Poraus seni ewe Aewin Presetensi SEPTEMBER 2011
Mwichenapen Mwichefen—Eu Efeioch mi Wesewesen Napanap
Emon chon ewe Mwichefen a kapas ngeni emon ese pwan fiti ach nuku. Nupwen ar we poraus a kun ngeni porausen mwichenapen mwichefen, ewe emon a eisini, “Ka era pwe mi wor ami soufos me aposel? Me fan ru itetan ier non eu mwichen unusan ewe fonufan ra pwärata ewe kapasen Kot?”
“Ewer,” ewe chon mwichefen a apasa ren apinukunuk.
Ewe emon a ekieki usun ar we poraus non chok fansoun mochomoch. A usun pwe ewe emon a mochen sinei pwan och me a eisini, “Met ra apasa non ewe mwichenapen mwichefen?”
Non ei fansoun ewe emon mi choni ewe Mwichefen ese chiwen mefi och usun an epwe tongeni ekkis afanafan usun ewe kapas allim nge ar poraus a amefeniti i. A wesewesen achocho, nge ese tongeni chechemeni porausen eu afanafan.
Chiechian we a mefi osukosuk ren an poraus me a era, “Ka ereniei pwe Kot a fos ngeni aramas non ei ran ikkenai me kese tongeni chechemeni met A era?”
Ewe emon mi choni ewe Mwichefen a mefi netipetekison pokiten ar we poraus. A pwon pwe epwe wesewesen angangoch non an epwe chechemeni kapasen ekkewe chon angangen ewe Samon non mwichenapen mwichefen.
Kich meinisin sia sinei weiresin ach sipwe chechemeni meinisin ekkewe afanafanen mwichenapen mwichefen, me non pochokunen ai ekiek ua mefi pwe sisap mefen ika sise chechemeni mettoch meinisin. Nge, mi wor poraus non iteitan ekkewe mwichenapen mwichefen mi eu niffang me eu efeioch seni nang fan iten pwisin kich me manauach.
Non ach fansounen ammonata ren mwichenapen mwichefen, upwe aporausa ngeni kich usun unungat mettoch mi tongeni anisikich pwe sipwe angeiochu, chechemeni, me achocho ne fori kapasen ekkewe chon angangen ewe Samon.
1. Chon ewe Mwichefen mi wor ar tufichin pwisin pwäratä nupwen ra ausening ngeni me kaeo usun ekkewe kapas mi murrino seni mwichenapen mwichefen.
Non om fansounen ammonata ren mwichenapen mwichefen, ua tingor ngonuk pwe kopwe ekipwichi usun kapas eis ka mochen repwe ponu. Ren awewe chok, ka tongeni tipeni emwenien ewe Samon fan iten weiresin manauom.
Ponuen pwisin om kewe iotek mi tongeni feito me ren chok eu afanafan ika ekkoch kapas chok. Fan ekkoch ponuan mi tongeni feito non eu sokkun kapas, poraus, are kon ese mo chufengen ren om kapas eis. Eu netip mi uren kinisou fan iten efeiochun manau me ennetin mochen ne rongorong me anneasosichi ekkewe kapasen aurour epwe tongeni ammonata ewe anen pwisin pwäratä.
2. Kosap ekiek pwe ese auchea masouen eu afanafan pokiten ka fen sinei porausan.
Soufos mi eniwini ar kewe kapas non ar aiti kich; ina eu annukun kaeo. Kopwe rongorong mettoch mi nonno chok fan chommong non poraus me annuk non mwichenapen mwichefen. Iwe upwe apochokunata ami epinukunuk: esap pokiten mi kukun ar wewen napanapan afanafan. Sia soposopono non ach rongorong poraus mi nonno chok pun ewe Samon mi aiti kich me amokutu ach ekiek me netipach kewe fan iten nongonong mi fakkun auchea me ese much pwan mi namwot pwe sia tongeni weweiti ekkei mettoch pwe epwe wor ach föfför me mwan sia tongeni kaeo pwan och mettoch. Emon chon aueta mi tipachem epwe fori akkom ewe nongonong me mwan a aueta ekkewe etip me os.
3. Ekkewe kapas seni mwichenapen mwichefen mi usun eu kompas epwe emweni kich ngeni ewe an fan asengesich non ekkewe maram mwach.
Ika sia ausening ngeni ekkewe ämemefin ewe Ngun mi Fel, repwe anisi kich usun eu Liaona are kompas, repwe emweni kich non fonuen osukosuk, me pworacho weiresin ach sai non nemon me chuuk mwach. (nengeni 1 Nifai 16).
Seni nepoputan ewe fonufan, Kot a finata soufos pwe repwe kapas netipen nang ngeni aramas non ar fansounen nonnom. A wesewesen wisach pwe sipwe ausening ngeni me fori met sia kaeo seni ekkewe afanafan minne ewe Samon a awora ngeni kich.
Samach won Nang mi uren umoumoch me tong ese nikitano kich pwan esap nikitano Noun kewe. Ikenai, pwan usun chok fansoun nom, A finata aposel me soufos. A soposopono ne pwärata An kewe kapas ngenir.
A eu efeioch mi amwarar pwe emon me emon kich sia rongorong porausen Kot non mwichenapen mwichefen! Iwe sipwe achocho ne ammonatochu ren ei efeiochun emwen seni nang me ren Noun kewe chon angang.
Pwe ei efeioch mi wesewesen napanap.
© 2011 seni Intellectual Reserve, Inc. Meinisin pung mi kawor. Mi for non Merika Kapungunon non fasun Merika: 6/10. Kapungunon chiakun: 6/10. Chiakun First Presidency Message, September 2011. Chuukese. 09769 901
Afanafan seni Ei Poraus
-
Annea fengen ei poraus. Pesei ngeni ewe famini pwe repwe esinna mettoch repwe tongeni ausening ngeni non fansounen mwichenapen mwichefen.
-
Pwe kopwe tongeni anisi ekkewe semirit ren ar repwe aea porausen Preseten Uchtdorf, pwarano ngenir sasingen ekkewe Meinap Unusen (kopwe kuta non ewe Liahona seni mwichenapen mwichefen). Esinei ngenir pwe ewe Aewin Presetensi me ewe Mwichen Engon me Ruemon Aposel repwe kakapas non mwichenapen mwichefen. Kopwe pesei ngeni ekkewe semirit pwe repwe ausening ngeni mwichenap me chungani echo sasing pwe epwe anisir ne chechemeni met ra kaeo. In me sam ir mi tongeni katon conferencegames.lds.org ren pwan ekkoch urumot non pekin mwichenapen mwichefen fan iten ekkewe semirit.
Peniön mwan: sasing seni Les Nilsson