2011
Apochokuna Famini seni Tumunuk Pwisin non Pekin Inis
June 2011

Poraus seni Fefn Chon Amwa, June 2011

Apochokuna Famini seni Tumunuk Pwisin non Pekin Inis

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku • Famini • Aninis

Aochu tumunuk pwisin—ewe tufichin tumunukich pwisin me ach kewe famini—iei wisen meinisin fefin. Sia tongeni pwisin tumunukich nupwen sia kaeo ne tongei angang, nupwen sia kutta pwäratä ne kuna ekkewe anen awora fan itach, me nupwen sia angang ren chon ach famini ne awora met mi namot ngenikich.

Nupwen sia tongeni pwisin tumunukich, sia aea ach kewe efeioch me tufich ne ammonata ren me touau seni osukosuk. Nge, tumunuk pwisin, mi aochuno nupwen sia iotek ren ewe pwara mi namot ne pwaracho ngeni ekkewe osukosuk repwe feito. Tumunuk pwisin a pwan atufichi ngenikich pwe sipwe ennet ngeni ach pwon ne tumunu pwan ekkoch aramas.

Non Fin Anisi, sia kaeo nongonongen me angangen tumunuk pwisin. Fefin mi tongeni kaeo usun isoni mwoni, awesano niwinimang, wisen angang, ekkewe pukfel me ewe kapas allim, aiti ekkoch ne anneani me kaeo, pochokunen inis, atake, föri möngö me isoni möngö, ammonata ren osukosuk, me chommong mettoch repwe anisikich pwe sipwe tongeni tumunukich pwisin.1

Julie B. Beck, presetenin Fin Anisi meinisin, a awewei pwe “ach awora fan itach me pwan ekkoch mi wewengeni pwe kich sia chon kuno noun ewe Samon Jises Kraist. … Nupwen [inen punuei we] a mano non ewe ier, a pwäratä manauan minne a tumunu pwisin. A wor an we taropwen mumutan tempel me pukfel minne a fakkun aea me pwan puken kaeo kapas allim. Sia aimufeseni ekkewe pisekin kukun möngö, me sepi minne a ammonata fite ngerou möngö. A pwan wor mangaku minne a för seni ufoufen nom. A nuku non ewe wokisin ‘Kopwe aea meinisin, are kosap fen angei.’ Sia kuna chommongun möngö a atakeni, ammonata, me isoni. Eu mettoch a fakkun kuu am meinisin noun kewe puk minne a rekotuni meinisin ekkewe mettoch a moni seni chommong ier. Pokiten a manaun, a wor nusun an mwoni a isoni ren fansoun osukosuk, me ese wor an niwinimang! Nge aucheanap, a aiti me kuu manauen chommong aramas ren angangochun minne a kaeo non manauan mi nukuchar.”2

Seni ekkewe Pukfel

John 13:34–35; James 1:27; Mosaia 4:26; Doctrine and Covenants 29:34–35; 38:30; 44:6

Seni Ach Uruo

Fin Anisi ra fiti ewe angangen amanaua aramas non pekin inis me non pekin ngun. Iteitan wik nupwen ewe Mwichen Fin Anisi non Nauvoo ra chufengen, ekkewe fefin ra poraus usun aramas mi osupwang. Niffangen mwoni, pisek, angangoch, me fansoun niffang ngeni ekkewe ir mi osupwang. Ei angangen anisi chon riaffou mi soposopono non chommong tappin aramas ren ekkewe Fin Anisi.

Nupwen ekkewe Souneng mi war me non Salt Lake Valley, Preseten Brigham Young (1801–77) a pesei ngeni ekkewe fefin repwe anisi ekkewe ir mi osupwang me pwan kaeo mettoch epwe anisir ar repwe tumunur pwisin. A apasa, “Kaeo pwe oupwe tumunukemi pwisin; oupwe isoni pinewa mi amas, me oupwe isois ren eu fansoun ese nafoch.”3 Fan emwenien ewe pristut, Fin Anisi a sopweno ne aiti tumunu pwisin, ne tumunuochu ewe famini, me pesepes ngeni pwisin nukuchar me föfförun chen, ewe tong ennet an Kraist.

© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Merika: 6/10. Kapungunon chiakun: 6/10. Chiakun Visiting Teaching Message, June 2011. Chuukese. 09766 901

Esinesin

  1. Nengeni Handbook 2: Administering the Church (2010), 9.4.2.

  2. Julie B. Beck, “The Welfare Responisibilities of the Relief Society President,” Basic Principles of Welfare and Self-Reliance (2009), 6.

  3. Teachings of Presidents of the Church: Brigham Young (1997), 231.

  1. Ifa usun ua tongeni anisi pwii kewe me ar kewe famini ar repwe angangoch ne tumunur pwisin?

  2. Ifa usun ua tongeni aochu ai tumunu pwisin non pekin inis?

Printini