Mulwol ko Bin Somm’on e Presidency
Somoel e B’tuf e Tamachib rok
Bin tomur e Ulung nib gaa’ u October, e kug pinning boech e tamachib nib yo’or. Urngin e pum’on nib fel’ yangren, nib yul’yul’ thingari fal’eg rogon ni ngan pigpig koreb e mission. Pigpig nem e murwel fa tin nib t’uf—ko priesthood ya Somoel e ma ning ni bo’or rok’ e gidii’ ni ke pii’ nib bo’or ngorad. Pi pum’on nib fel’ yangren, gu chilen ngomed ni ngam fal’eg rogmed ni ngan pigpig koreb e mission. Mu fol ko motochiyil, paer nib biech nge yul’yul’ ni nge yog ni ngam pigpig ngak Somoel. Mu tay fan e dowef rom nge gelngim. Mu fil rogon ko pi babyor nib thothup. Fa’anre ba’, mu un ko seminary nge institute. Mu fil rogon e pin’en ni bay u lane babyor ko tamachib ni Machib nag e Gospel Rog.
Pi ppin ni fel’ yangren, gimed e dariy e priesthood boed rogon e pi pagal, machane ku rayog ni ngam ayuweg nib yo’or udaken e muruwel ko tamachib. Gimed e rib ga’fan ko pi muruwel ko tamachib, ma gamad be falflan’ napan mu pigpig nag e mission.
Ko pi ppin nge pum’on nib elal u lane Galasia, gu pinning u wun’med e nangaen’ ni Somoel b’tuf bo’or nib bo’or e gimed ni ngam pigpig nag e mission. Fa’anre chineye dabiyog ni ngam pigpig nag e mission rok ppin fa pum’on rom, gu be wenig ngomed ni ngam fal’eg rogmed ko re rran, fa’anre rayog, napan ku rayog ni ngam manged e missionary. Mus ni bachuw e ngiyal u lane yafos romed napan rayog ni ngam falflan’ gad min thamiy e Kan Thothup t’ab rogon ko pi tamachib nma murweliyed e tin ku Somoel.
Ya chiney, sana boech i med e ma tamra’ u wun’med, boech i med ma lemnag ni dabiyog ni ngam pigpig gad. Mu tay u wun’med ni iraray e muruwel ko Somoel, ma napan gadad be muruwliy e tin ko Somoel, rayog ngodad e ayuw rok Somoel. Somoel era fal’eg e keru’ dad ni nge chibiy ngalang e tin nib tomal.
Yug boech e gidii, mus ni yad be yul’yul’, ma thammiy ni bay e muruwel rorad nib ga’ fan ko muruwel ko tamachib. Machane gu tay nib ga’ fan u wun’ ug e micheg rok Somoel: “Bay gu tay fan e pi’in yad be tay fag” (1 Samuel 2:30). Dariy reb e rogon ni ngad tay’ed fan e Chitimangdad nu Tharmiy nge Somoel rodad, mus ni fa’anre gadad manged e tamachib nib yul’yul’ nib sug ko t’ufeg.
Yug reb e sasun ko ren’ey e tin ni ke buch ngak Juliusz nge Dorothy Fussek, ni kan pinnin ni ngan muruwel ko mission u Poland. Brother Fussek e kan gargeleg u Poland. Ke nang e thin rorad. Rib t’uf ngak e gidii’ urom. Sister Fussek kan gargeleg u England ma de nang ban’en ko fare nam u Poland fa gidii’ riy. Kar tayew e pagan’ rorow ngak Somoel, mar ronow ni ngar mugu’uliyew e muruwel rorow. Rib mom’aw e muruwel rorow, ma rib ga’. Doworiyi fal’eg e mission ko chirofen nem u Poland. Pi muruwel ni ke pii’ ngak Brother nge Sister Fussek e ngar fal’egew e dayif u Poland ni nge yog e mission urom.
Ya ke kireban’ Elder nge Sister Fussek ni bachan rib mom’aw e muruwel rorow? Dani buch bangiyal. Kar nanged e muruwel rorow nikeb rok Got. Kar meybil gow, kar ningew e ayuw Rok, ma kar m’ag u wun’row e muruwel rorow.
Ma ngiyal nam Elder Russell M. Nelson ko re Ulung ko Ragag nge L’agruw e Apostles; Elder Hans B. Ringger, ko fare Ulung ko Medlip I ragag; nge gag, ke un Elder Fussek min mada’ niged Adam Wopatka ni fare minister ko taliw rok e nam nu Poland. Kug rungaged e thin rok, “Galasia romed e mangil uroy. Rayog ni ngam toyed e pi na’un romed; rayog ni ngam lo’eged e pi tamachib romed. Cha’ney,’ ke yog, ni ke yip pa’ ngak Juliusz Fussek, “ke pigpig ko galasia romed nib fel’ rogon. Rayog ni ngam fal’flan’ ngak ko urungin e wok nge muruwel rok.”
Boed Brother nge Sister Fussek, thingar da gayed rogon ni ngad muruwliyed e ti rok’ Somoel. Fin ni mu’, rayog ni ngad uned Juliusz nge Dorthy Fussek ko re Psalm:
“Somoel e ma yib e ayuw rok ngog, ni Ir e sunmiy e tharmiy nge but’,
“… en ni yoror rom e ke par ni be od!
“En ni yoror rok piyu Israel e der ma yib e chuchuw ngak ma der mol” (Psalm 121:2–4).
© 2011 by Intellectual Reserve, Inc. Gubin ni mat’won ma bay. Kan yoloey u Mariken. Kan micheg ko thin nu Ngalis: 6/10. Pilyeg kan fanay: 6/10. Ni pilyeg ko First Presidency Message, January 2011. Yapese. 09761 905
Tin ni yibe Fil ko Biney e Mulwol
Teaching, No Greater Call ma yoeg: “Mu weliy ko uragon ke mon’og e paer rom napan kam fol koreb e kengin e gospel. Mu pinning e gidii’ mu fil ngorad ni ngar puruy niged e pi yafos rorad” ([1999], 159). Mu bi’eg e biney e mulwol, fini mu’ mu ning ko pi chongin e tabinaw ko minii’ ni ke yog President Monson thingari pigpig nag e mission. Mu weliy boech e tin ni ke buch ngom fa ngak yug bee’ ngayal e e mission rok. Fa mu weliy ni gabadag ni ngam pigpig nag ko mission nga m’on ko yafos rom. Mu ning ko pi chongin e tabinaw ni ngar puruy niged marnga’agen e pi duwgliy rorad nge tin ni ke buch ngorad.