Mensahe ti Umuna a Panguluen, Hulio 2011
Kabsat, Sikukumitak
Dua nga agkabsat a lallaki ti nagtakder iti tuktok ti bassit a rangkis a tumannawag iti nasin-aw a danum iti maysa nga asul a dan-aw. Daytoy ket nalatak a disso a paglalangoyan, ket masansan nga agsarita dagiti agkabsat maipapan iti panagtapuak—maysa a banag a nakitkitadan nga ar-aramiden dagiti dadduma.
Nupay kayatda nga agpada ti tumapuak, awan kadakuada ti mayat nga umuna. Saan unay a nangato ti rangkis, ngem para kadagiti dua nga agtutubo a lallaki, kasla ngumatngato daytoy idi rugianda ti agpasango—ket alisto nga immawan ti kinaturedda.
Kamaudiananna, maysa kadagiti agkabsat ti nangipan iti sakana iti igid ti rangkis ket naggaraw a nagpasango. Iti dayta a kanito inyarasaas ti kabsatna, “Panagkunak agurayta laengen agingga iti sumaruno a kalgaw.”
Nupay kasta, ti panagtignay ti in-inauna ket mangguyguyoden kenkuana nga agpasango. “Kabsat,” insungbatna, “sikukumitak!”
Nagsuek iti danum ket limmung-aw a dagus a nangipukkaw iti balligi. Simmaruno a dagus ti maikadua a kabsat. Kalpasanna, agpadada a nagkatawa maipanggep kadagiti maudi a balikas ti in-inauna a lalaki sakbay a timmapog iti danum. “Kabsat, sikukumitak.”
Ti panagkumit ket kasla ibabatok iti danum. Sikukumitka man wenno saan. Agpasangoka man wenno nakatakderka laeng. Awan ti apagkagudua. Maipasangotayo amin iti kanito a panangeddeng a mangbalbaliw iti nabati pay a panagbiagtayo. Kas miembro ti Simbaan, nasken a saludsodentayo ti bagbagitayo, “Bumatokak kadi wenno agtakderak laeng iti igid? Agpasangoak kadi wenno riknaek laeng ti temperatura ti danum kadagiti ramay ti sakak?”
Sumagmamano a basol ti maaramid gapu ta agaramidtayo iti dakes; maaramid dagiti dadduma pay a basol gapu ta awan ti ar-aramidentayo. Ti panangisina iti panagkumit iti ebanghelio ket mangiturong iti pannakaupay, kinaliday, ken basol. Saan a nasken a mayaplikar daytoy kadatayo gapu ta tattaotayo iti katulagan. Agaramidtayo kadagiti katulagan iti Apo no mabuniagantayo ken no sumrektayo iti balay ti Apo. Agaramid dagiti lallaki kadagiti katulagan iti Apo no maordenanda iti priesthood. Awan ti napatpateg pay ngem ti panagtungpal iti panagkumit nga inaramidtayo iti Apo. Laglagipentayo ti sungbat da Raquel ken Lea ken ni Jacob iti Daan a Tulag. Simple laeng daytoy ken napudno ken nangipakita iti panagkumitda: “Aramidem ti uray ania a sinao ti Dios kenka” (Genesis 31:16).
Dagidiay a kita laeng ti sikukumit ket makanamnama laeng iti kita ti maawat a bendision ti pammaneknek, rag-o, ken talna. Dagiti tawa ti langit ket mabalin a kita laeng ti silulukat kadakuada.Di kadi kinamaag ti mangpanunot, “Ikumitko ti bagiki iti 50 a porsiento ita, ngem no agparang ni Cristo iti Maikadua a Yaay, ikumitko ti bagik iti 100 a porsiento”?
Ti panagkumit kadagiti katulagantayo iti Apo ket bunga ti pannakapasurottayo. Ti panagkumittayo iti Mangisalakantayo ken iti Simbaanna ket mangparnuay iti kinataotayo ken mangpapigsa iti espiritutayo a no makitatayo ni Cristo, arakupennatayo ket kunaenna, “Naimbag, adipen a nalaing ken mapagtalkan” (Mateo 25:21).
Adda pagdumaan iti nagbaetan ti panggep ken aramid. Dagidiay agpanggep laeng nga agkumit ket mabalinda ti agsapul kadagiti panagpambar iti tunggal batang. Dagidiay napudno nga agkumit ket maipasangoda kadagiti pannubokda a siaannatup ket sawenda iti bagbagida, “Wen, agbalinto dayta a nasayaat a rason ti panangitantan, ngem nakitulagak, ket ngarud aramidek no ania ti inkumitko nga aramiden.” Sukisokenda dagiti nasantuan a kasuratan ken sipapasnekda nga agkalikagum iti pannarabay ti Amada iti Langit. Awaten ken ipatungpalda a nasaayat dagiti takemda iti Simbaan. Dumar-ayda kadagiti mitingda. Aramidenda dagiti panangisuro iti pagtaengan wenno isasarungkar a panangisuroda.
Kuna ti pagsasao nga Aleman, “Dagiti kari ket mayarig iti bulan a kabus. No saanda a matungpal a dagus, bumasbassit dagitoy iti inaldaw.” Kas miembro ti Simbaan ni Jesucristo dagiti Santo iti Ud-udina nga Aldaw, nagkumittayo a magna iti dalan ti kinadisipulo. Nagkumittayo a sumurot iti pagwadan ti Mangisalakantayo. Panunoten no kasano a mabendisionan ken agbalbaliwto ti lubong para iti nasayaat no agbibiag ti amin a miembro ti Simbaan ti Apo iti pudno a potensialda—nagbalbaliwda iti kaunggan ti kararuada ken nagkumitda iti panangbangon iti pagarian ti Dios.
Iti maysa a wagas, makaikeddeng ti tunggal maysa kadatayo a tumantan-aw iti danum.Ikararagko a sapay koma ta maaddaantayo iti pammati, agtignay nga agpasango, sanguen dagiti butengtayo ken panagduadua nga addaan tured, ken kunaentayo iti bagbagitayo ti, “Sikukumitak!”
© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti First Presidency Message, July 2011. Ilokano. 09767 864
Panangisuro manipud iti Daytoy a Mensahe
“Maysa a wagas tapno matulongan dagiti agsursuro a maawatanda dagiti pagbatayan ti ebanghelio ket pagdrowingen ida kadagiti ladawan. Ti panagdrowing ket mangpalugod kadakuada nga agsukisok ket mangyebkas iti pannakaawat ken panagriknada maipapan kadagiti estoria ken pagbatayan ti ebanghelio” (Teaching, No Greater Call [1999], 166). Ibilang ti panangbasa iti artikulo, nga ilawlawag ti pagbatayan ti panagkumit iti ebanghelio, ket kalpasanna kiddawen kadagiti agtarigagay a mangaramid met iti kasta a mangidrowing iti ladawan ti aktibidad iti ebanghelio a mangipakita iti panagkumit. Mabalin a kasapulan dagiti ub-ubing nga annak dagiti singasing maipanggep iti no ania ti idrowing.