Ang Balaan nga Templo—Nagagiya nga Kasanag sa Kalibutan
Ang gamhanan kag pinakamataas nga mga bugay sang pagkamiyembro sa Simbahan amo yadtong mga bugay nga aton ginabaton sa mga templo sang Dios.
Pinalangga kong mga kauturan, ginapalab-ot ko ang akon pagpalangga kag pagtamyaw sa tagsa sa inyo kag ginapangamuyo nga ang aton Amay nga Langitnon maggiya sang akon mga panghunahuna kag mag-inspirar sang akon mga pulong samtang ako nagahambal sa inyo karon nga adlaw.
Luyag ko magsugod paagi sa paghatag sing diutay nga pagtalupangud sa manami nga mga mensahe nga aton nabatian sini nga aga gikan kay Sister Allred kag Bishop Burton kag sa iban pa gid parte sa welfare program sang Simbahan. Subong sang ginhambal ini nga tuig nagamarka sang ika-75 nga anibersaryo sining inspirado nga programa, nga nagbugay sang mga kabuhi sing tuman kadamo. Nangin akon ang prebilihiyo nga makilala sing personal ang pila sadtong nagpanguna sining dako nga buluhaton—mga tawo nga may kaluoy kag kaayo.
Subong nga ginsambit nanday Bishop Burton kag Sister Allred kag sang iban pa, ang bishop sang ward ginahatagan sang responsibilidad sa pagtatap sadtong mga nagakinahanglan nga nagapuyo sa sulod sang mga dulonan sang iya ward. Amo sadto ang akon nangin prebilihiyo sang nagpanguna ako bilang isa ka bataon kaayo nga bishop sa siyudad sang Salt Lake sa isa ka ward nga may 1,080 ka mga miyembro, lakip na ang 84 ka mga balo. Madamo ang nagkinahanglan sing bulig. Daw ano ako kamapinasalamaton para sa welfare program sang Simbahan kag para sa bulig sang Relief Society kag sang mga korum sang priesthood.
Ginapahayag ko nga ang welfare program sang Ang Simbahan ni Jesucristo sang mga Santos sa Ulihing mga Adlaw inspirado sang Dios nga Makagagahum.
Karon, akon mga kauturan, ining komperensya nagamarka sing ikatlo nga tuig humalin sang ako gintib-ong bilang Pangulo sang Simbahan. Siyempre nangin masako ining mga tinuig, nga napuno sing madamo nga mga hangkat kag sing di-maisip man nga mga bugay. Ang oportunidad nga naangkon ko sa pagpahanungod kag liwat nga pagpahanungod sang mga templo amo ang nangin isa sang pinakamanami kag sagrado sining mga bugay, kag parte sa templo ang luyag ko ipamulong sa inyo karon nga adlaw.
Sa Oktubre nga pangkabilugan nga komperensya sang 1902, ang Pangulo sang Simbahan nga si Joseph F. Smith nagpahayag sa iya pangbukas nga pagpamulong sang paglaum nga pila ka adlaw kita “makapasad sang mga templo sa nagkalainlain nga mga bahin sang [kalibutan] kon sa diin ang mga ini kinahanglanon para mangin mahapos sa mga tawo.”1
Sa una nga 150 katuig pagkatapos maorganisar ang Simbahan, humalin 1830 tubtob 1980, 21 ka mga templo ang napasad, lakip na ang mga templo sa Kirtland, Ohio, kag Nauvoo, Illinois. Ikomparar ina sa 30 katuig humalin sang 1980, sa diin 115 ka mga templo ang napasad kag napahanungod. Sa pag-anunsyo kahapon sang 3 ka bag-o nga mga templo, may dugang nga 26 ka mga templo nga ayhan ginapasad na sa karon ukon ginahandaan pa lang ang pagpasad. Ining kadamuon [sang mga templo] padayon nga magadugang.
Ang katuyuan nga ginlauman ni Pangulong Joseph F. Smith sang 1902 nagakatuman na. Ang aton handum amo nga himuon ang mga templo nga mas malapit sa aton mga miyembro.
