Mensahe ti Umuna a Panguluen, Hunio 2011
Dagiti Bendision ti Apagkapullo
Ti panggep ti Apo iti panangted kadatayo kadagiti bilin ket tapno bendisionannatayo. Kayatna nga ipaayannatayo iti biag nga agnanayon, ti kaindaklan kadagiti amin a sagutna (kitaen iti DkK 14:7). Tapno maawat ti sagut ti panagbiag iti dennana iti agnanayon a kas pamilia iti celestial a pagarian, nasken a tungpalentayo dagiti linteg iti dayta a pagarian (kitaen iti DkK 88:22).
Inikkannatayo kadagiti bilin iti daytoy a biag tapno tulongannatayo a padur-asen dayta a kabaelan. Ti linteg ti apagkapullo ti maysa kadagita a panangisagana a bilin. Ti linteg ket mangtedtayo iti Apo iti apagkapullo iti amin a natgedantayo. Simple laeng daytoy ta uray ubing ket maawatanna daytoy. Nakakitaakon kadagiti ubbing a mangyaw-awat iti bishop ti sobre ti apagkapullo a naglaon iti apagkapullo a naulloda.
Maysa kadagiti bendision a sumangbay iti panagbayad iti apagkapullo ket ti panangpapigsa iti pammati nga agtungpal uray iti nangatngato pay a linteg. Tapno makapagnaed iti celestial a pagarian, nasken a tungpalentayo ti linteg ti panagkonsagrar. Sadiay ket nasken a mariknatayo nga amintayo ken amin nga adda kadatayo ket kukua ti Dios.
Adda tallo a wagas a ti panagbayad iti sibubukel nga apagkapullo iti daytoy a biag ket mangisagana kadatayo a makarikna iti nasken a mariknatayo tapno umawat iti sagut ti agnanayon a biag.
Umuna, no bayadantayo dagiti apagkapullotayo iti Simbaan, ibukbok ti Nailangitan nga Amatayo dagiti bendision kadatayo. Asino man nga agtultuloy iti panagbayad iti apagkapullona ket ammona a pudno daytoy. No dadduma naespirituan dagiti bendision ken no dadduma ket temporal. Maited dagitoy iti panawen ti Apo ken mayannurot iti no ania ti ammona a nasayaat para kadatayo.
Iti panagsangbay dagita a bendision, dumakdakkel ti pammatitayo a ti Dios ti pagtaudan iti amin a nasayaat iti panagbiagtayo. Agbalin a nalaklaka a kitaen a ti panagkonsagrar ket simple a makailasin ti kinapudno a ti amin a pinarsua ti Dios ket kukuana. Pagbalinennatayo a makarikna iti panagyaman a kidkiddawenna laeng ti 10 a porsiento iti intednan kadatayo. Ngarud, ad-adda a nakasaganatayo nga agtungpal iti linteg iti panagkonsagrar no maidawatto daytoy kadatayo.
Maikadua, amintayo nga agtultuloy a nagbayad iti sibubukel nga apagkapullo ket makarikna iti dakdakkel a panagtalek iti panagdawat iti Apo no ania ti masapultayo ken ti pamiliatayo. Inkarina dagiti bendision uray ad-adu pay ngem ti nasken a maawattayo no nagbalintayo a napudno iti katulagantayo nga agbayad iti apagkapullotayo (kitaen iti Malakias 3:10). Ngarud, ti maysa kadagiti kaindaklan a bendision ti apagkapullo ket ti panagtalek no anianto ti masakbayan. Ania man dagiti kasasaadtayo, agbalinto a nasayaat ti amin. No tungpalentayo dagiti karitayo, tungpalenna met dagiti karina. Ti rikna ti kinatalna ket maysa kadagiti naindaklan a bendision iti panagbayad iti sibubukel nga apagkapullo. Kadagiti nagtungpal iti bilin ti apagkapullo ket makapagpaneknek a ti bendision ti kinatalna ket napaypayso ken napateg.
Maikatlo, dagiti agbaybayad iti apagkapullo ket makarikna iti dumakdakkel a panagayatda iti Dios ken iti amin nga annak ti Dios. Dayta a dakdakkel a panagayat ket sumangbay manipud iti pannakaawat no kasano nga usaren ti Ama dagiti apagkapullo nga ipapaaytayo tapno mangbendision kadagiti tao iti daytoy a lubong ken iti kinaagnanayon.
Manipud kadagiti naikkan turay wenno napusgan a katulonganna, busbosenna dagiti apagkapullo a napnuan iti panagannad. Ti agbaybayad iti apagkapullo ket tulonganna ti Apo a mangbangon kadagiti templo, a mabalin a pakailantipan dagiti pamilia iti agnanayon. Tumulong ti agbaybayad iti apagkapullo Kenkuana a mangipatulod iti ebanghelio kadagiti tao iti amin a lugar. Tumulong ti agbaybayad iti apagkapullo Kenkuana a mangpakired iti mabisin ken agsagsagaba iti bukodna a wagas babaen kadagiti katulonganna. Asino man kadagita a katulongan ket maibagana kadakayo no kasano a dimmakkel ti panagayat gapu ta ti apagkapullo ket nausar tapno mangbendision kadagiti tao. Kasta met kadagiti napudno nga agbaybayad iti apagkapullo.
Ti pannakakun-os iti apagkapullo wenno tithing settlement ket maaramid kadagiti bulan iti masakbayan. Ikararagko ta sapay koma ta dakayo ken dagiti pamiliayo ket mangrugi itan nga agplano ken agsagana tapno maikari kadagiti bendision nga ibukbok ti Dios kadagiti amin a makaisao Kenkuana nga isuda ket agbaybayad iti sibubukel nga apagkapullo.
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti First Presidency Message, June 2011. Ilokano. 09766 864
Panangisuro manipud iti Daytoy a Mensahe
-
No dadduma ti kasayaatan a panangisuro iti masinunuo a pagbatayan ket ti panangipakita iti daytoy (kitaen iti Teaching, No Greater Call [1999], 164). Ibilang iti panangidawat iti maysa a miembro ti pamilia iti panangipakitana no ania ti ibagi ti maysa nga apagkapullo. Mabalinna nga ipakita daytoy babaen iti panangilasinna iti maysa a banag manipud iti maysa a ragup ti 10 a banag. Iti panangigibus, ibilang ti panangawis iti maysa a miembro ti pamilia nga ipakitana no kasano iti panagsurat iti papel ti apagkapullo wenno tithing slip.
-
“Dagiti suruanyo ket mairanud manipud iti pannakiraman ti tunggal maysa” (Teaching, No Greater Call, 63). Mangawis kadagiti miembro ti pamilia a mangiburay no ania ti patienda no ania ti kayat a sawen ni Presidente Eyring iti palawag a “makarikna iti nasken a mariknatayo tapno umawat iti sagut ti agnanayon a biag.” Ibilang ti panangilawlawag kadagiti tallo a wagas a ti panagbayad iti apagkapullo ket mangisagana kadatayo a makarikna ti nasken a mariknatayo nga umawat kadagiti bendision ti Dios.