Cov Hluas
Txhua Yam Uas Kuv Pub Tau
Kuv txhawj heev vim kuv tsis paub tias kuv yuav ua li cas thiaj them tau tej nqi rau tej yam uas kuv xav ua thaum lub caij ntug sov: tej hoob kawm, hoob kawm ua hauj lwm, kev ua si thaum lub caij ntug sov, thiab lwm yam. Kuv xav tias kuv yuav quaj xwb. Ces kuv txawm nco qab txog txhua lub sij hawm uas kuv tau kawm txog txoj kev tso siab plhuav thiab ntseeg tus Tswv. Kuv tau txiav txim siab cia li tso rau hauv tus Tswv txhais tes thiab cia siab tias yog tias mus ua tej no yeej yog raws li Nws lub siab nyiam ces, Nws yeej yuav npaj txoj hau kev.
Tsis ntev tom qab ntawd, kuv niam nrhiav tau ib daim tshev los ntawm txoj hauj lwm uas tsis tau muab pauv uas kuv tau ua xyoo ntawd, thiab hnub tom qab ntawd kuv tau txais me nyiaj vim kuv tau sib xeem thiab tau yeej qhov thib ob. Nov yog ib qho tim khawv rau kuv tias Vajtswv yeej muaj sia nyob, thiab tias Nws hlub thiab saib xyuas kuv thiab yeej yuav pab kuv.
Kuv muaj kev ris txiaj rau kuv Leej Txiv Saum Ntuj Ceeb Tsheej thiab tus Cawm Seej puv npo kuv lub siab. Cuag li kuv lub siab yuav tawg nrhe! Kuv tau xav qhia kuv txoj kev ris txiaj ntawd, xav qhuas Vajtswv zoo npaum li kuv qhuas tau, thiab qhia lwm tus neeg txog kuv tej kev xav ntawd. Lwm tus neeg tau ua tib yam li ntawd thaum lawv sau ib zaj nkauj, sau ib zaj paj huam, los sis kos ib daim duab, tiam sis kuv tsis txawj ua tej yam zoo li ntawd. Kuv txawm paub tias tib yam uas kuv ua tau thiaj qhuas tau Nws yog kom kuv ua neej nyob—yuav tsum “ua koj lub neej rau cov ntseeg xyaum” (1 Timautes 4:12), muab kuv txoj sia rau Khetos. Nws tsuas thov kom peb ua li ntawd, thiab qhov ntawd yog tib yam uas kuv txawj ua xwb.