Mensahe iti Visiting Teaching, Hulio 2011

Umaykayo iti Templo ket Kiddawenyo dagiti Bendisionyo

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati • Pamilia • Tulong

Kakabsat, naparaburantayo iti kasta unay. Agtaktakder ti Mangisalakan iti ulo daytoy a Simbaan. Idadauluandatayo dagiti sibibiag a propeta. Addaantayo kadagiti nasantuan a kasuratan. Ken addaantayo kadagiti nasantuan a templo iti intero a lubong a pakaawatantayo kadagiti ordinansa a kasapulan tapno makatulong kadatayo a makasubli iti Nailangitan nga Amatayo.

Mapantayo nga umuna iti templo para iti bagbagitayo. “Ti kangrunaan a panggep ti templo,” inlawlawag ni Elder Robert D. Hales iti Korum dagiti Sangapulo-ket-dua nga Apostol, “ket tapno mangipaay kadagiti ordinansa a kasapulan para iti pannakaitan-oktayo iti celestial a pagarian. Iwanwannatayo dagiti ordinansa ti templo nga agturong iti Mangisalakantayo ken mangted kadatayo kadagiti bendision a sumangbay kadatayo babaen ti Pannubbot ni Jesucristo. Dagiti templo ti kaindaklan nga unibersidad ti panagsursuro a naam-ammo ti tao, mangted kadatayo iti pannakaammo ken sirib maipapan iti Pannakaparsua ti lubong. Dagiti panangiturong iti endowment ket mangted pangiwanwan no kasano ti nasken a panangiturongtayo iti biagtayo ditoy a panagbiag iti daga wenno mortalidad. … Naglaon ti ordinansa iti napagsasaganad a pangiturong maipapan iti no kasano ti nasken a panagbiagtayo ken dagiti katulagan nga aramidentayo tapno agbiag a sililinteg babaen iti panangsurot iti Mangisalakan.”¹

Ngem ti panagserbitayo iti templo ket saan nga aggibus ditoy. Insuro ni Presidente Boyd K. Packer, Presidente ti Korum dagiti Sangapulo-ket-dua nga Apostol: “Kas agak-akem (proxy) a mangisaup para iti maysa a tao a pimmusayen, naamirisyo koman iti bukodyo dagiti katulagan nga inaramidyon. Napapigsayon iti panunotyo dagiti naindaklan ken naespirituan a bendision nga adda pakainaiganna iti balay ti Apo. … Kadagiti katulagan ken ordinansa ket maisentro dagiti bendision a mabalinyo a kiddawen iti nasantuan a templo.”²

Umaykayo iti templo ket kalpasanna umaykayo manen. Ti panagaramid ken panagtungpal kadagiti katulagan ti templo ket mamagtalinaedto kadatayo iti dalan nga agturong kadagiti kaindaklanan ti amin a bendision—ti agnanayon a biag.

Barbara Thompson, maikadua mammagbaga iti Relief Society general presidency.

Manipud kadagiti Nasantuan a Kasuratan

Isaias 2:3; 1 Taga-Corinto 11:11; Apocalipsis 7:13–15; Doktrina ken Katulagan 109

Manipud iti Pakasaritaantayo

Masansan a nagsarita ni Propeta Joseph Smith kadagiti kakabsat iti Relief Society kadagiti mitingda. Iti pannakaipatakder ti Templo ti Nauvoo, insuro ti Propeta dagiti kabsat a babbai babaen iti doktrina, a mangisagana kadakuada nga umawat iti ad-adu pay a pannakaammo babaen kadagiti ordinansa ti templo. Idi 1842 kinunana ken ni Mercy Fielding Thompson a ti endowment ket “mangiruarto kadakayo iti kinasipnget nga agturong iti nakakaskasdaaw a lawag.”³

Mapattapatta a 6,000 a Santo kadagiti Ud-udina nga Aldaw ti immawat kadagiti ordinansa ti templo sakbay ti ipapanaw manipud iti Nauvoo. Ni Presidente Brigham Young (1801–77) kinunana, “Kasta la unay ti panaggagar nga impakita dagiti santo nga umawat kadagiti ordinansa [ti templo], ken kasta met ti panaggagar iti pagrebbenganmi a mangannong kadakuada, ta intedko ti sibubukel a bagik iti aramid ti Apo iti Templo iti tunggal rabii ken aldaw, a saanak a maturog iti nasursurok ngem uppat nga oras, kaaduanna, inaldaw, ken agawidak maminsan laeng iti makalawas.”⁴ Ti pigsa ken bileg dagiti katulagan iti templo ket nangpatibker kadagiti Santo bayat ti panangpanawda iti siudad ken temploda para iti panagdaliasat iti saan nga am-ammo a papanan.

© 2011 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/10. Pannakaanamongna a maipatarus: 6/10. Pannakaipatarus ti Visiting Teaching Message, July 2011. Ilokano. 09767 864

Ania ti Maaramidko?

Ania a padas ti ibinglayko tapno mapapigsa dagiti sarungkarak iti panagkalikagumda a “mapan iti templo”?
Kasano a personal a makiddawko dagiti bendision ti templo?