Isa sang mga templo nga sa karon ginapasad yara sa Manaus, Brazil. Madamo nga tinuig ang nagligad, nakabasa ako parte sa isa ka grupo nga may kapin sa isa ka gatos ka mga miyembro nga nagbiya sang Manaus nga nahamtang sa sentro sang kakahuyan sang Amazon, agud magbiyahe pakadto sa pinakamalapit nga templo sadto nga nahamtang sa São Paulo, Brazil—halos 2,500 ka milya (4,000 km) gikan sa Manaus. Yadtong matutom nga mga Santos nagbiyahe sa bapor sing apat ka adlaw sa Amazon River kag sa iya sini nga mga sapa. Pagkatapos nga mahuman ining pagbiyahe sa tubig, nagsakay sila sa mga bus para sa dugang nga tatlo ka adlaw nga pagbiyahe—sa maundag nga mga dalanon, nga tuman ka diutay lamang ang makaon, kag wala sing komportable nga matulugan. Pagkaligad sing pito ka adlaw kag gab-i, nag-abot sila sa templo sa São Paulo, sa diin ang mga ordinansa nga wala’y katapusan ang sahi ginhikot. Siyempre ang ila biyahe pabalik amo man kabudlay. Apang, nabaton nila ang mga ordinansa kag mga bugay sang templo, kag bisan nga wala na sila sing kuwarta nga nabilin, sila mismo napun-an sang espiritu sang templo kag sang pagpasalamat para sa mga bugay nga ila nabaton.2 Karon, madamo nga tinuig ang nagligad, ang aton mga miyembro sa Manaus nagapangalipay samtang ila ginatan-aw ang ila kaugalingon nga templo nga ginapasad sa mga pangpang sang Rio Negro. Ang mga templo nagadala sing kalipay sa aton matutom nga mga miyembro sa bisan diin man ang mga ini ginapasad.
Ang mga sugilanon parte sa mga sakripisyo nga ginhimo agud mabaton ang mga bugay nga masalapuan lamang sa mga templo sang Dios wala gid nagapalta sa pagtandog sang akon tagipusuon kag pagdala sa akon sang panibag-o nga igbalatyag sang kapasalamatan para sa mga templo.
Luyag ko magpaambit sa inyo sang sugilanon parte kay Tihi kag Tararaina Mou Tham kag sang ila 10 ka kabataan. Ang bilog nga pamilya nagbuylog sa Simbahan sang damlag pa sang dekada 1960, sang ang mga misyonero nag-abot sa ila isla nga nahamtang mga 100 ka milya (160 km) nabagatnan sang Tahiti. Wala madugayi ila ginhandum ang mga bugay sang isa ka wala’y katapusan nga paghugpong sang pamilya sa templo.
Sadto nga tion ang pinakamalapit nga templo sa pamilya-Mou Tham amo ang Hamilton New Zealand Temple nga kapin sa 2,500 ka milya (4,000 km) pabagatnan-nakatundan, nga malab-ot lamang paagi sa magastos nga pagbiyahe sa eroplano. Ang dako nga pamilya-Mou Tham, nga nakaagom paagi sa tuman nga kabudlayan sing diutay nga pangabuhian sa isa ka magamay nga talamnan, wala sing kuwarta para sa plete sa eroplano, kag wala man sing bisan ano nga oportunidad sa pagtrabaho sa ila isla sa Pasipiko. Gani si Brother Mou Tham kag ang iya anak nga si Gerard naghimo sing mabudlay nga desisyon sa pagbuylog sa isa pa ka anak nga lalaki nga nagatrabaho sa mga minahan sang nikel sang New Caledonia, 3,000 ka milya (4,800 km) pakatundan. Ang tag-iya nagapatigayon sa iya mga empleyado sing libre nga pagbiyahe pakadto sa mga minahan apang wala nagapatigayon sing salakyan pauli.
Ang tatlo ka mga lalaki nga Mou Tham nagtrabaho sing apat katuig sa mainit nga mga minahan sang nikel nga nagakutkot kag nagakarga sang mabug-at nga mineral. Si Brother Mou Tham lamang ang nagapauli para sa malip-ot nga pagbisita kis-a sa isa ka tuig, nga ginabilin ang iya nga mga anak nga lalaki sa New Caledonia.
Pagkatapos sing apat katuig sing mabudlay nga pagtrabaho, si Brother Mou Tham kag ang iya mga anak nakasupot sing bastante nga kuwarta agud dalhon ang pamilya sa New Zealand Temple. Ang tanan naglakat, luwas lang sa isa ka anak nga babayi. Ginhugpong sila sa katuigan kag wala’y katapusan, isa ka di-masaysay kag malipayon nga eksperiyensya.
Si Brother Mou Tham nagbalik gikan sa templo diretso sa New Caledonia, sa diin nagtrabaho sia sing duha pa gid ka tuig agud mabayaran ang pagbiyahe sang isa ka anak nga babayi nga wala nakakadto sa templo upod sa ila—isa ka kasado nga anak nga babayi kag ang iya anak kag bana.
