2011
Los Rau hauv lub Tuam Tsev thiab Txais Yuav Koj cov Koob Hmoov
July 2011

Cov Mus Xyuas tom Tsev tsab Xov, Xya Hli Ntuj 2011

Los Rau hauv lub Tuam Tsev thiab Txais Yuav Koj cov Koob Hmoov

Cia li kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg • Tsev Neeg • Kev Pab

Cov viv ncaus es, peb muaj hmoov kawg. Tus Cawm Seej sawv ua tus thawj coj rau lub Koom Txoos no. Peb muaj cov yaj saub uas muaj sia nyob uas coj peb txoj hau kev. Peb muaj cov vaj lug kub uas dawb ceev. Thiab peb muaj ntau lub tuam tsev dawb ceev thoob plaws ntiaj teb no uas peb mus tau rau hauv thiaj txais tej kab ke uas yuav pab peb rov qab mus nrog peb Leej Txiv Saum Ntuj Ceeb Tsheej nyob ua ke.

Peb xub mus hauv lub tuam tsev rau peb tus kheej. Txwj Laug Robert D. Hales ntawm Pawg Kaum Ob tug Thwj Tim piav hais tias “Lub ntsiab tseem ceeb tshaj plaws hauv lub tuam tsev yog kom muab tej kab ke uas yuav tsa peb nto rau hauv lub nceeg vaj xilethi-aus. Cov kab ke hauv lub tuam tsev coj peb mus ntsib peb tus Cawm Seej thiab cia peb txais tej koob hmoov uas los rau peb vim muaj Yexus Khetos txoj Kev Theej Txhoj. Cov tuam tsev yog lub tsev kawm ntawv qib siab zoo tshaj plaws uas tib neeg muaj, cov no qhia peb txog thiab ua rau peb muaj tswv yim to taub tias ua li cas thiaj tau Tsim lub ntiaj teb. Tej lus qhia hauv lub vaj txiaj ntsim qhia peb seb peb yuav tsum ua neej nyob li cas hauv ntiaj teb no. … Txoj kab ke no muaj tej lus qhia seb peb yuav tsum ua neeg zoo li cas thiab txog tej kev khi lus uas peb khi tseg kom ua neeg ncaj ncees thiab raws peb tus Cawm Seej qab.”1

Tiam sis peb tej hauj lwm hauv lub tuam tsev yeej tsis tas rau qhov ntawd xwb. Thawj Tswj Hwm Boyd K. Packer, Tus Thawj Tswj Hwm rau Pawg Kaum Ob tug Thwj Tim, qhia tias: “Ua tus neeg sawv cev rau lwm tus neeg uas tau tso lub neej no tseg lawm, koj yuav rov qab tshab xyuas tej kev khi lus uas koj tau khi tseg lawm. Koj yuav rov qab xav txog tej koob hmoov zoo kawg ntawm sab ntsuj plig uas yus txais tau hauv tus Tswv lub tsev. … Nyob hauv tej kev khi lus thiab kab ke no yus yuav txais tej koob hmoov uas los rau yus hauv lub tuam tsev dawb huv.”2

Cia li los rau hauv lub tuam tsev ces rov qab tuaj thiab. Txoj kev ua thiab ceev tej kev khi lus ntawm tuam tsev yuav pab peb nyob raws nraim rau hauv txoj kev uas coj peb mus txais yuav txoj koob hmoov zoo tshaj plaws uas yog—txoj sia nyob mus ib txhis.

Barbara Thompson, tus pab cuam thib ob hauv lub Koom Haum Niam Tsev tuam pawg thawj tswj hwm.

Los ntawm cov Vaj Lug Kub

Yaxayas 2:3; 1 Kaulithaus 11:11; Tshwm Sim 7:13–15; Doctrine and Covenants 109

Los ntawm Peb zaj Keeb Kwm

Tus Yaj Saub Yauxej Xamiv hais lus ntau zaus rau cov muam hauv lub Koom Haum Niam Tsev hauv lawv tej kev sib ntsib. Thaum tab tom ua lub Tuam Tsev hauv Nauvoo, tus Yaj Saub qhia cov muam txog tej lus qhuab qhia, pab npaj lawv txais yuav tswv yim ntxiv uas yuav los dhau ntawm lub tuam tsev tej kab ke. Hauv xyoo 1842 nws hais rau Mercy Fielding Thompson tias lub vaj txiaj ntsim “yuav coj koj tawm ntawm qhov tsaus ntuj nti los nyob hauv qhov kaj uas ci ntsa iab.”3

Ze li 6,000 tus neeg ntawm ib Tsoom Haiv Neeg Ntseeg tau txais tej kab ke hauv lub tuam tsev uas ntej lawv khiav dim lub nroog Nauvoo. Thawj Tswj Hwm Brigham Young (1801–77) hais tias, “Ib tsoom haiv neeg ntseeg tau muaj kev txhawj xeeb heev vim lawv xav tau tej kab ke [hauv lub tuam tsev], thiab peb los txhawj thiab vim peb xav muab tej no rau lawv, ces kuv thiaj tau ua hauj lwm nruab hnub nruab hmo hauv tus Tswv lub Tuam Tsev, ib hnub twg yeej tsis tsaug zog ntev tshaj plaub xuab moos, thiab feem ntau tsuas mus tsev ib zaug tauj ib lim piam.”4 Lub tuam tsev tej kab ke tau ntxiv dag ntxiv zog thiab hwj chim rau ib Tsoom Haiv Neeg Ntseeg thaum uas lawv khiav ntawm lawv lub nroog thiab lub tuam tsev mus nyob hauv ib qho chaw npaj nauj.

© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais Visiting Teaching Message, July 2011. Hmong. 09767 295

Lus Cim

  1. Robert D. Hales, “Blessings of the Temple,” Liahona, Kaum Hlis Ntuj 2009, 14.

  2. Boyd K. Packer, Lub Tuam Tsev Dawb Huv (1980), 170, 171.

  3. Teachings of Presidents of the Church: Joseph Smith (2007), 414.

  4. Teachings of Presidents of the Church: Brigham Young (1997), 299.

Kuv Yuav Pab Li Cas?

  1. Kuv yuav qhia li cas rau cov uas kuv mus xyuas uas yuav pab kom lawv muaj lub siab xav “los rau hauv lub tuam tsev”?

  2. Kuv yuav ua li cas thiaj txais yuav tau cov koob hmoov hauv lub tuam tsev?

Luam