Rongorongo man te Moani Beretitentii, Maati 2011
Taratara ibukin te Raoiroi
Inanon taratarakin te mweenga ae boou, taanga aika kairake ibukiia aika a itiaki a taetae nakoia kaain rarikiia ibukin rongorongoia kaain te kawa ma reireina.
Temanna te aine are a taetae nakoina e taekina te reirei are e kareireia iai natina. “Aio bon te tabo ae bon te kabanea n rangin tamaroa! Te mataniwi n te reirei e rangi n tikaua n rerei man tamaroa,taan reirei a rangi ni mwaatai raoi, akoi ao ni iraorao. I bon rangi ni kukurei bwa ara ataei a reirei n te reirei ae rangi tamaroa. Ko na bon rangi n tangiria ikai!”
Temanna te aine ae kaokoro are e taekina taekan aia reirei natina: “Bon te tabo ae rangin buakaka. Te mataniwii n te reirei e a bon ti tabe naba ma arona, taan reirei a tuai bane aroia, a buakaka, ao aki iraorao. Ngkana I kona ni karaoa ae n na mwaing nako man te tabo aei, N na karaoia inanon te tai ae waekoa!”
Te bwai ae anai nano bwa aine aikana uoman a bon taetae ibukin te mataniwi n te reirei, taan reirei, ao ai te tabo n reirei ae ti teuana.
Ko a tia n nooria bwa tabeman aomata a kona ni kunea te bwai are a kan kakaea? N taratara raoi n ae tau, ao ko kona ni kunea te tamaroa ao te buakaka ae kuri n reke irouia aomata nako ao ni bwaai nako. Aomata a tia ni karaoa aei ma Ana Ekaretia Iesu Kristo ibukiia aika Itiaki ni Boong Aika Kaitira ni bon moan tein te aro. Te koraki ake a taratara te raoiroi a na reke aomata irouna aika akoi ao n nanoanga—aomata ake a tangira te Uea ao ni baireia bwa a na beku ibukina ao ni kakabwaiaaki maiuia aomata nako. Ma e boni koaua bwa te koraki ake a taratara te buakaka ni koauana a na kunei bwaai aika aki nakoraoi.
N akea te tekeraoi, inanon taai ao e riki aei bon inanon naba te Ekaretia. Akea te tia nakon aron rikina, wanawana, ao matoan nanoia te koraki ake a taratara ibukin kakaean nanon tiribureaia aomata. A tara n aki kona ni kanakoa nanoia ni kairiribai. A wiinnanti ao ni kunei bureia tabeman. A kabaei aia namakin aika buakaka inanon tebwina te ririki, ni kabongana te tai n urui ao n uotia rikaaki tabeman. E aki kakukurei aio nakon te Uea, “bwa ike e mena iai te bakantang ma te kakarabakau, ao e mena naba iai te kiriwe ma mwakuri aika bubuaka ni bane” (Iakobo 3:16).
Beretitenti George Q. Cannon (1827–1901) e kinaa Beretitenti Brigham Young (1801–77) raoi, ni mwakuri ni kaan mangaia inanon ririki aika mwaiti, n uaia n riki bwa membwa ibukin te Kooram n te Tengaun ma Uoman n Abotoro ao riki bwa ana kauntira n te Moan Beretitentii. Imwiin maten Beretitenti Young, Beretitenti Cannon e koroboki n ana tienoo: “I aki tiriburea ke ni kunea buren Brigham Young ma ana kairiri, ana kaetieti ke ana reirei n te tai aei inanou, ae karako n au taeka ao au mwakuri. Aio bon te kakukurei nakoiu ngkai. Te iango are e mena inanou bon: Ngkana I tiribure ke ni kunea buren, ke ni motika taekan te Tari Brigham, raroara ae N na nako iai; ngkana I waaki, n na toki ia? N na bon aki onimakinai n te kawai aei. I ataia bwa kitanan te koaua n taai nako e reke man kakeaan te tamnei n tiribure ao ni karekei buure. Tabeman, aika korakora riki, te wanawana ao te taneiai nakoiu e na kona ni karaoi ao ni kitan mwiin taian buakaka are I aki riai ni karaoi.”1
Ana kaetieti Beretitenti Cannon ae korakora bon te bwai ae ti riai ni iangoia ngaira kaain te Ekaretia ma te tararua ae korakora. Ana taeka te Atua e reireiniia taan iriira Kristo bwa a na “itiaki, … rau, nimamannei, kai anaaki nanona,on n te nanoanga ma uaa aika raraoi, e aki nanonano, ao e aki mwamwana te aba.” Ibukiia taan raoi, “a na taia uaana ae te raoiroi” (Iakobo 3:17, 18).
Iai inaomatara n rinerine. Ti kona n ukoukora te buakaka inanoia tabeman. Ke ti kona ni karaoa te rau ao te mwakuri ni karababaa nakoia tabeman te atatai, te katiteboaki, ao te kabwarabure are e korakora iangoana ibukira. Bon ara rinerine; ibukin te bwai are ti ukoukoria, are ti na kona ni karekea.
© 2011 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/10. Kariaiakaki rairana: 6/10. Rairan te First Presidency Message, March 2011. Kiribati. 09763 859
Anga reirei man te Rongorongo Aei
“Ko kona n namakinna bwa e karako am atatai n te reirei are ko katauraoia bwa ko na angareirei iaona,” bwaai aika a na taraaki Teaching, No Greater Call ([1999], 19). “E ngae n anne, ngkai ko tataro mwaaka ni kamatebwaia, teimatoa ni maiuakinna, katauraoi n angareirei iaona, ao ngkanne tibwaia ma tabeman, oin am koaua e na kakorakoraaki ao ni kananoaki.”
Ngkana ko taratara te maiu ae tamaroa inanon maeuia tabeman n te namakaina aei, ko na konaa riki n tauraoi n angareirei iaon te rongorongo aei ao n taetaekina koauana.