Sa ila nga pag-edad, sanday Brother kag Sister Mou Tham naghandum nga mag-alagad sa templo. Sadto nga panahon ang Papeete Tahiti Temple napasad na kag napahanungod, kag nag-alagad sila sing duha ka misyon didto.3
Mga kauturan ko, ang mga templo indi lang bato kag semento. Ang mga ini napun-an sang pagtuo kag pagpuasa. Ang mga ini ginpasad sa mga pagtilaw kag mga panaksihon. Ang mga ini ginpakabalaan paagi sa pagsakripisyo kag pag-alagad.
Ang una nga templo nga ginpasad sa sining dispensasyon amo ang templo sa Kirtland, Ohio. Ang mga Santos sadto nga panahon tuman kaimol, apang ang Ginuo nagmando nga ang isa ka templo ipasad, gani ginpasad nila ini. Si Elder Heber C. Kimball nagsulat parte sa eksperiyensya, “Ang Ginuo lamang ang nakahibalo sang mga eksena sang kaimulon, pagtilaw kag pag-antos nga aton naagyan agud mahuman ini.”4 Kag dayon, pagkatapos sang tanan nga nahuman sing mauti, ang mga Santos ginpuwersa nga maghalin sa Ohio kag sa ila pinalangga nga templo. Sang ulihi nakakita sila sing palasilongan—bisan pa nga temporaryo lamang—sa mga pangpang sang Mississippi River sa estado sang Illinois. Ginhingadlan nila ang ila komunidad nga Nauvoo, kag handa nga ihatag ang ila tanan-tanan sa liwat kag upod sang ila pagtuo nga bug-os sa gihapon, nagpasad sila sang isa pa gid ka templo sa ila Dios. Apang, ang pagpangdaug-daog nagpadayon, kag halos pa lang nga nahuman ang Nauvoo Temple, ginpangtabog sila liwat gikan sa ila mga puluy-an nga nagapangita sing palasilongan sa isa ka disyerto.
Ang paghimud-os kag ang pagsakripisyo nagsugod sa liwat sang sila nagpangabudlay sing 40 katuig agud ipasad ang Salt Lake Temple, nga nagatindog sing tuman katahum sa bloke sang lote nga nahamtang sa nabagatnan naton nga yari diri karon nga adlaw sa Conference Center.
May mga pagsakripisyo gid nga naangot sa pagpasad sang templo kag sa pagtambong sa templo. Madamo sa mga miyembro ang nagpangabudlay kag naghimud-os agud makaagom para sa ila mga kaugalingon kag para sa ila mga pamilya sang mga bugay nga masalapuan sa mga templo sang Dios.
Ngaa madamo kaayo ang handa sa paghatag sing tuman agud makabaton sang mga bugay sang templo? Ang yadtong nakahangop sang wala’y katapusan nga mga bugay nga nagahalin sa templo nakahibalo nga wala sing sakripisyo nga tuman kadako, wala sing bili nga tuman kabug-at, wala sing paghimud-os nga tuman kabudlay agud mabaton yadtong mga bugay. Wala sing tuman kadamo nga mga milya nga biyaheon, tuman kadamo nga mga sablag nga pagalampuwasan, ukon tuman nga kabudlayan nga batason. Nakahangop sila nga ang nagaluwas nga mga ordinansa nga ginabaton sa templo nga nagatugot sa aton sa pila ka adlaw nga makabalik sa aton Amay nga Langitnon sa isa ka wala’y katapusan nga kaangtanan sang pamilya kag madulotan sang mga bugay kag gahum gikan sa kahitaasan nagahatag kapuslanan sa tagsa ka pagsakripisyo kag tagsa ka pagtinguha.
Karon nga panahon ang kalabanan sa aton indi na kinahanglan nga mag-antos pa sing tuman nga mga kabudlayan agud makatambong sa templo. Otsentay-singko porsyento sang mga miyembro sang Simbahan sa karon nagapuyo sa sulod sang 200 ka milya (320 km) sang isa ka templo, kag para sa madamo kaayo sa aton, ang ina nga distansya mas malip-ot.
