Parau Poro‘i na te mau Tuahine Hahaere, Tenuare 2011
Te Aamu e te Faufaa Ai‘a o te Sotaiete Tauturu
A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i ta outou mau tuahine e ia faariro i te Sotaite Tauturu ei tuhaa itoito no to outou iho oraraa.
Faaroo • Utuafare • Tamahanahana
Ua haamana‘o o Eliza R. Snow i te haapiiraa a te peropheta Iosepha Semita e « noa’tu e mea apî paha te i‘oa [Sotaiete Tauturu], e mea tahito râ te faanahoraa ».1
Ua fâ mai te Metua i te Ao ra e Ta’na Tamaiti, o Iesu Mesia ia Iosepha Semita e, na roto atu ia’na, ua faaho‘ihia mai te îraa o te evanelia i ni‘a i te fenua nei. Ua riro te Sotaiete Tauturu ei tuhaa no taua faaho‘i-raa-hia mai. Aita te faanahoraa o te Ekalesia i hope roa e tae noa’tu ua faanahonahohia te mau tuahine.2
I te mau ava‘e i mua nei, e horo‘a mai te parau poro‘i tata‘itahi a te mau tuahine hahaere ia tatou i te rave‘a no te haapii mai â no ni‘a i te aamu o te Sotaiete Tauturu e ta’na tuhaa i roto i te evanelia tei faaho‘ihia mai. No te mau tumu e rave rahi, te iteraa i to tatou aamu eita ia e riro noa e mea faufaa e mea faufaa rahi roa râ.
A tahi, e faaurû te hoê iteraa no ni‘a i to tatou aamu ia tatou ia riro ei mau vahine a te Atua e ti‘a ia tatou ia riro. Na roto i te peeraa i te mau hi‘oraa o te mau vahine hanahana feia mo‘a i te mau mahana hopea nei, e nehenehe ta tatou e haapii mai na roto i te mau mea no mutaa ihora nahea ia faaruru i te mau mea i mua ia tatou.3
Te piti, te haapii nei to tatou aamu e te mau parau tumu i vai na i roto i te Ekalesia i mutaa ihora o to tatou ïa mau parau tumu i teie nei mahana. E faatupu teie nei ite e ta tatou mau opuaraa—no te faarahi i te faaroo e to tatou iho parau-ti‘a, no te haapuai i te mau utuafare e te mau nohoraa, e no te tauturu i te feia i roto i te fifi—i te hoê tu‘atiraa o te huru i mutaa ihora e to tatou huru i teie nei mahana.
Te toru, ia haafaufaa ana‘e tatou i to tatou aamu, e nehenehe a‘e ïa ia tatou ia faaite i ta tatou faufaa ai‘a varua. Ua parau te peresideni Henry B. Eyring, Tauturu Hoê i roto i te Peresideniraa Matamua e : « E opere outou i te faufaa ai‘a ia tauturu ana‘e outou i te tahi atu mau taata ia farii i te horo‘araa o te aroha. … Ua papa‘ihia te aamu no te Sotaiete Tauturu na roto i te mau parau e te mau numera, te faufaa ai‘a râ e horo‘ahia ïa mai te tahi aau i te tahi atu aau ».4
I te pae hopea, e tauturu te iteraa i to tatou aamu ia faariro ia tatou ei tuhaa maitai no te oraraa o te Sotaiete Tauturu i mua nei. Ua haamaramarama mai te peresideni Spencer W. Kimball (1895–1985), « Ua ite tatou e te mau vahine te vaira to ratou mauruururaa hohonu no te mau mea no mutaa ihora e haape‘ape‘a ïa ratou no te faanaho i te hoê oraraa parau-ti‘a no te tau i mua ».5
Julie B. Beck, Peresideni rahi no te Sotaiete Tauturu.
No roto mai i te mau papa‘iraa mo‘a
No roto mai i ta tatou aamu
« Te Sotaiete Tauturu o te faanahonahoraa ïa a te Fatu no te mau vahine ».6 Na roto i to’na ti‘araa ei peropheta, ua faanahonaho o Iosepha Semita i te Sotaiete Tauturu i te 17 no mati 1842. Te pŭpŭ na‘ina‘i e tei rau te huru i taua apooraa matamua tei haamo‘ahia na te mau vahine itoito, mai te mau tuahine no te Sotaiete Tauturu i teie nei mahana. « Te tuahine apî roa e toru ïa na tamahine, e te tuahine paari roa‘e, o te hoê ïa vahine i roto i te pae ahururaa o to’na matahiti. Hoê ahuru ma hoê vahine tei faaipoipohia, e piti vahine ivi, e ono aita i faaipoipohia, e hoê vahine aita i itehia te ti‘araa. Ua rau te huru o to ratou ite i te pae haapiiraa e to ratou huru, e to ratou atoa oraraa faufaa. Ua rahi noa’tu â to ratou rauraa a tamau noa’i te numera o te mau vahine i te rahi, ua hoê râ ratou e ua tamau noa ratou i te vai hoêraa ».7
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, January 2011. Tahitian. 09761 895