2011
Ewe Popun Ekkewe Fin Anisi
April 2011

Poraus seni Fefin Chon Amwa, April 2011

Ewe Popun Ekkewe Fin Anisi

Kopwe aneani ekkei mettoch, nupwen ka tufich, kopwe aporausa ren ekkewe fefin ka churi. Kopwe aea ekkewe kapas eis ne anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Nupwen ach ei presetensi a kökkö, aua angei ekkoch poraus usun uruon Fin Anisi. Aua kaeo ekkewe poraus fiti iotek, am aua mochen sinei ewe popun Fin Anisi me met ewe Samon a mochen sipwe föri. Aua kaeo pwe ewe popun Fin Anisi a för me ren ewe Samon ina pwe sipwe aiti, me anisi Noun kewe fefin ne ammonareta ren ekkewe efeiochun manau ese much.

Apwonueta ei popun Fin Anisi, ewe Samon a ewisa ngeni emon me emon fefin me ewe mwich unusan ar repwe:

  1. Awatteno nuku me pwisin anneasochis.

  2. Apochokuna famini me imw.

  3. Awora aninis seni angang ngeni ewe Samon me Noun kewe semirit.

Sia tongeni föri ei angang non napanapen ewe Samon nupwen chok sia kutta, angei, me tapweno mwirin ach pwisin pwäratä. Sise tongeni feifeita ika esap punun pwisin pwäratä. Ika sia tapweno mwirin pwisin pwäratä, sise tongeni kuf. Ewe soufos Nifai a aitikich pwe ewe Ngun mi Fel epwe pwäratä ngenikich “mettoch meinisin minne [sipwe] föri” (2 Nifai 32:5). Mi namot pwe sipwe mut ngeni pwisin kich ne mosonoson pwe sipwe ausening ngeni mongungun ewe Ngun mi Fel.

Pwii kana, mi wor wisach mi auchea ne apwonueta non ach auweta ewe muun Kot me ammonata ren feiton ewe Samon. Iwe, an ewe Samon angang ese tongeni pwonueta ika esap ren aninis seni Noun kewe nengin. Iwe pokiten ena, ewe Samon a anamota ngenikich pwe sipwe awatteno ach asor. A mochen pwe sipwe apwonueta ewe popun Fin Anisi nap seni me mwan.

Julie B. Beck, Presetenin Fin Anisi unus.

Seni Ekkewe Pukfel

Deuteronomy 6:5–7; Luke 10:30–37; James 1:27; 2 Nifai 25:26; Mosaia 3:12–13

Seni Ach Uruo

Non eu mwichen Fin Anisi non June 9, 1842, ewe Soufos Joseph Smith a aiti ekkewe fefin pwe ar we mwich esap “chok chon anisi ekkewe mi osupwang, nge pwan chon amanaua ngun.”1 Ekkei kapasen popunap non pekin ngun me non pekin inis eu nikinikin Fin Anisi non unusan uruon. Non 1906 Preseten Joseph F. Smith (1838–1918) a aiti: “[Fin Anisi] ese chok fich ngeni namoten ekkewe mi osupwang, ekkewe mi semwen me ekkewe mi osupwang, nge eu kinikinin wisan—me napengeni, pwan—ina ne tumunuochu namoten ekkewe inenap me ekkewe fopun seni Saion non pekin ngun me non pekin manau ese much.2 Non 2001 Elder M. Russell Ballard seni ewe Mwichen Engon me Ruemon Aposel mi apasa, “Iteitan fefin me non ei Mwichefen ra pwon fengen ren ewe Samon a angei ewe wis ne aninis ne amanaua ngun, ne emweni ekkewe fefin me won ei fonufan, ne apochokuna ekkewe imwen Saion, me förata ewe muun Kot.”3

Esinesin

  1. Joseph Smith, non History of the Church, 5:25.

  2. Teachings of Presidents of the Church Joseph F. Smith (1998), 185.

  3. M. Russell Ballard, “Women of Righteousness,” Liahona, Dec. 2002, 39.

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun Visiting Teaching Message, April 2011. Chuukese. 09764 901

Met Upwe Tongeni Föri?

  1. Met poraus ua angei ne anisi pwii kewe ne awatteno non nuku me pwisin nukuchar me apochokuna ar kewe famini me imw? Met sokkun aninis ua tongeni awora?

  2. Ifa usun upwe aea ei poraus ne apochokuna ai nuku me awatteno ai pwon ngeni pwisin nukuchar?