Poraus seni ewe Aewin Presetensi, April 2011
Ese Nom Ikkei, Nge A Manaueta
Ikenai mi chok wor mwirimwirin seni Capernaum, ewe teninimw arap ngeni ewe konik, nukanapen an ewe Chon Amanau afanafan me non Galilee. Ikkei A afanafan me non ewe imwen fen, won nepii, me a echikarata aramas me non imw.
Nepoputan An akkafanafan, Jises a angei ekkoch kapas seni Isaiah: “Ewe Samon Mi Napanap a auraeino ren ngunun we; a finieita o tinieito pwe upwe wato poraus allim ngeni ekkewe mi woungaw; upwe chachari netipen ekkewe mi netipeta, upwe aronga fetanei an ekkewe mi ono pwe repwe ne ngaseno me ekkewe mi nom non kanapus repwe musou” (Isaiah 61:1; pwan nengeni Luke 4:18)—eu esinesin ren eu kokkot seni nang ne amanaua noun Kot kewe at me nengin.
Nge an Jises kewe afanafan me non Galilee mi chok nepoputan. Mi wor an ewe Noun Aramas we kokkot an epwe eta won ewe chukuchukutan Golgotha.
Mi foti me non ewe Ataken Gethsemane mwirin ewe Saingon Möngö, Noun kewe chon kuno ra su seni I, aramas ra otufeiti won I, Ra foti, me aramas ra takiri, iwe Jises A fetan fan choun An we irapenges ngeni Calvary. A poputa seni fefeita ngeni an aramas u ngeni, kesit, me mano won ewe irapenges.
Non kapasen ewe kön “Ewe Teninimw mi Pin”:
Semach won Nang a ngenikich Noun we At. Pwiich me Mongeach we A fangeno manauan fan itach.
Ewe Masta a tongeni kunusefan non ewe saingonon fansoun. Nge Ese föri. A feino fan mettoch meinisin pwe Epwe amanaua mettoch meinisin: meinisin aramas, ewe fonufan, me meinisin mettoch mi ngasangas mi nonnom won.
Ese wor kapas non ewe Mwichefen mi kuu netipei nap seni ekkewe kapas minne ewe chon nang a kapas ngeni Mary Magdalene me ewe pwan emon Mary nupwen ra tori ewe peias ar repwe tumunu inisin ar we Samon: “Pwata oua kukkutta ewe emon mi manau nein ekkewe mi mano? Ese nom ikkei, nge a fen manaueta” (Luke 24:5–6).
Ren ekkei kapas, ekkewe ir mi manau me mano, ekkewe ir mi manau iei me repwap mano, me ekkewe ir rese mo uputiw me repwe mano ir repwe ngasono non fansoun mwach.
Kich meinisin sipwe manausefanita pwe, niwinin an Kraist pworacho ngeni mano. Iei ewe ngasonon ngun. Paul a makkei:
“Iwe, mi wor … inis non nang me ekkewe inis won fonufan: Mi sokkono ningen ekkewe inis non nang seni ningen ekkewe inis won fonufan.
“Mi pwisin wor ningochun ewe akkar, pwan ningochun ewe maram, iwe a pwan sokkono ningochun ekkewe fuu: efou me efou ekkewe fuu ra sokkofesen en me ningan.
“Iwe epwe iei usun nupwen ekkewe mi mano repwe ne manausefan” (1 Corinth 15:40–42).
Sia kutta ewe ningen akkar. Sia mochen nonnom fan mesen Kot. Sia mochen fiti eu famini ese much.
Ua pwäratä usun I ewe emon a amanaua emon me emon kich seni mano, I ewe sensen ennet—nge A nap seni chok emon sense. A ewe nenien appiru mi unusoch—nge A nap seni eu nenien appiru. A ewe chon safei mi nap—nge A nap seni chok emon chon safei. Wesewesen I ewe Chon Amanauen ewe fonufan, ewe Noun Kot, ewe Kingen Kinamwe, ewe Emon mi Pin seni Israel, ewer ewe Samon mi manausefanita, minne a kapas, Ngang ewe akkaemon me saingon; Ngang ewe mi manau, Ngang ewe mi mano; Ngang om chon affor ngeni ewe Sam (D&C 110:4).
“O, mi fakkun och ei poraus: ‘Ua sinei pwe ai Chon Amanau mi manau!’”2
Ren ekkei mettoch ua kapasen pwäratä.
© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun ewe First Presidency Message, April 2011. Chuukese. 09764 901
Afanafan seni Ei Poraus
Sense mi och mi pesei ngeni ekkewe ir ra aitir pwe repwe achocho ne winiti eu chok. Nupwen aramas ra aporausa ar ekiek me ausening ngeni ekkoch, repwe pwapwaiti ochun ar kakaeo me repwe pwan winiti eu chok (nengeni Teaching, No Greater Call [1999], 63). Winiti eu chok epwe fis nein ekkewe ir ka aitir nupwen ami meinisin oua kapasen pwäratä non netipetekison usun ewe Achasefanin Jises Kraist me An Manausefan. Winiti eu chok mi tongeni anisi famini ne tapweno mwirin an Preseten Monson kapasen aurour ne winiti eu “famini ese much.”