Poraus seni ewe Aewin Presetensi, June 2011
Ewe Efeiochun Eu ne Engon
An Kot popun ne ngenikich annuk ina pwe epwe efeiochukich. A mochen ngenikich manau ese much, ewe efeioch mi napanap nein An kewe efeioch meinisin (nengeni D&C 14.7). Ne angei ewe efeiochun manau ren I tori feinfeino ren ach kewe famini non ewe muun akkar, mi namot pwe sipwe tongeni manaueni ekkewe annuken ena muu (nengeni D&C 88:22).
A ngenikich ekkoch annuk non ei manau ne anisikich ne awatteno ena tufich. Ewe annuken eu ne engon mi eu annuken ammonata. Ewe annuk ina pwe sipwe ngeni ewe Samon eu ne engonun meinisin ach fefeita. Mi chok mecheres minne emon semerit mi tongeni weweiti. Ua kuna semirit mi ngeni ewe pisop echo futo mi masou ngeni eu ne engonun nour kewe foun moni ra angei.
Eu me nein ekkewe efeioch mi feito seni ach monatiw unusen eu ne engon ina pwe sipwe angei ewe nuku ne manaueni eu annuk mi napanap seni. Ne nonnom non ewe muun akkar, mi namot pwe sipwe manaueni ewe annuken epinano meinisin. Ikkewe mi namot pwe sipwe mefi pwe meinisin kich me pwan meinisin ach kewe tufich mi wesewesen noun Kot.
Mi wor unungat an minne ach monatiw unusen eu ne engon non ei manau mi tongeni ammonakicheta ne mefi met mi namot pwe sipwe mefi ne angei ewe niffangen manau ese much.
Akkomwan, nupwen sia monatiw ach eu ne engon ngeni ewe Mwichefen, Semach won Nang a ninau efeioch woch. Ika mi wor emon mi momonatiw an we eu ne engon iteitan a sinei pwe mi ennet. Ekkewe efeioch mi fis non pekin ngun fan ekkoch me non pekin inis fan ekkoch. Sia angei won nongonongen an ewe Samon fansoun me won nongonongen met A sinei mi och fan itach.
Nupwen ekkena efeioch mi feito, ach nuku mi watteno pwe Kot mi ewe popunapen mettoch meinisin mi och non manauach. Mi mecheres ne kuna pwe ach epinano meinisin mi chok esinna ennetin pwe meinisin an Kot foffor mi noun. A atufichi ngenikich ne mefi kinisou pwe A chok tingorei eu ne engonun met A fen ngenikich. Iwe sia ammonata ne manaueni ewe annuken epinano mettoch meinisin nupwen a tingorei kich.
Oruwan, meinisin kich mi monatiw ach eu ne engon iteitan mi mefi kinamwe watte ne tingorei Kot ren met mi namot fan itach me ach kewe famini. A pwon ngenikich efeioch nap seni met sia tongeni angei nupwen sia nukuchareno non ach pwon ne monatiw ach eu ne engon (nengeni Malachi 3:10). Iwe eu nein ekkewe efeiochun eu ne engon mi nap ina pwe sia tongeni nuku non mwirimwirin fansoun mwach. Met chok nonnomuch, mettoch meinisin epwe fisioch ren met mi fich ngenikich. Nupwen sia ennet ngeni ach kewe pwon, epwe pwan ennet ngeni An kewe pwon. Eu memefin kinamwe ina eu nein ekkewe efeioch mi napanap an ach sipwe monatiw unusen eu ne engon. Ekkewe ir mi anneasochisi ewe annuken eu ne engon mi tongeni pwarata pwe ewe efeiochun kinamwe mi ennet me auchea.
Aunungatin, ekkewe ir mi monatiw ar eu ne engon mi mefi wattenon ar tong ngeni Kot me meinisin noun Kot kewe semirit. Ena awattenon tong mi feito seni ach weweiti ifa usun ewe Sam mi aea ekkewe moni seni eu ne engon ne efeiochu aramas non ei fonufan me ren fansoun ese much.
Seni Noun kewe chon angang, A aeaochu ekkewe asoren eu ne engon. Ewe chon asoren eu ne engon a anisi ewe Samon ne kouta imwenipin, minne famini mi tongeni ririfengen tori feinfeino chok. Ewe chon asoren eu ne engon a anisi I ne tinano ewe kapas allim ngeni aramas ekkis meinisin. Ewe chon asoren eu ne engon a anisi I ne awesano echik me riaffou non pwisin napanapan seni Noun kewe chon angang. Ekkewe chon angang repwe erenuk ifa usun tong mi watteno fan iten asoren eu ne engon mi aea ne efeiochu aramas. Iwe a ina usun ren ewe chon asoren eu ne engon mi nukuchar.
Pwaratan mon eu ne engon mi ekkoch maram mwach. Ua iotek pwe en me om kewe famini epwe poputa iei ne kokkot me ammonata ne angei ekkewe efeioch minne Kot a ninau won ekkewe ir mi tongeni pwarata ngeni I pwe ra monatiw unusen ar asoren eu ne engon.
© 2011 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/10. Kapungunon chiakun: 6/10. Chiakun ewe First Presidency Message, June 2011. Chuukese. 09766 901
Afanafan seni Ei Poraus
-
Fan ekkoch ewe napanap mi och ne afanafana eu nongonong ina ne pwisin awewe (nengeni Teaching, No Greater Call [1999], 164). Kopwe ekiekin tingorei emon chon famini ne pwarata met wewen eu ne engon. A tongeni pwarata wewen me ren an isoni eu mettoch seni eu mwichen 10. Ne osupwano, kopwe ekiekin tingorei emon chon famini ne pwarata ifa usun ne amasoua echo taropwen asoren eu ne engon.
-
“Ekkewe ir ka aiti repwe efeioch seni meinisin ar repwe fiti” (Teaching, No Greater Call, 63). Kopwe tingorei chon famini ne aporausa met ra nuku Preseten Eyring a wewen me ren an kapasen “mefi met mi namot pwe sipwe mefi ne angei ewe niffangen manau ese much.” Kopwe ekiekin poraus usun ekkewe unungat an minne ach monatiw ach asoren eu ne engon mi ammonakicheta ne mefi met mi namot pwe sipwe mefi ne angei an Kot kewe efeioch.