Klumech er a First Presidency, Ongeuang el buil 2011
Ng Diak El Ngar Tiang, engdi Mla Mekiis
Chelechal sils eng di telemall a medechel er a Capernaum, el beluu el ngara bkul a daob, el mle chaidirengul osisecheklel a Osobel er a lolsisechakl ra Galilee. Ng mlar tiang eng mle olsisechakl ra chelsel a blil a chelid, e mle olsisechakl er a bkul a daob, e mle omekungil ra chelsel obliil.
Sera uchelel a Osisecheklel Osobel, ea Jesus a mlo nguu a llechukl el mlara Isaiah: “A Reng ra Rubak el Dios a ngar ngak; Ng mla ngiltak e oderchak el oba ungil chais el mora re mechebuul; el mo omkar a chelemuurreng, e mo mesubed er a ngbetir a remlengai el mo blebaol, ma otebedir a rekelebus” (Isaiah 61:1; dirrek el mesang a Lukas 4:18)—ng bleketakl el ouchais er a chedaol el uldasou el mo olsobel ra rengelekel a Dios.
Eng di osisecheklel a Jesus ra Galilee a kmal di mle uchelel. A Ngelekel a Chad a mle blechoel el bekikl er a bo loruul er ngii ra rois el okedongall el kmo Golgotha.
Ulebdechem ra Sers ra Gethsemane er a uriul ra Chedaol el Belsoil, e mlechoit er a rultirakl er Ngii, miltub, mlo mukerekeriil, e motuub, a Jesus a mlo chuarm el mengol er a kerus er Ngii el bedul a Calvary. Ng ngilsechekl meng mlar sel kot er bab e mlo soiseb er a ultelechakl, mlo ra ringel, ma kodall er a kerus.
A tekoi er a chelsel a chelitakl el “The Holy City”:
Osengelel a mlengodech. …
Tial tutau a kmal mle mekelekolt,
Ea llechul a kerus a merma duum
Ra bebul a cheloit el rois.1
El kired ea Demad ra Babeluades a mileskid a Ngelekel. El kired ea Klou el Obekud a mileskid a klengar er Ngii.
A lekedang ra ulebongel ea Merredel a mle sebechel obult. Eng di Ng dimlak. Ng mlo kiu eungel a rokui el tekoi mebol sebechel losobel a rokui el tekoi: rokui el chad ra beluulechad, tial beluulechad, ma rokui el klengar el mla kiei er ngii.
Ng diak a di chimo el tekoi er a Klekeristiano el klou a ultutelel el merngak er sel tekoi el lullekoi er ngii a anghel el mora lemangel el Maria Magdalena meng kel tara Maria er sera le bocha ra debull el mo mengedmokl er a bedengel a Rubak er tir: “Ngera me kom osiik er a chad er a delongelir a rulekeuad. Ng diak el ngar tiang, engdi mla mekiis” (Lukas 24:5–6).
Me ngokiu tial tekoi, e tirkel rokui el mle kiei e mla mad, me tirkel kiei er chelechang e mo mad ra tara klebesei, me tirkel dirke mo mechell e dirke mo mad a mla mosobel.
Ma mlo terkokl el teloi ra klisichel a Kristo er a kodall, e kid el rokui el mo mekiis er a kodall. Tia ngebetel a klengit ra delbenged. A Paulus a milluches:
“Ngar ngii a … tech el celestial, ma tech el terrestrial: eng di klebkall er a celestial a chimong, ma klebkall er a terrestrial a kuk chimong.
“Meng ngar ngii a klebkellel a sils, ma kuk klebkellel a buil, ma dirrek el klebkellel a rokui el btuch: ele chimong el btuch a kuk ngodech a klebkellel ra tara btuch.
“Ma dirrek el okiis er a kodall” (1 Korinth 15:40–42).
Ng klebkellel a celestial a dosiik er ngii. Sel ngar ngii a Dios a soad el mo kiei er ngii. Ng telungalek ra diak a ulebengelel a soad el morngii el chelechad.
Me Ngii el ulsebelii a derta er kid er a diak a ulebengelel kodall, a ku chotii a klaumerang er ngak el kmo Ngii a sensei er a klemerang—e ng di Ngii a diak dil sensei el merkong. Ngii a okesiul a melemalt el klengar—eng di Ngii a diak el dil okesiu el merkong. Ngii a meduch el lomkar—eng di Ngii a diak el dil omkar el merkong. Ngii a meral Osobel er a beluulechad, Ngekelel a Dios, Prince ra Budech, Imong el Chedaol er a Israel, ngii el milekiis el Rubak, el dilu el kmo, “Ngak a kot e ngaruriul; Ngak ngikel kiliei, Ngak ngikel mlo mad; Ngak ngikel olngeseu er kau el mora Edam” (D&C 110:4).
“Oh, klou el deureng a le besak tial tekoi: ‘Ak medengei el kmo Osebelek a ngar!’”2
Ma kuchotii a klaumerang er ngak el kirel.
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a First Presidency Message, April 2011. Palauan. 09764 881
Osischeklel Tial Klumech
A ungil sensei oldubech a kltareng er a delongelir tirkel lolsisechakl er tir. A rechad sel lolecholt a uldesuir el orrenges ra ta ma tang lokiu omengull, e ngdiak el dil ungil a rengrir el kirel a ungil eolt er a omesuub te dirrek el merael el mo ta rengrir (mesa Teaching, No Greater Call [1999], 63). A kltareng a mo mekdubech er a delongelir tirkel molsisechakl er tir sel kau me tir a kakuul ra cholechotel a klaumerang er kemiu er a Tngakireng er a Jesus Kristo ma Okiis er a Kodellel. Tial kltarreng a sebechel ngosuterir a rtelungalek el mo oltirakl er a osisecheklel a President Monson el mo “telungalek er a diak a ulebengelel.”