Techall el Meruul a Ungil
A teletael el Rubak obang e olngeseu er tirkel mechebuul a ultuil ra rechad el tir okiu a beltik el reng e chemoit a temir ma ikel ngarngii er tir el mora Dios ma Urerel.
Rodam ma rodos a moktek ra klmechek a omengull ma oldanges el kirel aikel blal ruul a Rubak e melemolem el meruul el kirel omesiou el mora remechebuul ma rekosekodel el Ngelekel el ngara beluulechad. Ngii a betik a rengul ra rengara chelebuul el Ngelekel ma dirrek el tirkel tir olngeseu. E Ngii a mla kudmokl a teletael el mo omekngeltengat er tirkel mechebuul ma tirkel tir olngeseu.
A Demad ra Babeluades a orrenges a nglunguchir a Rengelekel ngara beluulechad el olengit a kall, bail el bo loubail, ma chetengakl el mo sebecherir el di mo tir el mesiou er tir. Ngii a mla remenges aikal ongit ele Ngii el ngiluu a sechal ma redil el loiiang ra beluulechad.
Ke mes aikal chelebuul ra ikel mngarngii ma dirrek el beluulechad el rokir. A rengum a blechoel mo melatk e chubteterir tirkal chad. Sel betik ra chad el meringel el osiik a ureor eke mo omelchesiu er kau el semeriar el ngoseuir. Kede dirrek el melchesuar sel bora blil a mesobil dil e lak a kelel. Kede dirrek el mo melchesuar sel momes a siasing ra rengalk el dengchokl rikl ra blirir el mla metemall ra desiu malechub a ngau.
Ele Rubak el mla remenges a lengelir e omelchesiu ra dmolech el chubechub el reng er kau el mor tir, e Ngii el diuaia ngaramong a mla kudmeklii a teletael el Rechedal a olngeseu. Ngii a mla siotai ra rengelekl el mo chemoit a temir, ikel ngarngii er tir, ma bedengir el mo dmak Lobengkel el mesiou ra rebebil.
A teletael el Ngii olngeseu a mle okedongall el living the law of consecration. Ea kuk tara taem ea tial teletael a mle okedongall el united order. E chelechal taem eng okedongall el Church welfare program.
A ngklel ma telengtengil tial ureor a mengodech el ultuill ra usbechellir ma teletael el rechad a ngara chelsel. Eng di a teletael el Rubak a olngeseu ra ikel usbechellel a bedenged a uldimukl ra rechad el lokiu a beltik el reng e chemoit a temir ma ikel ngarngii er tir el mora Dios ma Urerel.
Ngii a mla siotai e kmung er kid me bo doruul a Urerel el mo olngeseu ra remechebuul. Kid a siliseb ra telbiil el mo meruul er tiang er sera denguu a techolb e chelid ma dirrek el chelsel a chedaol templo ra Dios. Kede mekbeches a telbiil sel Sandei el dolai ra sacrament.
A moktek er ngak er chelechal sils a mo smaod a bebil ra techall el Ngii a mla ocholt el mer kid el sebeched el ousbech el olngeseu er tirkel mechebuul. Ng diak el sebechek el smaod el rokui ra chelsel tial kedeb el mitilenged. A urungulek a mo mekbeches e smisichii a blak el reng er kemiu el mo oureor.
Ngarngii a chelitakl el kirel ongtil a Rubak er tial ureor el ngii a bla kungitakl er ngii ra kekerei el buik. Sera kekerei eak bai kerekikl lorrenges ra hu er tial chelitakl e diak kumtab a tekoi ra chelsel. Meng nglunguchek el kmo bo momelchesiu a belkul a tekoi er tial chelitakl ra chelsel a rengmiu er chelechal sils. Mei e deluut el remenges aikal tekoi ra chelsel:
Ngarngii a ungil omeruul el blak rellii er chelechal sils?
Ak mla ngoseuir a chebuul?
Ak mla odeuir a rengul a chad e rullii a kmong techang el mo ngara deoureng?
Alsekum eng diak, eng meral diak a ngeral bla krellii.
Ak mla ngoseuir a chad ra berraod el chellungel er ngii?
Ele ngak el mle blak a renguk el ongeseu?
Ak mla ngosuterir a rsmecher ma remechitechetong?
Sera lousbech a ngesou eak mlarngii?
