iTabagone
Na Veika Kece au Rawa ni Solia
Au a vakamacalataka tiko na sala meu sauma rawa kina na veika meu na cakava ena vula ikatakata: kalasi, vuli ni veituberi, keba ni vula ikatakata, kei na so tale. Sa voleka sara ga meu tagi. Au sa qai nanuma na veika kece me baleta na nuitaka ka vakabauta tiko na Turaga. Au sa qai biuta na veika kece oqo ki na liga ni Turaga ka nuitaka tiko ni ke sa na yaco na Nona lewa, ena vakarautaka o Koya e dua na sala.
Ni oti toka ga vakalailai, a kunea o tinaqu e dua na jeke ni noqu cakacaka ena itekivu ni yabaki o ya, ka yaco mai ena meli ena siga e tarava e dua na ilavo ka noqu icocovi ni ikarua ena dua na veisisivi. Oqo e dua na noqu ivakadinadina cecere ni sa bula tiko na Kalou, ni sa lomani au ka karoni au ka sa dau veivakarautaki.
Sa dua na ka na noqu vakavinavinaka ka lomana na Tamaqu Vakalomalagi kei na iVakabula. Sa voleka ga niu kacabote! Au sa gadreva dina meu vakaraitaka na noqu vakavinavinaka, meu vakalagilagia na Kalou ena kena vinaka duadua, ka meu wasea yani na kila oqo. Eso era cakava oqo ena nodra buli sere, vola e dua na serekali, se droini, ia e dredre vei au meu cakava oqori. Au sa qai kila ni ka duadua ga au na solia rawa me veiraurau kei na veivakalagilagi oqo o ya na noqu bula—meu “nodra ivakarau era sa vakabauta” (1 Timoci 4:12), meu solia na noqu bula vei Karisito. Sa i koya ga oqori na ka e kerea tiko o Koya, ka sa ikoya talega na ka au rawa ni solia.