Agtutubo
Amin a Maitedko
Maburiboranak no kasano a mabayadak dagiti banag a kayatko nga aramiden iti umay a kalgaw: panagklase, workshop, panagkamping iti kalgaw, ken dadduma pay. Panagkunak a makasangitak. Kalpasanna nalagipko dagiti amin a banag a naisuro kaniak maipapan iti kaadda ti panagtalek ken pammati iti Apo. Inkeddengko nga italek ti kasasaad kadagiti ima ti Apo ket agtalekak a no daytoy ti pagayatanna, mangipaay Isuna itimaysa a wagas.
Saan a nabayag kalpasan dayta, nabirokan ti nanangko ti di pay naipasukat a tseke manipud iti immuna a nagtrabahuak idi iti dayta a tawen, ket iti sumaruno nga aldaw naaddaanak iti bassit a premio a kuarta nga impatulod ti koreo iti panangabakko iti maikadua a gunggona iti maysa a salip. Maysa a dakkel a pammaneknek daytoy para kaniak a sibibiag ti Dios, nga ay-ayaten ken ipatpategnak ken mangipaayto kadagiti kasapulak.
Napnuanak unay iti panagyaman ken panagayat para iti Nailangitan nga Amak ken ti Mangisalakan. Nariknak a kasla makasangitak! Inil-iliwko nga ipakita no kasano ti panagyamanko, ti panagdaydayawko iti Dios agingga a kabaelak, ken mangiburay iti dayta a rikna. Inaramiden dagiti sabali daytoy babaen iti panagsuratda iti kanta, panagsurat iti daniw, wenno panangipinta iti ladawan, ngem nariknak a diak kabaelan nga aramiden ti ania man kadagita a banag. Napanunotko a ti laeng banag a maitedko nga umdasto a pangdaydayaw ket ti biagko—agbalin nga “ulidan dagiti namati” (1 Timoteo 4:12), a mangted iti biagko ken ni Cristo. Dayta laeng ti dawdawatenna, ket dayta laeng ti maitedko.