Mga Oportunidad sa Paghimo sing Maayo
Ang pamaagi sang Ginuo sa pagbulig sadtong yara sa temporal nga panginahanglan nagapangayo sang mga tawo nga bangud sang gugma nagkonsagrar sang ila mga kaugalingon kag kon ano ang may ara sila sa Dios kag sa Iya buluhaton.
Pinalangga ko nga mga kauturan, ang katuyuan sang akon mensahe amo nga pasidunggan kag isaulog kon ano ang nahimo sang Ginuo kag ginahimo agud alagaran ang mga kubos kag mga nagakinahanglan sa tunga sang Iya mga anak sa duta. Palangga Niya ang Iya mga anak nga nagakinahanglan kag subong man yadtong luyag nga magbulig. Kag naghimo Sia sang mga pamaagi agud bugayan alangay ang yadtong nagakinahanglan sing bulig kag yadtong magahatag sini.
Ginapamatian sang aton Amay nga Langitnon ang mga pangamuyo sang Iya mga anak sa bug-os nga kalibutan nga nagaampo para sa kalan-on, para sa mga panapton nga itabon sa ila kalawasan, kag para sa dignidad nga magaabot gikan sa ikasarang nga magtigana para sa ila mga kaugalingon. Ang yadtong mga pagpangabay nakalab-ot sa Iya humalin sang Iya ginbutang ang mga lalaki kag mga babayi sa duta.
Inyo mahibaloan inang mga panginahanglan kon sa diin kamo nagapuyo kag gikan sa bug-os nga kalibutan. Ang inyo tagipusuon sa masami ginatandog sang mga balatyagon sang pagsimpatiya. Kon makasugata kamo sang isa nga nagahimud-os sa pagpangita sing obra, mabatyagan ninyo inang kaluyag nga magbulig. Mabatyagan ninyo ini kon magsulod kamo sa puluy-an sang isa ka balo kag makita nga wala sia sing pagkaon. Mabatyagan ninyo ini kon makita ninyo ang mga letrato sang nagahibi nga kabataan nga nagapungko sa mga narumpagan sang ila puluy-an nga ginguba sang linog ukon sang kalayo.
Bangod ginapamatian sang Ginuo ang ila mga hibi kag Iya mabatyagan ang inyo dako nga kaluoy para sa ila, humalin sang ginsuguran naghatag Sia sang mga pamaagi para sa Iya mga sumulunod nga makabulig. Gin-agda Niya ang Iya mga anak sa pagkonsagrar sang ila tinion, ila mga ikasarang, kag ila mga kaugalingon sa pag-upod sa Iya sa pag-alagad sa iban.
Ang Iya pamaagi sa pagbulig, kon kaisa, gintawag nga pagpangabuhi sang layi sang pagkonsagrar. Sa lain naman nga panahon ang Iya pamaagi gintawag nga united order. Sa aton panahon ini ginatawag nga Church welfare program.
Ang mga ngalan kag mga detalye sang paghikot ginabag-o agud mapabagay sa mga panginahanglan kag mga kondisyon sang mga tawo. Apang sa masami ang pamaagi sang Ginuo sa pagbulig sadtong yara sa temporal nga panginahanglan nagapangayo sang mga tawo nga bangud sa gugma nagkonsagrar sang ila mga kaugalingon kag kon ano ang may ara sila sa Dios kag sa Iya buluhaton.
Nag-agda Sia kag nagmando sa aton sa pagpartisipar sa Iya buluhaton agud itib-ong ang yadtong nagakinahanglan. Nagahimo kita sang kasugtanan nga himuon ina sa mga tubig sang pagbunyag kag sa balaan nga mga templo sang Dios. Ginabag-o naton ang kasugtanan kon Domingo kon mag-ambit kita sang sakramento.
Ang akon katuyuan karon nga adlaw amo nga ilaragway ang pila sang mga oportunidad nga Iya ginhatag sa aton agud buligan ang iban nga nagakinahanglan. Indi ko ini mahambal tanan sa aton malip-ot nga tion sang pag-inupdanay. Ang akon ginalauman amo nga bag-uhon kag pabakuron ang inyo pangako sa pagbuhat.
