Mensahe iti Visiting Teaching, Hunio 2011

Panangpapigsa kadagiti Pamilia babaen ti Temporal a Panagpannuray iti Bukod a Kabaelan

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati • Pamilia • Tulong

Ti panangpadur-as iti panagpannuray iti bukod a kabaelan—ti kabaelan a mangaywan iti bagbagitayo ken ti pamiliatayo—ket pagrebbengan ti tunggal kabsat a babai. Agbalintayo a managpannuray iti bukodtayo a kabaelan bayat ti panagsursurotayo a mangipateg iti trabahotayo, bayat iti panangsapultayo iti pammaregta tapno mangsarak kadagiti kasayaatan a wagas a pakaipaayantayo kadagiti bagbagitayo, ken bayat ti panagtrabahotayo a katinnulong dagiti miembro ti pamilia tapno maited dagiti kangrunaan a kasapulan.

No managpannuraytayo iti bukod a kabaelantayo, aramatentayo dagiti bendision ken pamataudantayo tapno agsagana ken maliklikan dagiti parikut. Nupay kasta, ti panagpannuray iti bukod a kabaelan, ket mapatibker pay bayat ti panagkararagtayo para iti tured a mangsango nga addaan pammati kadagiti karit wenno pannubok nga awan duadua a sumangbayto. Ti panagpannuray iti bukod a kabaelan ket mangpabael pay kadatayo nga agtungpal kadagiti katulagantayo a mangaywan kadagiti sabali.

Iti Relief Society, masursuruantayo kadagiti pagbatayan ken paglaingan maipapan iti panagpannuray iti bukod a kabaelan. Masursuro dagiti kabsat a babbai maipapan iti panagbadyet, pakalag-anan iti utang, dagiti kualipikasion iti panagtrabaho, dagiti nasantuan a kasuratan ken ti ebanghelio, panangisuro iti sabali nga agbasa ken agsursuro, teknolohia, salun-at ti bagi, kinapigsa, pananglapped ken pannakapaimbag iti adiksion, salun-at iti pannakilangen ken panagrikna, pananglapped iti sakit, panagmula, panangpaadda ken panagidulin iti taraon, panagsagana kadagiti saan a mapakpakadaan a pasamak, ken adu pay a sabali a banag a makatulong kadatayo tapno agbalintayo a managpannuray iti bukodtayo a kabaelan.¹

Julie B. Beck, Relief Society general president, ket inlawlawagna a “ti panangipaay iti kasapulan ti bagitayo ken dagiti sabali ket pakakitaan a datayo ket disipulo ti Apo Jesucristo. … Idi kellaat a pimmusay [ti katugangak a babai] idi napan a tawen, nangibati iti pakakitaan maipanggep iti panagpannurayna iti bukodna a kabaelan. Addaan isuna iti agdama a rekomenda iti templo ken kanayon a maus-usar a nasantuan a kasuratan ken dagiti pagbasaan iti panagadal iti ebanghelio. Siaayatkami a nangbingay kadagiti kaldero, paryok, ken platplato a nangisaganaanna iti rinibribu a pannangan. Imbatiannakami kadagiti kobrekama nga inaramidna manipud iti daan a lupot. Namati isuna iti daan a pagsasao nga “Usarem daytoy, aruatem daytoy, pagbalinem daytoy, wenno aramidem uray awan.Nakitami dagiti abasto ti taraon a pinatubona, tinaginayon, ken indulinna. Ti ad-adda a makawis unay iti rikna ket ti bassit a libro a pagkuentaanna a napudno unay a nakaisuratan dagiti gastosenna iti nasurok nga adun a tawen. Gapu ta nagbiag a nasalimetmet, nangibati iti sumagmano a kuarta a naurnongna para kadagiti di mapakpakadaan a pasamak, ken awan ti imbatina nga utang! Kangrunaanna unay, insuro ken pinaregtana ti adu a dadduma pay kadagiti paglaingan a nasursurona bayat ti napudno a panagbiagna.”²

Manipud kadagiti Nasantuan a Kasuratan

Juan 13:34–35; Santiago 1:27; Mosiah 4:26; Doktrina ken Katulagan 29:34–35; 38:30; 44:6

Manipud iti Pakasaritaantayo

Kanayon a makiramraman dagiti kabsat a babbai iti Relief Society iti aramid a naindagaan ken naespirituan a panangispal kadagiti kararua. Tunggal lawas bayat ti panagtataripnong kas Female Relief Society ti Nauvoo, inreport dagiti kabsat a babbai dagiti tao nga agkasapulan. Dagiti abuloy a kuarta, tagikua, talento, ken panawen ket naited tapno mapalag-anan dagiti agkasapulan. Daytoy a naipundasion nga aramid iti panangpalag-an iti sagabaen ket nagtultuloy nga aramid ti Relief Society agingga kadagiti kaputotan.

Idi dimteng dagiti Santo iti Salt Lake Valley, ni Presidente Brigham Young (1801–77) ket binalakadanna dagiti kabsat a babbai a tumulongda kadagiti agkasapulan ken mangsursuro kadagiti paglaingan a mangpalugod kadakuada a mangtaripato wenno mangaywan kadagiti bagbagida. Kinunana, “Agsursurokayo a mangbiag kadagiti bagbagiyo; mangidulin kadagiti bukbukel ken arina, ket urnongen daytoy para iti aldaw ti kinakirang.”³ Babaen ti panangiturong ti priesthood, agtultuloy ti Relief Society a mangisuro maipapan iti panagpannuray iti bukod a kabaelan, tapno masalakniban ti pamilia, ken tapno maparegta ti bukod a kinalinteg ken dagiti aramid a panangngaasi, ti natarnaw nga ayat ni Cristo.

© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, June 2011. Ilokano. 09766 864

Kasano a matulongak dagiti kabsat a babbai ken dagiti pamiliada tapno mapadur-asda ti temporal a panagpannuray iti bukod a kabaelan?
Kasano a mapadur-asko iti mismo a temporal a panagpannurayko iti bukodko kabaelan?