Me bom kerekikl e mrellii a kmo ngerang e lak di,
Momdasou ra ngkedem ra babeluades.
Ng deoureng el doruul a ungil, el kmal kou el deoureng,
El klengeltengat ra ngerachel ma beltik el reng.1
A Rubak a blechoel oldurokl a tekoi el mekletkid el rokui. A bebil ra taem eng klou el klechubechub el domelchesiu er ngii el kirel a chad el chebuul. A chedam a locha mla omelchesiu er ngii sel lesang a ngalk el mesibas e lemetabt a bkul ochil. A chedil meng locha mla omelchesiu er ngii sel rengesii a ngalk el lemangel ra klebesei. A ngalk el sechal malechub a redil a locha mla omelchesiu er ngii sel lesang a chad el locha mekngit a rengul malechub eng medakt ra ngerang ra skuul.
Kid el rokui el mla omelchesiu el mekngit a rengud el kirir tirkel diak dodengelterir el chad. El uaia, sera omrenges chisel a daob el siliseb ra ikel beluu ra Taiheio el desiu ra Siabal a uchul e ko mlo omdasou el kirir tirkel locha miltemall.
A reng ra klechubechub a mlora retelael er kemiu ra bo modengei el kirel a ieleb el mlara beluu ra Queensland, Australia. A tekoi ra nius a ulemesingd el kirel a iidisir a rengesool chad. Eng di a rebebil er kemiu a mlo omelchesiu ra ringel el kirir tirkal chad. Sel uaia luleklatk el okedong e mlo nger lokiu ra betok ra tal telael ma eim el dart el chad ra Ikelesia el mle olngeseu e mengelaod a rengrir a rechad ra Australia.
Aikel lulmelchesiu el reng a ulebult el mo ngesou ra omeruul el oltirakl a telbiil el blal ruul. Ak mla mes a klengeltengat el mora chad el ngilai a ngesou ma dirrek el chad el ngiluu a techall el mo olngeseu.
A remellomes el chedam ma chedil a mes a usbechellir a rebebil el uaia luchul a klengeltengat el mora klengar ra rengelekir el sechal ma redil. Tedei el ngalk a dirk ulab a kmal ungil kall el ngara blil el mei ra blimam. A rechad ra blirir a mle medengei el kmo aki ousbech a ngesou e ulsiseb ra rengelekir er tial techall el mesiou er kemam.
Tirkal chedam ma chedil a ulemekngeltengat ra telungalk er kemam lokiu a ungil omesiungir. Me sel besterir a techellir a rengelekir el mesiou, ete odars a klengeltengat el mora rengelekir a rengelekir. A klikm el mlara mederir tirkal ngalk ra lorael a rirellak el mo medengei el kmo a rengelekir a rengelekir a mo mukngeltengat. Tir a mo ouchais ra rengelekir el kirel a deoureng el lulmelchesiu er ngii sel losiou ra Rubak. Ak mo lotkii tiaikid el ungil reng el domelchesiu er ngii rak ngalk e kumadel a udel ra blil a tonari el demak a uleldurch er ngak. Me sel ngak a modurch el mo olngeseu eak mo lotkii e oumerang ra chelitakl el kmo, “Sweet is the work, my God, my King.”2
Ak medengei el kmo a tekoi ra chelsel tial chelitakl a milluches el smodii a deoureng el mei sel dongull ra Rubak ra temel Chedaol Sils. Eng di tirkel ngalk el mlei ra blimam a milchesuar a deoureng ra omeruul urerel a Rubak ra di mle mitil a sandei. Ea rechad ra blirir a milsang a techall el omeruul ungil lobengkel a deoureng ra telcheroll ruriul.
Sel teletael ra Rubak el omekerreu ra remechebuul a mesterir a tara techall a rechedam ma rechedil el mo omekngeltengat ra rengelekir. Ak milsang ra chelsel a ikelesia ra tara Sandei. A kekerei el ngalk a milsang a bisop a huto er tia ra lorael me soiseb ruchei ra miting ra sacrament.