May yara sang ambahanon parte sa pagpangagda sang Ginuo sa sining buluhaton nga akon ginakanta halin sang gamay pa ko. Sa akon pagkabata, mas gintutokan ko ang malipayon nga tono sangsa gahum sang mga pulong. Ginapangamuyo ko nga inyo mabatyagan ang mga pulong sang kanta sa inyo mga tagipusuon karon nga adlaw. Pamatian naton sa liwat ang mga pulong:
May nahimo bala ‘ko nga maayo?
May nabuligan b’la ako?
May ginpasadya kag ginpalipay b’la ‘ko?
Kon w’la, nagpalta ako.
May palas-anon bala nga nagmag-an
Kay akon napaambitan?
May mga masakiton b’la nabuligan?
Sila b’la akon nga gin-updan?
Magbangon, mangin maalwan
Sangsa damgohon k’langitan.
Paghimo sing maayo, kalipay nga tuman,
Bugay sang gugma, pagtuman.1
Ang Ginuo masunson nga nagapadala sang mga mensahe agud pukawon kita tanan. Kon kaisa mahimo nga ini isa ka hinali nga balatyagon sang pagsimpatiya para sa isa nga nagakinahanglan. Ang isa ka amay ayhan nakabatyag sini sang iya nakita ang isa ka bata nga natumba kag nabagrasan ang tuhod. Ang isa ka iloy ayhan nakabatyag sini sang iya mabatian ang hibi nga may kahadlok sang iya bata sa kagab-ihon. Ang isa ka anak nga lalaki ukon babayi ayhan nakabatyag sang pagsimpatiya para sa isa nga daw nasubuan ukon nahadlok sa eskuwelahan.
Ang tanan sa aton natandog sang mga balatyagon sang pagsimpatiya para sa iban nga indi man gani naton kilala. Halimbawa, sa inyo pagkabati sang mga balita parte sa mga balod nga nagaragasa sa Pasipiko pagkatapos sang linog sa Japan, nakabatyag kamo sang pagkabalaka para sadtong ayhan nahalitan.
Ang mga balatyagon sang pagsimpatiya nag-abot sa linibo sa inyo nga nakahibalo parte sa pagbaha sa Queensland, Australia. Ang mga balita nasentro sa mga pagbulobanta sang kadamuon sadtong yara sa panginahanglan. Apang madamo sa inyo ang nakabatyag sang kasakit sang mga tawo. Ang pagpamukaw ginsabat sang 1,500 ukon masobra pa nga mga nagboluntaryo nga mga miyembro sang Simbahan sa Australia nga nagkari agud magbulig kag magpasulhay.
Ginliso nila ang ila mga balatyagon sang pagsimpatiya sa isa ka desisyon nga magbuhat suno sa ila mga kasugtanan. Nakita ko ang mga bugay nga nagaabot sa tawo nga nagakinahanglan nga nagabaton sing bulig kag sa tawo nga nagakuha sing oportunidad agud ihatag ini.
Ang maalamon nga mga ginikanan makakita sa tagsa ka panginahanglan sang iban sang paagi agud madala ang mga pagpakamaayo sa mga kabuhi sang ila mga anak. Tatlo ka kabataan sang sini lang ang nagdinala sang mga suludlan nga nagaunod sang manamit nga panyapon sa amon ganhaan. Ang ila mga ginikanan nakahibalo nga kinahanglan namon sing bulig, kag ila ginlakip ang ila kabataan sa oportunidad sa pag-alagad sa amon.
