Feia apî
Te pae maitai o te hoê hohoniraa uri
I te tau mahanahana no te matahiti 2009, ua hohonihia to‘u hoho‘a mata na te uri a to‘u hoa. Ua mutu roa to‘u utu e ua titauhia ia nirahia.
I muri a‘e i te ati, ua hepohepo roa vau. Ua vaiiho vau i te mau tamataraa ia upooti‘a i ni‘a i to‘u mau mana‘o, e e au ra ua ino roa to‘u nei oraraa taatoa. Ua haapa‘o rahi roa vau i to‘u utu e aita roa’tu vau i hinaaro i te haere i mua i te taata. I roto i to‘u feruriraa ua haamou roa teie nei ati i ta‘u mau opuaraa no te ha‘uti i te piana, i te pairaa popo, no te haere i te pureraa, no te au e no te haapiiraa.
I te mau taime râ ia pure ana‘e vau, ia farii vau i te mau haamaitairaa autahu‘araa, ia aparau vau i to‘u na metua, e ia haere mai to‘u nei utuafare e to‘u mau hoa e farerei ia‘u, ua anaanataehia vau e ua ite au i te oaoa i roto i te taime oto. Aita i maoro roa ua ite a‘e ra vau e ia mana‘o ana‘e te mau taata no ni‘a i to‘u nei pepe, e tupu ïa te aroha i roto ia ratou.
Na teie ohipa tei tupu i tauturu i te patu i to‘u huru taata, e ua haapii mai au e eiaha e haape‘ape‘a i te mea ta te tahi atu mau taata e mana‘o ra no‘u. Ua haamaitai-atoa-hia vau no te mea ua tauturu to‘u nei pepe ia‘u ia ite e e ti‘a ia‘u ia faaiti i te haapa‘o ia‘u iho e ia haamata i te haapa‘o rahi atu ia vetahi ê. Ua haapuai-rahi-hia to‘u nei varua i roto i teie nei taime.
Ua haapii mai au e ua riro te tamataraa ei tufaa no te opuaraa a to tatou Metua i te Ao ra no tatou. Mai te mea e hi‘o tatou i te maitai eiaha i te ino, e nehenehe ïa ta tatou e upooti‘a i ni‘a i te tamataraa, ia riro ei taata maitai a‘e, e ia vaiiho i te ohipa tei tupu ia haapuai i to tatou iteraa papû.