Ak mle medengelii tial telungalk me ngikal buik. Tial telungalk a dirk mlo medengei el kmo ngarngii a chad ra chelsel a ikelesia el ousbech a ngesou. Ngkal chedam a dillii a uaisei el tekoi el mor ngikal buik tia ra lodersii tial huto el ngarngii a ngesou ra olsengerenger. “Aki ulsengerenger er chelechang e milluluuch el kirir tirkel mechebuul. A kulengit me mnguu tial huto el msang a bisop. Ak medengei el kmo ngii a mo nguu el ngosuterir tirkel lmuut el kmal ousbech a ngesou.”
Meng locha bai diak lomelchesiu ra ringel ra klengerenger er tiaikid el Sandei e bai locha mo ngara deoureng sel bol letkii tial sils. Ak milsang ra klikm er ngii ma teletelel ra lorreked er tial huto el mal merengul ele demal el uluumerang er ngii el kmo ng sebechel nguu a uldersel tial telungalk el mora remechebuul. Ngii a mo dobedebekii tiaikid el sils sel bol deacon, e melemolem el melbedebek er ngii el mora ulebongel.
Ak dirrek el milsang osisiu el deoureng ra mederir a rechad el ulengeseu ra Rubak ra chelsel a beluu ra Idaho ra betok el rak ra memong. Sel Teton Dam a ulebuu ra mle Sabadong, el June 5, 1976. Teruich ma tang el chad a mlad. Ea retelael a kirir el tuobed ra rekeblirir ra chelsel a di kesai el sikang. A bebil ra blai a ulebechakl. E betok ra dart el blai a sebechel muut el mekedmokl el mo sebechel a delengchokl er ngii lokiu a meringel el ureor el ngii a diak el sebecherir tirkal chad el oublai aikal blai el remuul.
Tirkel rirngesii tial chelebuul a mlo mui ra chubechub e ulemelchesiu ra okedong el mo meruul a ungil. A retonari, rebisop, remerreder ra Relief Society, roldingel e olisechakl el sechal ma redil a tilobed ra rekeblirir e mlo mengedmokl aikal telemall el blai.
A reterung el obekel el mlara omilil ra tara beluu a luuetang el mora Rexburg ruriul er tial ieleb. Ng dimlak el bo lomes ra blirir. Te bai, miltik ra bisop er tir e oker el kmo te mekerang a lolngeseu. Ng uldurekelterir el mora telungalk el ousbech a ngesou.
Uriur ra sesei el klebesei ete mocha er tial basio el dechor ngii a blirir. Ng mle dibus, el di ririid ra ieleb. Te liluut el mocha ra bisop er tir e oker, “Chelechang, e ngera soam a ki moruul er ngii?”
Ngii dil ker el mngarngii, e ko mla mes ongasireng ra klechubechub el obult el mo omesiou. Ng locha dimlak el dubech ra taem ra meklou el chelebuul. Ak mla mesang ra chelsel a cheldebechel ra priesthood el tara odam a mlo dechor e mesaod ra sechal malechub eng redil el ousbech a ngesou el osiik a techall ra ureor me bol sebechel mesiou er ngii ma telungalk er ngii. Ak mlo melchesuar a klechubechub, eng di a rebebil a dmung a ngklir a rechad el sebecherir el mesterir a ureor a rechad el ousbech el oureor.
Me sel dilubech ra chelsel a cheldebechel ra priesthood ma dirrek el dilubech ra Idaho a olchotel a teletelel a Rubak a lolngeseu er tirkal kmal ousbech a ngesou el mo sebecherir el lemuut el di mo tir. Kede mo omelchesiu ra klechubechub e medengei el kmo kede mekerang e mo ngara omeruul er sel ngii a teletelel a Rubak a lolngeseu.
Kede oudkeu ra 75th el anniversary ra welfare prokuram ra Ikelesia er chelechal rak. Ng ulemuchel el mo olngeseu er tirkel mlo diak loureor, diak a sersir ma rekeblirir er sera lomuchel sel mlo okedongall el kmo “Taem er a Klou el Chelebuul.”
Klou el usbechellel a ngesou ra rengelekel a Demad ra Babeluades a mla lmuut el mei er chelechal taem el diuaia ngara mong ma dirrek el ngar medad. A llach el ngii a dodai ra Church welfare prokuram a diak dil kirel a tal taem malechub el chimol basio. Aikang a kirel a rokui el taem ma rokui el basio.
Aikal llach a chedaol e diak a ulebengelel. Tiaikid a uchul, e sel bo dodengei e dosiseb ra chelsel a rengud eng mo sebeched el mes e ngmai a techall el mo olngeseu ra chelsel a ngii dil ngerang el Rubak a siotai er kid el mong.