Ang mga ginikanan nagpakamaayo sang amon pamilya paagi sa ila maalwan nga pag-alagad. Sa ila pagpili nga tugotan ang ila kabataan nga magpartisipar sa paghatag, ginpasangkad nila ang mga pagpakamaayo sa ila palaabuton nga mga apo. Ang mga yuhum sang kabataan samtang nagabiya sila sa amon puluy-an nagpasalig sa akon nga matabo ina. Pagasugiran nila ang ila kabataan sang kalipay nga ila nabatyagan sa paghatag sing maluluy-on nga pag-alagad para sa Ginuo. Madumduman ko inang balatyagon sang malinong nga kalipayan gikan sa pagkabata samtang nagapanghilamon ako para sa kasilingan sa pangabay sang akon tatay. Sa tagsa ka tion nga agdahon ako nga maghatag, madumduman ko kag nagapati ako sa mga pulong sang kanta “Sweet is the work, my God, my King.”2
Nakahibalo ako nga yadtong mga pulong sang kanta ginsulat agud ilaragway ang kalipay nga nagahalin sa pagsimba sa Ginuo kon Domingo. Apang yadtong kabataan nga may dala nga pagkaon sa amon ganhaan nagbatyag sa isa ka kinaandan nga adlaw sang semana sang kalipay sa paghimo sang buluhaton sang Ginuo. Kag ang ila mga ginikanan nakakita sing oportunidad sa paghimo sing maayo kag pagpalapnag sing kalipay sa mga henerasyon.
Ang pamaagi sang Ginuo sa pagtatap sang mga nagakinahanglan nagahatag sing isa pa ka oportunidad para sa mga ginikanan nga bugayan ang ila kabataan. Nakita ko ini sa isa ka kapilya isa ka Domingo. Isa ka diutay nga bata ang nagduhol sa bishop sang sobre nga nagaunod sang donasyon sang iya pamilya samtang nagapasulod sia sa kapilya antes sang sakrament miting.
Kilala ko ang ila pamilya kag ang bata nga lalaki. Ang ila pamilya nakahibalo parte sa isa ka miyembro sa ward nga nagakinahanglan. Ang amay sang bata nagsiling sang daw subong sini sa bata samtang nagabutang sia sang mas maalwan nga tanyag-puasa sangsa kinaandan sa sobre: “Nagpuasa kita karon nga adlaw kag nagpangamuyo para sadtong mga nagakinahanglan. Palihog ihatag ining sobre sa bishop para sa aton. Nakahibalo ako nga ihatag niya ini agud buligan yadtong may mas dako nga panginahanglan sangsa aton.”
Imbes sang kutoy sang tiyan sa kagutom sina nga Domingo, madumduman sang bata ang ina nga adlaw nga may malipayon nga balatyagon. Mabal-an ko sa iya yuhum kag sa iya pag-uyat sang sobre sing tuman ka hugot nga nabatyagan niya ang dako nga pagsalig sang iya amay sa pagdala sang tanyag sang pamilya para sa mga kubos. Madumduman niya ang ina nga adlaw kon mangin deacon na sia kag ayhan sa katubtuban.
Nakita ko ang amo man nga kalipay sa mga nawong sang mga tawo nga nagbulig para sa Ginuo sa Idaho tinuig na ang nagligad. Ang Teton Dam nagbuswak sang Sabado, Hunyo 5, 1976. Onse ka tawo ang napatay. Linibo ang nagkinahanglan nga maghalin sa ila mga puluy-an sa pila lamang ka oras. Ang pila ka mga puluy-an nagkalaanod. Kag ginatos ka mga balay ang sarang lamang maistaran paagi sa mga paghimud-os kag pamaagi nga sobra kaayo sangsa masarangan sang mga tag-iya.
Ang yadtong nakabati sang trahedya nakabatyag sang pagsimpatiya, kag ang iban nakabatyag sang tawag sa paghimo sing maayo. Ang mga kasilingan, mga bishop, mga pangulo sang Relief Society, mga lider sang korum, mga home teacher, kag mga visiting teacher nagbiya sang mga puluy-an kag mga obra agud magtinlo sang nabahaan nga mga balay sang iban.
Isa ka mag-asawa ang nagbalik sa Rexburg gikan sa isa ka bakasyon pagkatapos gid lang sang baha. Wala sila nagpauli agud tan-awon ang ila kaugalingon nga balay. Sa tigaylo, ginpangita nila ang ila bishop agud magpamangkot kon diin sila sarang makabulig. Gintudlo niya sila sa isa ka pamilya nga nagakinahanglan.
Pagkaligad sang pila ka adlaw nagpauli sila agud tan-awon ang ila puluy-an. Wala na ini, naanod sa baha. Nagbalik sila sa bishop kag nagpamangkot, “Karon ano ang luyag mo nga himuon namon?”
