Serafo
Murinno, Pwan Ekkis Murinno, Numpa Eu
Non an we afanafan seni Óktoper 2007 mwichenapen mwichefen, Elter Dallin H. Oaks seni ewe Mwichen Engon me Ruemon Aposel a fos usun met sokkun mwokutokut mi “murinno, pwan ekkis murinno, me numpa eu.” Nupwen a tori ewe poraus usun “taweingauen noumi kewe,” ua mokutukut non ai seia pun ua mefi mengiringir.
Ua sinei pwe ua men taweingau. Ua fiti ekkoch prokram me ren ewe sukun, pwan fori klass mi fakkun weires non sukun, me ua fori pwan ekkoch sokkun mettoch. Ngang use angangoch non ai fiti mwichen Ekkewe Fopun, me ai kewe Raninifel mi taweingaw ren weiresin ai upwe awesano angangen sukun ese mo wes. Use mo pwapwaiti ai upwe kaeo kon me apungu taropwein poraus fan iten ai we sukun pokiten mi usun chok angang.
An Elter Oaks we afanafan a anisiei ne nenengeni mokutukutun ai kewe ran. Ai fofor me kaeo mi murinno, nge mi chok chommong. Mi namwot pwe upwe fini met mi numpa eu. Nupwen ua achocho ne fini met sokkun fofor upwe poutano, ua mefi pwe ewe kapas allimen Jises Kraist mi fakkun numpa eu nap seni forien aramas meinisin. Ua esinna pwe iotek me kaeo seni pukfel mi numpa eu, me seni ena fansoun, manauei mi tetenoch.
Elter Oaks a aitiei pwe nupwen sia fori met ewe Samon a mochen pwe sipwe fori akkom, mettoch meinisin repwe etetenochu. Ika ua kaeo seni nei we pukfel me mwan ua urumot ika me mwan ua fori ai angangen sukun, mettoch meinisin mi auchea repwe tongeni wesino. Non manauei nupwen ua ekipwichi usun ewe Samon, nap seni ai upwe ekieki usun I mwirin ekkis fansoun, a wor kinamwe me pwapwa non manauei.
Iei ua fakkun tumunufichi pwe upwe ausening ngeni aurouren mwichenapen mwichefen!
Chunga seni Paul Mann