Kon nakakadto na kamo sa templo sa inyo mga kaugalingon kag kon nagapuyo kamo sing may kalapiton sa isa ka templo, ang inyo sakripisyo mahimo amo ang pagpain sing tion gikan sa inyo masako nga mga kabuhi agud magbisita sa templo sing masunson. Madamo kaayo ang dapat himuon sa aton mga templo para sadtong nagkalamatay na. Kon himuon naton ang mga buluhaton para sa ila, aton mahibaloan nga natuman naton ang indi nila sarang mahimo para sa ila mga kaugalingon. Si Pangulong Joseph F. Smith sa isa ka mabaskog nga deklarasyon, nagpahayag, “Paagi sa aton mga pagtinguha para sa ila ang ila mga kadena sang pagkaulipon mahukas, kag ang kadulom nga nagapalibot sa ila magatahaw, agud nga ang kapawa mahimo magsanag sa ila kag ila mabatian sa kalibutan sang espiritu ang buluhaton nga nahimo para sa ila sang ila mga kabataan diri, kag magapangalipay upod sa inyo sa inyo paghikot sining mga katungdanan.”5 Mga kauturan ko, ang buluhaton dapat naton himuon.
Sa akon kaugalingon nga pamilya, ang pila sang amon pinakasagrado kag pinakabilidhon nga mga eksperiyensya natabo sang nagsulod kami sing ulolupod sa templo agud maghikot sang nagahugpong nga mga ordinansa para sa amon mga minatay.
Kon wala pa kamo nakakadto sa templo o kon kamo nakakadto na apang sa karon indi kwalipikado para sa isa ka recommend, wala na sing labing importante pa nga katuyuan nga inyo dapat tinguhaan sangsa pagmangin takos sa pagkadto sa templo. Ang inyo sakripisyo mahimo nga amo ang pagdala sang inyo kabuhi nga mangin matinumanon sa kon ano ang ginapangayo agud mabaton ang recommend, ayhan paagi sa pagsikway sang naandan na nga mga pamatasan nga nagapugong sa inyo nga mangin kwalipikado. Ayhan ini amo ang pag-angkon sang pagtuo kag sang disiplina sa pagbayad sang inyo ika-pulo. Kon ano man ina, magtinguha nga mangin kwalipikado sa pagsulod sa templo sang Dios. Magkuha sang temple recommend kag kabiga ini bilang isa ka bilidhon nga manggad, bangod ini amo sina.
Tubtob nga makasulod kamo sa balay sang Ginuo kag makabaton sang tanan nga mga bugay nga nagahulat sa inyo didto, wala ninyo maangkon ang tanan-tanan nga ginatanyag sang Simbahan. Ang labing importante kag pinakamataas nga mga bugay sang pagkamiyembro sa Simbahan amo yadtong mga bugay nga aton ginabaton sa mga templo sang Dios.
Karon, mga abyan ko nga lamharon nga yara sa pangidaron nga 13 tubtob 19 katuig, ilakip pirme ang templo sa inyo mga katuyuan sa palaabuton. Indi maghimo sang mga butang nga magapugong sa inyo sa pagsulod sa mga ganhaan sini kag pag-ambit sang sagrado kag wala’y katapusan nga mga bugay didto. Ginadayaw ko kamo nga nagakadto sa templo sing masunson agud maghikot sang mga bunyag para sa mga minatay, kag nagabangon sing temprano kaayo sa kaagahon agud kamo makapartisipar sa subong nga mga bunyag antes magsugod ang klase. Wala na ako sing may mapensaran nga mas maayo pa nga paagi agud sugdan ang adlaw.
Sa inyo nga mga ginikanan sang lamharon nga kabataan, luyag ko magpaambit sa inyo sang pila ka maalamon nga laygay gikan kay Pangulong Spencer W. Kimball. Siling niya: “Maayo gid kon … ang mga ginikanan may yara sa tagsa ka kwarto sa ila balay sing isa ka letrato sang templo agud ang [ila kabataan] humalin sang [sila] [mga] lapsag pa lang makatulok sa letrato adlaw-adlaw [tubtob] ini mangin kabahin sang [ila mga kabuhi]. Kon [maglab-ot sila] sa edad nga [kinahanglan nila] maghimo [sang] importante kaayo nga desisyon [parte sa pagkadto sa templo], ini nahimo na.”6
Ginakanta sang aton kabataan sa Primary:
Ginapangabay ko gid kamo nga tudloan ang inyo kabataan sang kaimportante sang templo.