Kon diin man kamo nagapuyo, nakita ninyo inang milagro sang pagsimpatiya nga nangin isa ka di-maiyaiyahon nga buhat. Ayhan indi man ini resulta sang isa ka dako nga natural nga kalamidad. Nakita ko ini sa korum sang priesthood sa diin ang isa ka utod nga lalaki nagtindog agud ilaragway ang mga panginahanglan sang isa ka lalaki ukon isa ka babayi nga nagapangita sing oportunidad nga makaobra agud suportahan ang iya kaugalingon kag ang iya pamilya. Mabatyagan ko ang simpatiya sa sulod sang kuwarto, apang ang iban naghatag sang mga ngalan sang mga tawo nga puwede makapasulod sang tawo nga nagakinahanglan sing obra.
Ang natabo sa sinang korum sang priesthood kag ang natabo sa nabahaan nga mga balay sa Idaho nagapakita sang pamaagi sang Ginuo sa pagbulig sadtong yara sa dako nga panginahanglan nga makasandig-sa-kaugalingon. Nagabatyag kita sing kaluoy, kag nakahibalo kita kon paano magbuhat sa pamaagi sang Ginuo agud makabulig.
Ginasaulog naton ang ika-75 nga anibersaryo sang welfare program sang Simbahan sini nga tuig. Ginsugdan ini agud masabat ang mga panginahanglan sadtong nawad-an sang obra, mga kaumahan, kag bisan pa mga puluy-an bilang resulta sang gintawag nga Great Depression.
Ang dalagko nga temporal nga mga panginahanglan sang mga anak sang Amay nga Langitnon nag-abot sa liwat sa aton panahon subong nga ini natabo na kag subong nga ini matabo naman sa tanan nga panahon. Ang mga prinsipyo sa pundasyon sang welfare program sang Simbahan indi para sa isa lamang ka tion ukon isa ka duog. Ang mga ini para sa tanan nga mga tion kag tanan nga mga duog.
Ang yadtong mga prinsipyo espirituhanon kag wala’y katapusan. Gani, ang paghangop sang mga ini kag pagbutang sang mga ini sa aton mga tagipusuon magahimo nga posible para sa aton nga makita kag makuha ang mga oportunidad sa pagbulig kon san-o kag kon diin man kita agdahon sang Ginuo.
Yari ang pila sang mga prinsipyo nga naggiya sa akon sang ginhandum ko nga magbulig sa pamaagi sang Ginuo kag sang ako ginbuligan sang iban.
Una, ang tanan nga tawo mas malipayon kag nagabatyag sing dugang nga respeto-sa-kaugalingon kon makapanigana sila para sa ila mga kaugalingon kag sa ila pamilya kag dayon makadab-ot agud magtatap sang iban. Ginapasalamatan ko ang yadtong mga nagbulig sa akon nga masabat ang akon mga panginahanglan. Mas labi ko nga ginapasalamatan sa sulod sang madamo nga mga tinuig ang mga yadtong nagbulig sa akon nga magsandig-sa-kaugalingon. Kag dayon ginapasalamatan ko labaw sa tanan ang yadtong nagpakita sa akon kon paano gamiton ang pila sang sobra ko nga mga ikasarang sa pagbulig sa iban.
Natun-an ko nga ang pamaagi agud makaagom sing sobra amo ang paggasto sing mas gamay sangsa akon ginakita. Sa sinang sobra natun-an ko nga mas maayo gid man ang maghatag sangsa magbaton. Isa ka rason sina amo nga kon maghatag kita sing bulig sa pamaagi sang Ginuo, ginabugayan Niya kita.
Si Pangulong Marion G. Romney naghambal parte sa buluhaton sang welfare, “Sa sini nga buluhaton, indi kamo sarang makahatag sing tuman sa bagay nga kamo naman ang magakinahanglan.” Kag dayon ginsambit niya ang iya mission president nga si Melvin J. Ballard, sa sini nga paagi: “Ang isa ka tawo indi makahatag sing isa ka tipik [sang tinapay] sa Ginuo nga indi magbaton sing isa ka bareta sang tinapay sa baylo.”3
Nakita ko nga matuod ina sa akon kabuhi. Kon maalwan ako sa mga anak sang Amay nga Langitnon nga nagakinahanglan, maalwan man Sia sa akon.