Aikakid a bebil ra llach el mla omekrael er ngak sel bol soak el olngeseu ra Rubak me sel ngak a ngmai a ngesou ra rebebil.
A kot, a bekel chad a ngara deoureng e di tir el melchesuar omengull el mor tir sel sekum ng di tir el mesiou a klechad er tir ma telungalk er tir ma dirrek el omekerreu ra rebebil ra rechad. Ng dmeu a renguk er tirkel mla ngosukak ra ikel usbechellek. A dirrek el kmal lemuut el dmeu a renguk el kirir tirkel chad ra chelsel a betok el rak el mla ngosukak el di mo ngak el mesiou ra klechad er ngak. E dirrek el kmal dmeu a renguk el kirir tirkel mla ngosukak el kmo ak mekerang e ngmai aikel kuk ngarngii er ngak el ngosuterir a rebebil.
Ak mla suuebii el kmo sel uchul eng morngii a derengel a ududek a sel kusuub el mengoit a kesai ra kerkerengek. Ma ikaikid el derengel a ududek eak mla chochotii lokiu a ungil teletael el kmo ng meral ungil sel dolngeseu ra bai dengai a ngesou. Tiang a mo uaisei ele sel dolngeseu el ngara sel teletelel a Rubak e Ngii a mo omekngeltengat er kid.
A President Marion G. Romney a millekoi el kirel a ureor ra ngesou el kmo, “Ng diak el sebechem el mo chebuul er tial ureor.” E dillii a tekingel a mle merreder ra mision, el Melvin J. Ballard, el kmo: “Ng diak a chad el nguu a telkib el msang a Rubak e diak el nguu a cherrungel ruriul.”3
Ak mla metik er tiang el kmal klemerang ra chelsel a klengar ngak. Sel sekum eak bekokeuii el mora rengelekel a Chedam ra Babeluades, e Ngii a mo bekokeuii el mer ngak.
A ongerung el osisechakl ra ebangkelio el ngii a mla mekrolak ra ureor ra olngeseu a sel klisiich ma klengeltengat sel dekaukledem. Sel bo dedak e dosiou ra remechebuul, ea Rubak odak a rengud. A President J. Reuben Clark, Jr. a dillii er tiakid el teletael: “A klaingeseu… a locha meskid… sel kltalreng ra klodam ele rokui el chad a uaia lengara tal omesuub ma tal ureor el dmak el oureor ra sersel a Welfare malechub a chimol kmo ngerang el omeruul.”4
Tial mesisiich el reng ra klodam a klemerang el mora chad el ngmai a ngesou ma chad el olngeseu. Mei er chelechal sils, ea chad el kulsebel a dengitech ra blil ra Rexburg ra lemetengel a ieleb a kmal tang a delongelam. A ngii omelchesiu ra mesisiich el chetengakl el sebechel mla kudmokl aikel ngii ousbech ma telungalk er ngii. Omko ng dimlak kim dak el oureor, eng locha diak ki momelchesiu a chedaol klengeltengat el terung.
Tiang a mekrolid el mora ongedei el llach el kirel a ureor ra ngesou: A telungalk er kau bol ngara ureor ra omesiou lobengkem me bol sebechereir el kaukerreu el diuaia lomekerreu ra rebebil. A rengelekiu el sechal ma redil el ngara ureor ra omesiou el obengkem a mo sebecherir el kaingeseu sel bo lousbech a ngesou.
A ongeuang el llach ra Church welfare ak silubii ra taem el kbisop. Ak ngiluu ra bades ra chedaol llechukl el kirel oderuchel el mo osiik ra remechebuul. Ngerchelel a bisop el mo osiik e olngeseu er tirkel tir ousbech a ngesou ruriul ra ikel tir ma telungalk er tir a mla remuul. Ak mlo metik el kmo a Rubak odureklii Chedaol Reng meng mo sebechel tiang el mekedmokl el mo “osiik me bo betik”5 sel domekerreu ra remechebuul el diuaia dosiik ra klemerang. Ak dirrek el silubii el kmo a merreder ra Relief Society meng kirel mora siik. Ng locha sebechel mereched er kemiu el ma nguu ocholt.
