outou e aita outou i manuïa. E au ra paha e ohipa rahi roa te noaaraa te upooti‘araa. I te tahi mau taime e au ra ua riro outou mai ia Davida e tamata ra i te aro atu ia Golia. A haamana‘o râ—ua upooti‘a o Davida !
E titauhia te itoito no te taahiraa matamua no te tutava i te fâ ta te hoê e hiaai ra, e titauhia râ te hoê itoito rahi atu â ia paruparu ana‘e te hoê taata e e ti‘a ia’na ia faaitoito â ia tapae i taua fâ ra.
A rave i te faaotiraa ia faaitoito, ia hoê te mana‘o no te haa no te hoê fâ maitai, e te itoito eiaha noa no te faaruru atu i te mau titauraa o te tae mai ihoa, no te rave râ i te piti o te maile mai te mea e titauhia. Ua riro te itoito i te tahi mau taime ei reo ha‘iha‘i i te hopea o te mahana o te parau mai e, « E tamata faahou â vau ananahi ».
Ia haamana‘o tatou i teie nei na parau tumu HTI a omua‘i tatou i to tatou tere i roto i te matahiti apî, ma te faatupu i te hoê huru anaanatae, te hoê ti‘aturiraa e e nehenehe ta tatou e tapae i ta tatou mau fâ e i ta tatou mau faaotiraa, e te itoito no te faaruru i te mau tamataraa atoa e nehenehe e tae mai i ni‘a i to tatou e‘a. I reira ïa to tatou oraraa e riro ai ei oraraa hau atu i te maitai.
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no First Presidency Message, January 2011. Tahitian. 09761 895
Haapiiraa no roto mai i teie parau poro‘i
A haamana‘o i te ani i te mau melo o te utuafare ia faaite mai i te mau mea tei tupu ia ratou i te taime ua tauturu te hoê huru anaanatae, te ti‘aturiraa ia ratou iho, aore râ te itoito ia ratou. Aore râ a ani ia ratou ia imi i te mau hi‘oraa no teie nei na parau tumu e toru i roto i te mau papa‘iraa mo‘a. E nehenehe ta outou e faaineine i te haapii na roto i te feruriraa na roto i te pure i te mau papa‘iraa mo‘a e te mau mea tei tupu ia outou iho.