Ang kalibutan sarang mangin mahangkaton kag mabudlay nga duog nga pagapuy-an. Masami kita ginapalibutan sinang nagabutong sa aton paidalom. Sa inyo kag sa akon pagkadto sa balaan nga mga balay sang Dios, sa aton pagdumdom sang mga kasugtanan nga ginahimo naton sa sulod, mas masarangan naton pas-anon ang tagsa ka pagtilaw kag malampuwasan ang tagsa ka tentasyon. Sa sining sagrado nga santuaryo masalapuan naton ang paghidaet; mapabag-o kita kag mapabakod.
Karon, akon mga kauturan, luyag ko magsambit sing isa pa ka templo antes ako magtakop. Sa indi-tuman-kalayo nga palaabuton samtang may bag-o nga mga templo nga ginapasad sa palibot sang kalibutan, ang isa ipasad sa isa ka siyudad nga nagluntad kapin sa 2,500 katuig ang nagligad. Ginatumod ko ang templo nga ginapasad karon sa Roma, Italya.
Ang tagsa ka templo balay sang Dios, nga nagatuman sang amo man nga mga katuyuan kag sang pareho nga mga bugay kag mga ordinansa. Ang Rome Italy Temple, pinasahi nga ginapasad sa isa sang pinakamaragtason nga lugar sa kalibutan, isa ka siyudad sa diin ang dumaan nga Apostoles Pedro kag Pablo nagwali sang ebanghelyo ni Cristo kag sa diin ang tagsa ginpatay.
Sang nagligad nga Oktubre, samtang nagatipon kami sa isa ka matahum nga patag sa aminhan-sidlangan nga bahin sang Roma, nangin akon ang oportunidad sa paghalad sang pangamuyo sa pagpahanungod samtang nagahanda kami sa pagbungkag sang duta. Nakabatyag ako sing pagpadasig nga tawgon ang Italyano nga senador nga si Lucio Malan kag ang bise-mayor sang Roma nga si Giuseppe Ciardi nga mangin pila sang mga una nga magpala sang duta. Ang tagsa nangin kabahin sang desisyon nga tugotan kita sa pagpasad sang isa ka templo sa ila siyudad.
Ang adlaw nangin magal-om apang magin-ot, kag bisan nagahana nga mag-ulan, isa ukon duha man lang katulo sang ulan ang nagtupa. Samtang ang halangdon nga koro nagakanta sa Italyano sang matahum nga berso sang “The Spirit of God [Ang Espiritu sang Dios],” ang tanan-tanan nakabatyag nga daw ang langit kag duta gin-upod sa isa ka mahimayaon nga ambahanon sang pagdayaw kag pagpasalamat sa Dios nga Makagagahum. Ang mga luha indi mapunggan.
Sa maabot nga adlaw, ang mga matutom sa sini, ang Wala’y Katapusan nga Siyudad, magabaton sang mga ordinansa nga wala’y katapusan ang sahi sa isa ka balaan nga balay sang Dios.
Ginapahayag ko ang akon wala’y kamatayon nga pagpasalamat sa akon Amay nga Langitnon para sa templo nga sa karon ginapasad sa Roma kag para sa tanan sang aton mga templo, kon sa diin man ang mga ini. Ang tagsa nagatindog bilang nagagiya nga kasanag sa kalibutan, isa ka pagpahayag sang aton panaksihon nga ang Dios, ang aton Wala’y Katapusan nga Amay, buhi, nga luyag Niya kita bugayan kag, sa pagkamatuod, bugayan ang Iya mga anak sang tanan nga mga henerasyon. Ang tagsa sang aton mga templo nagapahayag sang aton panaksihon nga ang kabuhi sa pihak sang kamatayon subong ka matuod kag pat-od sa aton kabuhi diri sa duta. Ako nagapanaksihon.
Pinalangga ko nga mga kauturan, kabay nga himuon naton ang bisan ano nga mga sakripisyo nga kinahanglanon agud magtambong sa templo kag agud maangkon ang espiritu sang templo sa aton mga tagipusuon kag sa aton mga puluy-an. Kabay nga sundon naton ang mga tikang sang aton Ginuo kag Manluluwas, nga si Jesucristo, nga naghimo sing himpit nga sakripisyo para sa aton, agud nga kita makaangkon sang kabuhi nga wala’y katapusan kag pang-kahitaasan sa ginharian sang aton Amay nga Langitnon. Ini ang akon sinsero nga pangamuyo, kag ginahalad ko ini sa ngalan sang aton Manluluwas, nga si Jesucristo ang Ginuo, amen.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Pagtugot sa Ingles: 6/10. Pagtugot sa paglubad: 6/10. Paglubad sang First Presidency Message, May 2011. Hiligaynon. 09765 861