Mulwol ko Bin Somm’on e Presidency, August 2011
Adag u Tabinaew—Numon Rok e Profet Rodad
Fal’eg Wathan e Tabinaew
“Napan ni gadad ra rrin’ e boech ban’en u lane biney e yafos man guy rogon nib ngoch ma boech ngiyal’ e ba mit rogon e fayleng, ma falfalen’ rodad e gadad ra sap ko tabinaew—nge picha’an nib tu’uf rodad ni yaed ba yul’yul’. Gadad ra nang fan ko mang e be yup’ fan ni ngan m’ag nga ta’abang ko muruwel, tayfan, nge gin ni gab l’og ngay. Gadad be fil ni dariy ban’en ni ra yoen’ loen e tawa’ath u lane yafas ko tabinaew.”1
Weliy e Tu’ufeg Rom
“Mog ban’en ko fakam nib mangil mag m’ag e bachbach ngak; mag ga’ar, ‘Gab tu’uf rog’ nib alamrin; pining e magar ngak ni gubin ngiyal’. Ridam mpag e magawon nikan pithig ni nge ga’fan ngak bee’ ni ngan tu’ufeg. Tafagar e ke yaen, pi bitir nike pil’al, gidii’ nib tu’uf e ke yim’. Rib moem ni dabin tu’ufeg bee’, ra taw ko ngiyal nem nike chuw u lane yafas rodad ma kad aw gad nga fithik e thomthom ni ‘fa’anra’ nge ‘fa’anra kemus.’ …
“Ngad falfalen’ gad ko yafas rodad, man pir’eg e falfalen ko kanawo man noeg e tu’ufeg rodad ko pi tafagar nge tabinaew. Ra bangiyal’, ma ra bag dad ma dakriy e gabul rok. Dabin ted e tin ni rib ga’fan nga orel.”2
Dag e Tu’ufeg Rodad
“Walageg nib pumo’on, ngad tu’ufeged e pinn rodad u fithik e adag nge tay fan. Yaed e picha’an ni gadad nga bang nib manechubog. Walageg nib bpin, tay fan e pumo’on rom. Ba tu’uf ni ngar rung’aged e thin nib man gil. Ba tu’uf ni ngan tingi’ ngorad. Ba tu’uf ni ngan dag e adag nib riyul’ ngorad. …
“Picha’an ni bay pifaak, gube ga’ar, mu dag e tu’ufeg romew ngak pifaak mew. Gamew manang ni yad ba tu’uf romew, machane ngam n’anggin ni ngar nanged. Ri yad ba mangil. N’anggin ni ngar nanged riy. Mu ning e ayuw ngak e Chitamangdad nu Tharmiy napan ni gabe pi’ e tin nib tu’uf ngorad ni gubin e raan nge napan ni gabe magawon ko tin nima yib ko galabthir. Rib tu’uf ko tirom e ganop ni ngam chugliy raed.”3
Nog e Tu’ufeg Rodad
“Picha’an ni bay pifaak, mog e tu’ufeg rom ngak pifakam. Meybil ni fan rad ni yaed ra gel ko tin kireb u dakean e fayleng. Meybil ni ngeyog ni ngar pil’al gaed u fithik e mich. Meybil ni ngeyog ni ngar fal’egin e yafas rorad u fithik e mangil man ayuweg boech e gidii’.
“Bitir, mu dag ko galabthir rom ni ngar nangew ni yow ba tu’uf rom. N’anggin ngar nangew gelngin ni gab falfalen’ ko gubin ban’en ni kar rrinn’ew ma kiyow be rrin’ ngom.”4
N’en ni Tha’abi Ga’fan
“N’en ni tha’abi ga’fan e chuchgur nge un e gidii’ nib liyeg dad ngay. Boech ngiyal’ e gadad ma leam nag ni ri yad manag gelngin ni ad ba tu’uf rodad. Machane ri dabin leam gad; ma ngad n’anggin rad ngar nanged. Ke yoloey William Shakespeare ni, ‘Ya e dani tu’uf rorad ni dar daged e tu’ufeg rorad.’ Ri dabin kalngan’ gad ko pi thin nikan noeg fa rogon ni kan dag. Machane, n’en ni gadad be kalngan’ riy e ra ra yib ni boed e pin’en nikan pagtilin u thilin e picha’an ni rib tu’uf rodad.”5
Chuchgur Nag e Tharmiy
“Ay gi sug e tabinaew rodad ko tu’ufeg: tu’ufeg gadad, adag ko fare gospel, tu’ufeg e tafagar rodad, nge tu’ufeg rodad ngak e Tathapeg. N’en ni ra buch, ma ra chuchgur boch’uw r tharmiy ngaray nga fayleng.
“Ay gun fal’egin e tabinaew rodad ni nge mangil ko gothon e tabinaew rodad ni ri ba adag ni nge sul.”6
Meybil ni fan e Tabinaew
“N’en u fayleng e be tagan nag e tabinaew e daba’, ma yo’or ban’en e kan tay nib thothup e yibe kireb nag, gamad be fith Ngom, Chitamangmad u Tharmiy, ni ngan ta’areb nag mad ko pi n’en ni gamad be aw ngay, ni gamad ra gel ni fan ko riyul’ nge mangil. Aygi paer e tabinaew romad u fithik e gapas, tu’ufeg nge kan thothup.”7
© 2011 ko Intellectual Reserve, Inc. Gubin ni mat’won ma bay. Nni yoloy u Mariken. Kan micheg nag ko thin nu Ngalis: 6/10 Micheg nag i pilyeg: 6/10 Ni pilyeg ko First Presidency Message, August 2011. Yapese. 09768 905
Tin ni yibe Fil ko Biney e Mulwol
“U lane lanin’uy ni yibe weliy, ma fare sensey e ma yoeg ba duwer fa magawo me pi’ bochi taym ko picha’an nibe fil ni ngar yoeged e n’en ni yad be leam nag fa ganop rorad” (Teaching, No Greater Call [1999], 160). Napan ni gara bi’eg e re buguthin ney ko tabinaew, mag yoeg ngorad ni ngar motoyil gad ko n’en nibe ayuweg rad fa ganop ni yad ba adag. Me arame rayog ni nge leam nag fapi gothon e tabinaew e pi kanawo’ ni ngan ga’ nag e tu’ufeg u lane tabinaew rorad. Pining fare tabinaew ni ngan sul u dakean e pi ganop ney ko gak ko tabinaw ni blayal’ ni bay yib.