Poraus seni ewe Aewin Presetensi, February 2011

Epwe Watte Om Pwapwa

Seni Preseten Henry B. Eyring

Aewin Chon Aninis non ewe Aewin Presetensi

Ekkoch chok mettoch mi awora pwapwa chapur nap seni om kopwe sinei pwe ka anisi ekkoch aramas ra etiwa ewe kapas allimen Jises Kraist me non netiper. Ena pwapwa mi eu tufich ngeni iteitan chon ewe Mwichefen. Nupwen sia paptais, sia föri eu pwon pwe sipwe “utano pwe [kich] chon pwäratä Kot ren mettoch meinisin non fansoun meinisin, me non sakkopaten neni meinisin [kich] mi nom non, tori mano, pwe [sipwe] manaueta ren Kot, o anea nein ekkewe repwe fiti ewe aeuin manausefanita pwe [sipwe] angei ewe manau ese much” (Mosaia 18:9).

Meinisin ekkewe chon mwichefen ra etiwa wisen ewe Mwichefen ne uwei ewe kapas allimen Jises Kraist ngeni ewe fonufan, ian chok me ukukun tamen ar manau. Ewe Samon a affata non an porous: Nengeni, ua tini kemino oupwe kapasen pwäratä me pesei ngeni ekkewe aramas, me a winiti wisen aramas meinisin repwe pesepes ne kapasen aurour ngeni chon orur (nengeni D&C 88:81). Misineri ra angei ewe manaman ne aiti ekkewe rese mo choni ewe Mwichefen. Chon ewe Mwichefen ra angei ewe manaman ne kuna ekkewe ir minne ewe Samon a ammonata fan iten ekkewe misineri ar repwe afanafan ngenir.

Mi namot pwe sipwe anganga ach nuku pwe ewe Samon a ammonata aramas unukuch pwe repwe kaeo. A sinei ion me inet ra monota, me A tongeni emweni kich ngenir seni manamanen ewe Ngun mi Fel me epwe ngeni kich ekkewe kapas ach sipwe tingorer ar repwe kaeo. Ewe pwon ewe Samon a ngeni emon misineri non 1832 iei pwan ewe pwon A ngeni kich pwe wisach sipwe kutta aramas mi monota ar repwe kaeo seni ekkewe misineri: Upwe tinatiw won i ewe Ngun mi Fel, minne epwe aiti i ewe ennet me ewe an minne epwe feino won; me ika a nukuchar, upwe awora ngeni i efeioch chapur (negeni D&C 79:2–3).

Me ewe pwonen pwapwa ese much fan iten ewe misineri mi wenechar iei pwan ach ewe pwon nupwen kich chon ei mwichefen sia fangeno netipach ngeni ewe angangen misineri:

Me iei, ika om pwapwa epwe napano ren emon ngun ka emweni ngeniei me non ewe muun Semei we, epwe ifa ukukun om pwapwa ika ka tongeni emweni chommong ngun ngeniei!

Nengeni, ka angei ai ewe kapas allim mwom, me ai we fau, me ai manau ese much.

Kopwe tingorei ewe Samon non itei, non nuku pwe kopwe angei, me kopwe angei ewe Ngun mi Fel, minne a pwäratä mettoch meinisin mi namot ngeni ekkewe noun aramas (nengeni D&C 18:16–18).

Fiti ewe Ngun mi Fel ne anisikich ne esinna me tingorei ekkewe ra monota ne kaeo, ewe Samon a pwan kokkori me aiti souemwen ne emwenikich. Non echo taropwe a mak non February 28, 2002, ewe Aewin Presetensi a ewisa ngeni ekkewe pisop me wart ar föri angangen misineri.¹ Ren aninis seni ewe mwichen wart ika pranch, ewe mwichen souemwenin pristut a föri eu kokkoten angangen misineri ren ewe wart ika pranch. Non ewe kokkot mi wor ekkoch ekiek won ifa usun chon mwichefen repwe tongeni kuna ekkewe ir mi monota ne kaeo seni ekkewe misineri. Mi wor emon aramas mi kokko ngeni wisen wart ika pranch souemwenin misin. Ena souemwenin misin a wisen angang ngeni ekkewe misineri me ekkewe chon mochen rong ewe kapas allim.

Mi wor chommong an minne ka tongeni föri pwisin wisom ne aninis ne kutta aramas fan iten ekkewe misineri pwe repwe aitir. Ewe an mi mecheres epwe och.

Iotek ne angei emwen seni ewe Ngun mi Fel. Kopwe kapas ngeni ekkewe souemwen me ekkewe misineri, me kopwe tingorer aninis me pwon ngenir pwe kopwe anisir. Kopwe pesei ekkewe ir mi fituk ne achocho non ei angang. Me kopwe emon chon pwäratä non mettoch meinisin non om kapas me met ka föri pwe Jises mi ewe Kraist me Kot a pwonueni iotek.

Ua pwäratä pwe ewe Ngun mi Fel epwe emwenuk ngeni ekkewe ra kukutta ewe ennet nupwen ka iotek me angang ren aninisin emwen. Me ua sinei seni ai angang pwe om pwapwa epwe nomotam ren ekkewe ir mi finata ne etiwa ewe kapas allim me non netiper me achocho tori nesoponon non nuku.

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Merika: 6/10. Kapungunon chiakun: 6/10. Chiakun First Presidency Message, February 2011. Chuukese. 09762 901

Afanafan seni Ei Poraus

Teaching, No Greater Call a aitingenikich ach sipwe pesei ngeni ekkewe sia aitir ar repwe achocho weires me anisir ne manaueni ekkewe nongonong ra fen kaeo (nengeni peich 159). Ren ewe famini, oupwe esinna ekkewe efeiochun angangen misineri mi mak seni Preseten Eyring me, ika ka mefi, kopwe tingorei ewe famini repwe achocho ngeni ar repwe aporausa ewe kapas allim.
Kopwe ekieki ren ewe famini usun ekkoch anen aporausa ewe kapas allim, me oupwe chechemeni an Preseten Eyring kewe kapas pwe “ewe an mi mecheres epwe och.” Ne kaeo pwan och usun ekiek fengen, kopwe nengeni Teaching, No Greater Call, peich 160.