Ang ikaduha nga prinsipyo sang ebanghelyo nga nangin giya sa akon sa buluhaton sang welfare amo ang gahum kag bugay sang paghiusa. Kon mag-ulolupod kita sa pag-alagad sang mga tawo nga nagakinahanglan, ginahiusa sang Ginuo ang aton mga tagipusuon. Si Pangulong J. Reuben Clark Jr. nagpahayag sa sini nga paagi: “Inang paghatag … nagdala … sang balatyagon sang lapnagon nga pag-ulolutod bangod ang mga tawo sang tanan nga sahi sang paghanas kag palamugnan nag-obra sing ulolupod sa isa ka Welfare garden ukon iban pa nga proyekto.”4
Inang nagadugang nga balatyagon sang pag-ulolutod matuod gid para sa nagabaton subong man sa nagahatag. Tubtob sini nga adlaw, ang tawo nga akon nakaupod sa pagpala sang lunang sa iya nabahaan nga puluy-an sa Rexburg nakabatyag sang pagkasuod sa akon. Kag nakabatyag sia sing mas dako nga personal nga dignidad sa paghimo sang tanan nga iya masarangan para sa iya kaugalingon kag para sa iya pamilya. Kon nag-obra kami sing isahanon, duha kami kontani alangay nga wala makatilaw sing espirituhanon nga pagpakamaayo.
Nagapadulong ina sa ikatatlo nga prinsipyo sang pagbuhat sa buluhaton sang welfare para sa akon: Paentraha ang inyo pamilya sa buluhaton upod sa inyo agud nga matun-an nila ang magtatap sang tagsa-tagsa sa amo man nga paagi nga nagatatap sila sang iban. Ang inyo mga anak nga nagaobra upod sa inyo sa pag-alagad sa iban nga nagakinahanglan mangin may huyog sa pagbulig sang tagsa-tagsa kon sila nagakinahanglan.
Ang ikaapat nga importante nga prinsipyo sang welfare sang Simbahan natun-an ko sang nangin bishop ako. Naghalin ini sa pagsunod sang sugo gikan sa balaan nga mga kasulatan nga pangitaon ang mga kubos. Katungdanan sang bishop nga magpangita kag maghatag sing bulig sa yadtong nagakinahanglan sa gihapon sing bulig pagkatapos sang tanan nga sarang nila mahimo kag sang ila mga pamilya. Nasalapuan ko nga ang Ginuo nagapadala sang Balaan nga Espiritu agud himuon nga posible ang mag-“pangita, kag kamo makakita”5 sa pagtatap sang mga kubos subong sang ginahimo Niya sa pagpangita sang kamatuoran. Apang natun-an ko man ang paglakip sang pangulo sang Relief Society sa pagpangita. Mahimo niya mabaton ang bugna antes pa man ninyo mabaton ini.
Ang pila sa inyo magakinahanglan sinang inspirasyon sa maabot nga mga binulan. Agud isaulog ang ika-75 nga anibersaryo sang welfare program sang Simbahan, ang mga miyembro sa bilog nga kalibutan pagaagdahon sa pagpartisipar sa isa ka adlaw sang pag-alagad. Ang mga lider kag mga miyembro magapangita sang bugna sa ila pagdisenyo sang kon ano ang mangin mga proyekto.
Magahimo ako sing tatlo ka mga panugyan samtang ginaplano ninyo ang inyo proyekto sa pag-alagad.
Una, ihanda ang inyo kaugalingon kag yadtong inyo ginagiyahan sing espiritwal. Lamang kon ang mga tagipusuon napahumok sang Pagpasag-uli [Atonement] sang Manluluwas nga sarang ninyo makita sing maathag ang katuyuan sang proyekto bilang bugay alangay sa espiritwal kag temporal sa mga kabuhi sang mga anak sang Amay nga Langitnon.
Ang akon ikaduha nga panugyan amo ang pagpili bilang mga bumalaton sang inyo nagaalagad nga mga tawo sa sulod sang ginharian ukon sa komunidad nga ang mga panginahanglan magatandog sang mga tagipusuon sadtong magahatag sang pag-alagad. Ang mga tawo nga ila ginaalagaran magabatyag sang ila pagpalangga. Ayhan mas daku ang mahimo sini sa pagpalipay sa ila, subong nga ginapromisa sang ambahanon, sangsa pagsabat lamang sang ila temporal nga mga panginahanglan.
