Mensahe sa Visiting Teaching, Hulyo 2011

Kari sa Templo kag Batona ang Inyo mga Bugay

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Pagtuo • Panimalay • Bulig

Mga sister, ginabugayan kita sing tuman. Ang Manluluwas nagatindog sa uluhan sining Simbahan. Ginagiyahan kita sing buhi nga mga propeta. May yara kita sing balaan nga mga kasulatan. Kag may yara kita sing madamo nga balaan nga mga templo sa bug-os nga kalibutan sa diin sarang kita makabaton sang mga ordinansa nga kinahanglanon sa pagbulig sa aton nga makabalik sa aton Langitnon nga Amay.

Nagakadto kita una sa templo para sa aton mga kaugalingon. “Ang pinakamayor nga katuyuan sang templo,” paathag ni Elder Robert D. Hales sang Korum sang Napulo’g Duha ka mga Apostoles, “amo ang pagpatigayon sang mga ordinansa nga kinahanglanon para sa aton pang-kahitaasan sa selestiyal nga ginharian. Ang mga ordinansa sang templo nagagiya sa aton padulong sa aton Manluluwas kag nagahatag sa aton sang mga bugay nga nagaabot sa aton paagi sa Pagpasag-uli [Atonement] ni Jesucristo. Nakilal-an ang mga templo nga bilang mga dalagko nga mga unibersidad sang pagtuon, nga nagahatag sa aton sang ihibalo kag kaalam parte sa Pagtuga sang kalibutan. Ang mga panulin sa endowment nagahatag sang paggiya parte sa kon paano kita dapat maggawi diri sa mortalidad. … Ang ordinansa nagalakip sang nagapasunod nga mga panulin kon paano kita dapat magkabuhi kag sa mga kasugtanan nga aton ginahimo sa pagkabuhi sing matarong paagi sa pagsunod sa aton Manluluwas.”¹

Apang ang aton pag-alagad sa templo wala nagatapos dira. Si Pangulong Boyd K. Packer, Pangulo sang Korum sang Napulo’g Duha ka mga Apostoles, nagtudlo: “Sa paghikot bilang tal-os para sa isa ka tawo nga napatay na, narepaso mo na ngadaan ang mga kasugtanan nga imo nahimo. Napabakod mo na sa imo hunahuna ang dako nga espirituhanon nga mga bugay nga may kalabtanan sa balay sang Ginuo. … Sa mga kasugtanan kag mga ordinansa nakasentro ang mga bugay nga mahimo mo batonon sa templo.”²

Kari sa templo kag magbalik liwat. Ang paghimo kag pagtipig sang mga kasugtanan sang templo magapatayuyon sa aton sa alagyan padulong sa pinakadako sa tanan nga mga bugay—kabuhi nga wala’y katapusan.

Barbara Thompson, ikaduhang manuglaygay sa pangkabilugan nga panguluhan sang Relief Society.

Gikan sa Balaan nga mga Kasulatan

Isaias 2:3; 1 Mga Taga-Corinto 11:11; Bugna 7:13–15; Doctrine and Covenants 109

Gikan sa Aton Kasaysayan

Ang propetang si Joseph Smith masami nga nagapamulong-pulong sa mga sister sang Relief Society sa ila mga miting. Sang ginapasad pa ang templo sa Nauvoo, ang Propeta nagpanulin sa mga sister sang doktrina, nga ginahanda sila sa pagbaton sing dugang nga ihibalo paagi sa mga ordinansa sang templo. Sang 1842 nagsiling sia kay Mercy Fielding Thompson nga ang endowment “magadala sa imo gikan sa kadulom padulong sa makahalangyag nga kasanag.”³

Ginabulobanta nga mga 6,000 ka mga Santos sa Ulihing mga Adlaw ang nagbaton sang mga ordinansa sang templo antes sang pagpanglakaton gikan sa Nauvoo. Si Pangulong Brigham Young (1801–77) nagsiling, “Subong sina ang pagkalangkag nga ginpakita sang mga santos agud makabaton sang mga ordinansa [sang templo], kag ang subong nga kalangkag sa amon bahin agud hikuton ini sa ila, nga lubos ko nga ginhatag ang akon kaugalingon para sa buluhaton sang Ginuo sa Templo gab-i kag adlaw, nga wala nagasobra sa apat ka oras ang tulog, sa kinaandan, sa tagsa ka adlaw, kag nagapauli sa balay kis-a sa isa ka semana.”⁴ Ang kusog kag gahum sang mga kasugtanan sang templo nagpabakod sa mga Santos sa ila pagbiya sang ila banwa kag templo para sa pagpanglakaton padulong sa wala mahibaloan.

© 2011 iya sang Intellectual Reserve, Inc. Tanan nga mga kinamatarong ginahuptan. Ginbalhag sa USA. Petsa sang pagtugot sa Ingles: 6/10. Petsa sang pagtugot sa paglubad: 6/10. Paglubad sang Visiting Teaching Message, July 2011. Hiligaynon. 09767 861

Ano ang Sarang Ko Mahimo?

Ano nga eksperiyensya ang mahimo ko ipaambit nga magapabakod sadtong akon ginabisita sa ila determinasyon sa “pagkari sa templo”?
Paano ko personal nga mabaton ang mga bugay sang templo?