iVaqa ni Veisiko, Julai 2011
Lako Mai ki na Valetabu mo Mai Taura na Nomu Kalougata
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
Kemuni na marama, eda sa kalougata dina. Sa iliuliu ni Lotu oqo na iVakabula. Era sa liutaki keda tiko na parofita bula. Sa tu vei keda na ivolanikalou vakalou. Era sa tu e vuravura taucoko e vuqa na valetabu vakalou meda na vakayacora kina na cakacaka vakalotu e gadrevi meda lesu rawa kina vua na Tamada Vakalomalagi.
Eda na gole ena imatai ni gauna ki na valetabu baleti keda ga. “Na inaki taumada ni valetabu,” me vaka e vakamacalataka o Elder Robert D. Hales ena Kuoramu ni iApositolo Le Tinikarua, “me vakarautaka na cakacaka vakalotu e gadrevi meda laki bula vakacerecerei kina ena matanitu vakasilesitieli. Na cakacaka vakalotu ni valetabu e dusimaki keda kivua na noda iVakabula ka solia vei keda na veivakalougataki e lako mai vei keda ena Veisorovaki i Jisu Karisito. Na Valetabu sa vanua cecere duadua ni vuli e kila na tamata, e solia vei keda na kila ka kei na vuku me baleta na Buli ni vuravura. Na ivakaro ni edaumeni e veidusimaki ena dodonu ni kena liutaki vakacava noda bula ena vuravura oqo. Na cakacaka vakalotu oqo e okati kina eso na idusidusi ena sala ka dodonu meda bulataka kina ena savasava na veiyalayalati eda cakava ena noda vakamuria na noda iVakabula.”1
Ia e sega ni yala ekeri na noda veiqaravi ni valetabu. E vakavulica o Peresitedi Boyd K. Packer, na Peresitedi ni Kuoramu ni iApositolo Le Tinikarua ni: “Nomu sosomitaka e dua sa gole ki na taudaku ni ilati, ko sa na raicalesu oti tiko na veiyalayalati ko sa vakayacora mai. Ko sa na vakasamataka tiko vakatitobu na veivakalougatataki cecere e semati tiko ena vale ni Turaga. … Sa vakatikori tiko ena veiyalayalati kei na cakacaka vakalotu na veivakalougatataki me nomu ena loma ni valetabu.”2
Dau lako wasoma kina valetabu. Na noda vakayacora ka maroroya tiko na noda veiyalayalati ni valetabu ena muataki keda donu tiko ki na veivakalougatataki e cecere duadua—na bula tawamudu.
Barbara Thompson, ikarua ni daunivakasala ena mataveiliutaki raraba ni iSoqosoqo ni Veivukei.
Mai na iVolanikalou
Aisea 2:3; 1 Korinica 11:11; Ai Vakatakila 7:13–15; Vunau kei na Veiyalayalati 109
Mai na Keda iTukutuku Makawa
E vakavuqa na nona dau vosa o Josefa na Parofita ena nodra soqoni na marama ni iSoqosoqo ni Veivukei. Ni tara tiko na Valetabu e Nauvoo, a vunau na Parofita vei ira na marama, me ra vakarautaki me ra na vakavukui vakalevu ena cakacaka vakalotu ni valetabu. Ena 1842 a kaya vei Mercy Fielding Thompson ni edaumeni “ena kauti iko tani mai na butobuto ki na rarama uasivi.”3
Era a ciqoma na nodra cakacaka vakalotu ni valetabu e volekata ni 6,000 na Yalododonu Edaidai ni bera na biu vanua mai Nauvoo. A kaya o Perestedi Brigham Young (1801–77), “E vaka tu oqori na veivakauqeti ka vakavatukanataki vei ira na Yalododonu me ra vakayacora na nodra cakacaka vakalotu [ni valetabu], me vaka keitou sa vakauqeti vakakina, me keitou veiqaravi ena vukudra; ka meu sa qarava vakatabakidua ga na cakacaka ni Turaga ena Valetabu ena bogi kei na siga, ka meu dau moce vakalekaleka me lailai mai na va na auwa e veisiga, ka qai dau yaco rawa ga vakadua e vale ena veimacawa.”4 Era a vakatudeitaki na Yalododonu mai na qaqaco kei na kaukauwa ni veiyalayalati ni valetabu ni ra biuta mai na nodra korolevu kei na valetabu ki na vanua e tawa kilai.
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa ni Visiting Teaching Message, July 2011. Fijian. 09767 858