Ang akon katapusan nga panugyan amo ang pagplano sa paggamit sang gahum sang mga kaangtanan sang mga pamilya, sang mga korum, sang mga organisasyon sang auxiliary, kag sang mga tawo nga inyo nakilala sa inyo mga komunidad. Ang mga balatyagon sang paghiusa magapadamo pa gid sang mga maayong epekto sang pag-alagad nga inyo ginahatag. Kag ang yadtong mga balatyagon sang paghiusa sa mga pamilya, sa Simbahan, kag sa mga komunidad magatubo kag mangin isa ka wala’y katapusan nga panublion bisan madugay na nga natapos ang proyekto.
Akon ini oportunidad agud sugiran kamo kon ano ang akon pag-apresyar sa inyo. Paagi sa mapinalanggaon nga pag-alagad nga inyo nahatag para sa Ginuo, nangin bumalaton ako sang mga pagpasalamat sang mga tawo nga inyo nabuligan sa akon pagsumalang sa ila sa bug-os nga kalibutan.
Nakasalapo kamo sang paagi agud itib-ong sila sing mas mataas samtang nagbulig kamo sa pamaagi sang Ginuo. Kamo kag ang mapainubuson nga mga disipulo sang Manluluwas kasubong ninyo naghaboy sang inyo tinapay sa tubig sa pag-alagad, kag ang mga tawo nga inyo nabuligan nagtinguha sa paghatag sa akon sang isa ka bareta sang tinapay sang kapasalamatan sa baylo.
Mabatonan ko ang amo man nga pahayag sang pag-apresyar gikan sa mga tawo nga nakaobra upod sa inyo. Nadumduman ko isa ka bes nga nagatindog ako sa tupad ni Pangulong Ezra Taft Benson. Nagasugilanonay kami parte sa pag-alagad sa welfare sa Simbahan sang Ginuo. Ginkibot niya ako sang iya lamharon nga kapagsik sang sia nagsiling nga ginakumpas ang iya kamot, “Palangga ko ini nga buluhaton, kag ini buluhaton!”
Para sa Manunudlo ginapabutyag ko ang akon pagpasalamat para sa inyo buluhaton sa pag-alagad sang mga anak sang aton Amay nga Langitnon. Kilala Niya kamo, kag makita Niya ang inyo mga pagtinguha, kaukod, kag sakripisyo. Ginapangamuyo ko nga hatagan Niya kamo sang bugay nga makita ang bunga sang inyo mga pagpangabudlay sa kalipayan sang yadtong inyo nabuligan kag sa inyo mga nangin kaupod sa pagbulig para sa Ginuo.
Nakahibalo ako nga ang Dios nga Amay buhi kag ginapamatian ang aton mga pangamuyo. Nakahibalo ako nga si Jesus ang Cristo. Kamo kag ang yadtong inyo ginaalagaran sarang matinloan kag mapabakod paagi sa pag-alagad sa Iya kag pagtipig sang Iya mga kasuguan. Mahibaloan ninyo subong nga nahibaloan ko, paagi sa gahum sang Balaan nga Espiritu, nga si Joseph Smith nangin propeta sang Dios sa pagpanumbalik sang matuod kag buhi nga Simbahan, nga amo ini. Nagasaksi ako nga si Pangulong Thomas S. Monson ang buhi nga propeta sang Dios. Isa sia ka halangdon nga ehemplo sang ginhimo sang Ginuo: nagalibot sa paghimo sing maayo. Ginapangamuyo ko nga kabay nga kuhaon naton ang aton mga oportunidad sa “pagbayaw sang mga kamot [nga] nagagaway, kag pagpabakod sang maluya nga mga tuhod.”6 Sa sagrado nga ngalan ni Jesucristo, amen.
© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Pagtugot sa Ingles: 6/10. Pagtugot sa paglubad: 6/10. Paglubad sang Visiting Teaching Message, May 2011. Hiligaynon. 09765 861