An Fefin Chon Amwa Poraus, February 2011

Eu Aniwinsefaniton Mettoch Meinisin

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis ne anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Ewe Soufos Joseph Smith a föri ewe mwichen Fin Anisi pwe eu kinikinin ewe Mwichefen mi auchea. Non am we presetensi, aua anean pwe aupwe anisuk om kopwe weweiti pwata Fin Anisi mi namot non manauom.

Sia sinei pwe ekkewe fefin me non ewe Testamen Sofo ra pwäratä nuku non Jises Kraist me ra fiti An angang. Luke 10:39 a ereni Meri, minne a “mommot ren pechen ewe Samon o a ausening ngeni an afanafan.” Non John 11:27 Martha a kapasen pwäratä usun Kraist: “Neminnewe a ponuweni, Ewer Samon. Ua nuku pwe en ewe Messiah ewe Noun Kot, ewe epwe feito won fonufan.” Föfför 9:36, 39 a kapas usun “emon fefin mi nuku itan Tabitha, … a chok föfför murinno. … ekkewe fefin meinisin a mano punuer ra nom ikewe … ra eppi ngeni ekkewe soch meinisin pwan ekkewe sekit [a] föri.” Phebe, me non Rome 16:1–2, ewe “a angang ngeni ewe mwichipin” me “a kirorkioch ngeni chommong aramas.”

Ikkei usun angangen nuku, kapasen pwäratä, me angang mi sopweno non ewe Mwichefenin ikenai me ra ochuno ren föfförun ewe mwichen Fin Anisi. Julie B. Beck, presetenin ewe mwichenapen mwichen Fin Anisi, a aiti kich: “Usun chok ewe Chon Amanau a tingorei Meri me Martha seni ewe Testamen Sofo ar rpewe fiti I non an angang, fefin non ei fansoun ra angei ewe wis ne fiti ewe angangen ewe Samon. … Ewe mwichen Fin Anisi me non 1842 ra aea ewe manamanen ekkewe fefin me wiser kewe ne aueta muun ewe Samon.”¹

Sia aponueta ach angang nupwen sia achocho ngeni auchean popun ewe Fin Anisi: ne awatteno nuku me pwisin wenechar, apochokuna famini me imw, me kutta me anisi ekkewe ir mi osupwang.

Ua pwäratä pwe Fin Anisi a for an epwe aninis non ewe angangen manau ese much. Emon me emon fefin non ewe mwichen Fin Anisi mi wor wisan ne föri ei angang mi pin.

Silvia H. Allred, aewin chon aninis non ewe mwichen Fin Anisi presetensi.

Seni ekkewe Pukfel

Joel 2:28–29; Luke 10:38–42; Efisus 1:10

Seni Ach Uruo

Sister Julie B. Beck a aiti kich pwe “sia sinei seni ewe Soufos Joseph Smith pwe Fin Anisi mi eu kinikinin ewe Aniwinsefanito.”² Ewe angangen niwinsefanito a poputa ren ewe Aewin Nemasepwi me non 1820 me a sopweno kapas me kapas, ekkis me ekkis (D&C 98:12). Nupwen ewe mwichen Fin Anisi a för non March 17, 1842, ewe Soufos a aiti ekkewe fefin usun wiser me non ewe Mwichefen mi niwinsefanito. A apasa, “Ewe Mwichefen ese fakkun foroch tori ekkewe fefin ra chufengen non eu mwich.”³

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Merika: 6/10. Kapungunon chiakun: 6/10. Chiakun Visiting Teaching Message, February 2011. Chuukese. 09762 901

Met Ua Tongeni Föri?

Met aninis ua tongeni awora ngeni pwii kewe non ei maram mi pwäratä ewe nuku seni ekkewe fefin mi chon kunon Jises Kraist?
Met afanafan seni ewe kapas allim mi niwinsefanito upwe kaeo ne apochokuna ai kapasen pwäratä non ei maram?