2011
I raro a‘e i te Autahu‘araa e mai te au i te Hoho‘a o te Autahu‘araa
Mati 2011

Parau poro‘i na te mau tuahine hahaere, Mati 2011

I raro a‘e i te Autahu‘araa e mai te au i te Hoho‘a o te Autahu‘araa

A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.

Hōho’a
Relief Society seal

Faaroo • Utuafare • Tamahanahana

E to‘u mau tuahine here e, auê tatou i te haamaitaihia ! E ere noa tatou ei mau melo no te Ekalesia, e melo atoa râ tatou no te Sotaiete Tauturu – « te faanahonahoraa a te Fatu no te mau vahine ».1 Ua riro te Sotaiete Tauturu ei tapa‘o faaite no te here o te Atua no Ta’na mau tamahine.

Aita anei to outou aau e oaoa ra a haamana‘o ai outou i te mau omuaraa oaoa no teie sotaiete ? I te 17 no mati 1842, ua faanahonaho te peropheta Iosepha Semita i te mau tuahine « i raro a‘e i te autahu‘araa mai te au i te hoho‘a no te autahu‘araa ».2

Na roto i faanaho-raa-hia « i raro a‘e i te autahu‘araa » i horo‘a i te mau tuahine te mana faatere e te arata‘iraa. Ua haapii o Eliza R. Snow, te piti o te peresideni rahi no te Sotaiete Tauturu, e « eita te Sotaiete Tauturu e vai mai ma te autahu‘araa ore, no te mea no roto mai ho‘i te taatoaraa o to’na mana e to’na maitai i taua autahu‘araa ra ».3 Ua haamaramarama o Elder Dallin H. Oaks no te Pŭpŭ no te Tino Ahuru ma Piti Aposetolo e, « te mana faatere o te faaohipahia e te feia faatere e te mau orometua haapii no te Sotaiete Tauturu … o te mana ïa o te tae atu ia ratou na roto i to ratou tu‘atiraa’tu i te Ekalesia a Iesu Mesia no te Feia Mo‘a i te mau Mahana Hopea nei e na roto i to ratou faataa-tata‘itahi-raa-hia i raro a‘e i te rima o te feia faatere autahu‘araa tei pii ia ratou ».4

Na roto i te faanaho-raa-hia « mai te au i te hoho‘a no te autahu‘araa » i horo‘a i te mau tuahine te mau hopoi‘a mo‘a. Ua haamaramarama mai o Julie B. Beck, te peresideni rahi no te Sotaiete Tauturu e, « te ohipa nei tatou mai te au i te autahu‘araa – oia ho‘i te imi nei, te farii nei e te rave nei tatou mai te au i te heheuraa ; te rave nei tatou i te mau faaotiraa na roto i te mau apooraa ; e te haape‘ape‘a nei tatou ia tatou no te atuatu-tata‘itahi-raa i te mau taata. Ta tatou opuaraa no te autahu‘araa o te faaineineraa ïa ia tatou iho no te mau haamaitairaa no te ora mure ore na roto i te raveraa e te haapa‘oraa i te mau fafauraa. No reira, mai to tatou mau taea‘e tei mau i te autahu‘araa, ta tatou ohipa e ohipa ïa no te faaoraraa, no te taviniraa e te riroraa ei hoê nunaa mo‘a ».5

Barbara Thompson, tauturu piti i roto i te peresideniraa rahi o te Sotaiete Tauturu.

No roto mai i te mau papa‘iraa mo‘a

1 Korinetia 11:11 ; Te Parau Haapiiraa e te Mau Parau Fafau 25:3 ; 121:36–46

No roto mai i To Tatou Aamu

I roto i te tau paturaa no te hiero no Nauvoo, ua hinaaro te hoê pŭpŭ tuahine i te faanahonaho ia ratou no te tauturu i te ohipa paturaa fare. Ua papa‘i o Eliza R. Snow ei păpă ture no teie pŭpŭ apî. I to’na faaiteraa’tu i te reira mau păpă ture i te peropheta Iosepha Semita, ua pahono mai oia : « A parau i te mau tuahine e ua fariihia ta ratou ô e te Fatu, e te vai nei Ta’na te tahi mea maitai a‘e no ratou. … E faanahonaho vau i te mau vahine i raro a‘e i te autahu‘araa mai te au i te hoho‘a no te autahu‘araa ».6 Tau taime poto noa i muri mai, ua parau te peropheta i te Sotaiete Tauturu tei faanaho-apî-hia : « Te horoa’tu nei au i teie taime i te taviri ia outou i te i‘oa o te Atua, e e oaoa teie Sotaiete, e e tahe atu te ite e te maramarama mai teie atu taime ».7 Ua titauhia te mau tuahine ia ti‘a i ni‘a i te hoê faito apî no te mo‘araa e ia faaineine no te mau oro‘a autahu‘araa o te fatata i te faaterehia i roto i te hiero.

© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, March 2011. Tahitian. 09763 895

Te mau Nota

  1. Spencer W. Kimball, « Relief Society—Its Promise and Potential », Ensign, Mati 1976, 4.

  2. Iosepha Semita, faahitihia i roto i te Sarah Granger Kimball, « Auto-biography », Woman’s Exponent, 1 no tetepa 1883, 51.

  3. Eliza R. Snow, « Female Relief Society », Deseret News, 22 no eperera 1868, 81.

  4. Dallin H. Oaks, « The Relief Society and the Church », Ensign, Me 1992, 36.

  5. Julie B. Beck, « Sotaiete Tauturu : Te Hoê Ohipa Mo‘a », Liahona, Novema 2009, 111.

  6. Iosepha Semita, faahitihia i roto i te Kimball, « Auto-biography », 51.

  7. Te mau Haapiiraa a te mau Peresideni o te Ekalesia : Iosepha Semita (2007), 451.

Eaha ta‘u e nehenehe e rave ?

  1. Nahea ta‘u e nehenehe e tauturu i te mau tuahine ta‘u e hahaere ra ia oaoa i te mau haamaitairaa no te ohipa mo‘a a te Sotaiete Tauturu ?

  2. Eaha ïa ta‘u e rave i teie ava‘e no te faarahi i to‘u aravihi i te farii i te heheuraa no‘u iho ?

Nene’i