A bebil er kemiu a locha mo ousbech er tial chedaol ulekrael ra chelsel aikal buil el merael mei. Me sel dongull er tial 75th anniversary ra Church welfare prokuram, ea rechad ra ikelesia ra beluulechad el rokir a mo mongit el mo teloi er tial sils ra omesiou. A roungerachel ma rechad ra ikelesia a mo osiik chedaol ocholt sel bo longedmokl aike bo loruul.
Ak mo kmung a kldei el tekoi el bo momtab sel bo mongedmokl el kirel omesiou.
A kot, mkedmeklau ra chedaol tekoi. Ng di sel ngariou a rengum lokiu a Tngakireng ra Osobel e kau a mo ungil mesang sel moktek ra omeruul el mo klengeltengat ra chedaol tekoi ma tekoi ra klechad el mora klengar ra rengelekel a Chedam ra Babeluades.
A ongerung el kdelii a kmo bo molilt er tirkel bo molngeseu er tir el usbechellir a mo remutech a rengrir tirkel tir a mo mesiou. A rechad el bo mosiou er tir a mo melchesuar a beltik el reng er kau. A beltik el reng el bo molchesuar el mor tirkel mosiou er tir a locha mo rulterir el mo ngara deoureng, el uaisei el chelitakl, ra bai di ikel lousbech a bedengir.
A ulebongel el kdelii a kmo bo mousbech ra klisichel a kltalreng ra telungalk, chelechad ra quorum, aikel telengtengil a ikelesia, ma rechad el mkaodengei ra buai. Sel reng ra kaukledem a mo chachisois el kirel a klungiaol ra omesiou el mruul. E sel reng ra kaukledem ra chelsel a telungalk, Ikelesia, ma buai a mo mesisiich e diak a ulebengelel dikesel ruriul ra ulebongel er tial omeruul.
Tiaikid a techellek el ouchais er kemiu el kmo ng kmal dmeu a renguk er kemiu. Ngokiu aikel omesiou el bla modars ra Rubak eak mla ngmai omereng el saul ra rechad sel kim kebetech el kemiu a mla ngosuterir.
Ke miltik ra rael el ngosechekelterir el mora deoureng sel molngeseu el ngar sel teletelel a Rubak. Kemiu el ngariou a rengmiu el chedal Osobel el uaia bla modulb ra chelsel a ureor ra omesiou, ma rechad el bla mngesuterir a mla melasm el omeskak omereng el saul.
Ak ngmai osisiu el omereng el saul ra rechad el tir a mla oureor el obengkemiu. Ak lotkii a tara taem el blek dechor bita ra President Ezra Taft Benson. Aki milsaod el kirel omesiou ra chelsel a Ikelesia ra Rubak. Ng kora mlo mechas a renguk er ngii ra lsal kora mesisich a ngerel, e loldars a chimal el dul kmo, “Ng kmal soak tial ureor, e tiang a ureor!”
Kumtechei ra Mastang ea kuureng a suliu el kirel a ureor ra omesiou el moruul el mora rengelekel a Demad ra Babeluades. Ngii a medengelkau e Ngii a mesang a blak el reng er kau, duchel reng, ma ringel. Nglunguchek me Ngii bol beskau a klengeltengat el mo mes a rdechel a urerem ra chelsel a deoureng er tirkel kau a mla ngosuterir el kirel a Rubak.
Ak medengei el kmo a Dios el Chedam a ngar e orrenges a nglunguched. Ak medengei el kmo a Jesus a Kristo. Kau me tirkel mosiou er tir a sebechemiu el mo klikiid e mesisiich lokiu omesiungiu el mor Ngii ma otireklemiu ra Llechul. Ng sebechem el mo medengei el uaia ngak el medengei, lokiu a klisichel Chedaol Reng, el kmo a Joseph Smith a mle profet ra Dios el ulutii tial merang el Ikelesia, el tiaikid. A kuuchais el kmo a President Thomas S. Monson a ngar el profet ra Dios. Ngii a mesisiich el okesiul aikel luruul a Rubak: el merael meruul a ungil. Meng nglunguchek me dengai aikel techall el el mo “mesebechakl ra remechebuul, e dolisiich ra remechitechetong.”6 El ngara ngklel a Jesus Kristo, amen.
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a Visiting Teaching Message, May 2011. Palauan. 09765 881