Agtutubo
Umdas a Kuarta
Naam-ammok dagiti misionario idi agtawenak iti 17. Iti dayta a panawen agkaduakami nga agbibiag ken manongko. Pimmusay ti inami idi napalabas a tawen, ket narigat ti biagmi. Idi sinuruannak dagiti misionario, makitak a ti Simbaan ti kanayon a sapsapulek. Ngem ti impluensia dagiti gagayyemko ti nanglapped kaniak iti ipapanko iti simbaan iti tunggal Domingo.
Iti naminsan, napanak iti maysa nga aktibidad ti Simbaan iti dayta a lawas. Iti pannakakitak kadagiti amin nga agtutubo nga agkakatawa ken agay-ayam ket nangisangbay kaniak iti naindaklan a rag-o. Dagiti misionario, a kadua dagiti agtutubo, ket naaddaanda iti dayta a gundaway a nangisuro kaniak iti adalen ti ebanghelio, ket naawis unay ti riknak isu nga inkeddengko ti agpabuniag.
Ngem uray kalpasan ti panagkamengko ti Simbaan, naipasangoak kadagiti karit. Sisiak laeng ti miembro ti Simbaan iti dayta a paset ti ili ken adayo ti pagnaedanmi iti balay a pagtataripnongan wenno meetinghouse. Awanen ti ania man a banag a kayat nga aramiden kaniak dagiti saan a miembro a gagayyemko. Idi nariknak ti kinaagmaymaysa, nagkararagak ket nariknak ti ayat ti Apo.
Tunggal bulan, umawatak iti sangkabassit a bingay ti kuarta manipud iti pondo nga imbati ni nanangko. Narigat a biagen ti bagik iti kasta laeng a sangkabassit a kuarta. Ngem inkeddengko ti agbalin a managtungpal. Nagbayadak iti apagkapullo ken nagbayadak pay ti pagplete a mapan iti seminary ken kadagiti miting ti Domingo. Diak naawatan no kasano, ngem iti gibus ti bulan, natakuatak nga adda umdas a kuarta tapno maaramidko amin dagitoy.
Ammok a nabendisionannak babaen iti panagbayad iti apagkapullo. Iti panagtungpal iti daytoy a bilin ket nakatulong kaniak a maaddaan iti napigpigsa pay a pammaneknek, agserbi iti mision, ken makailasin kadagiti bendision tapno mapapigsak dagiti baro a miembro a maipaspasango kadagiti karit wenno pannubok.