Te Hoê Auahi e Ama ra i roto Ia’u
Te mahana i haapii ai oia i te tai‘o o te mahana atoa ïa i noaa‘i ia Eduardo te hoê iteraa papû no te Buka a Moromona e to’na mana.
Te na ô ra o Edurado Contreras, « Ua matau to’u papa ruau i te parau e, ‘Mai te ma e hinaaro tatou ia riro ei taata, e ti‘a ïa ia tatou ia haapii i te tai‘o ». « Ua ti‘a to’u papa ruau ».
No Eduardo râ, e mea roa te poromu no te tai‘o. Ei hoê o na tamarii e pae tei aupuruhia e to’na metua vahine ivi i te oire no Cordoba, Tireni, ua faaru‘e oia i te haapiiraa i te va‘uraa o to’na matahiti e ua haere e rave i te ohipa no te turu i to’na utuafare.
Te haamana‘o nei oia, « E mea veve roa matou ». No te tauturu i te utuafare ia ora e tae atu i te hope‘a ava‘e, ua faaanaana Eduardo i te mau tiaa, ua hamani i te mau ofa‘i tima, ua ohi i te mau umara putete, ua hoo i te mau ve‘a, e ua rave i te tahi atu mau ohipa riirii e tae noa’tu, ei taure‘are‘a, ua noaa ia’na te ohipa tamau i te faatereraa o te oire.
I te mau matahiti i muri mai, ua faaipoipo o Eduardo e ua haamata i to’na iho utuafare. I te taime ua haamata te rahiraa o ta’na e pae mau tamarii i te faaru‘e i te utuafare, aita â oia i nehenehe i te tai‘o e mea iti roa te rave‘a e haapii ai oia e nahea i te tai‘o. Ua taui te reira i te hoê mahana a tiahi ai oia e rave rahi mau tamaroa i reira o te haafifi ra e piti na misionare Feia Mo‘a i te mau Mahana Hopea nei i mua i to’na fare. Ua ani oia i te mau misionare ia tomo mai, e aita i maoro roa ua farii oia e ta’na vahine faaipoipo o Maria i te mau haapiiraa.
Te haamana‘o nei o Eduardo, « E mea fifi roa na’u ia taa i te mau mea atoa ta raua i parau no te mea e mea iti roa te reo Paniora ta raua e parau, ua faaite mai râ raua ia’u i te hoê buka iti e te mau hoho‘a no te Faaora e no te Peropheta Iosepha Semita i roto i te Uru Raau Mo‘a. Ua mana‘o vau e te mau hoho‘a ta raua i faaite mai e te mau mea ta raua i haapii mai ia matou e mea nehenehe ïa ».
Aita i maoro ua monohia taua nau misionare ra e te tahi atu, e hoê o raua o te parau i te reo Paniora. Ua pohe ta Eduardo e Maria aiû tamahine tau matahiti na mua’tu, e ua putapû roa raua i te hoho‘a a te Ekalesia E mea Mure Ore te mau Utuafare. Aita i maoro roa ua bapetizohia raua e ta raua tamaiti hope‘a, o Osvaldo.
Ma to Eduardo bapetizoraa i te matahiti 1987 ua tae mai te hoê hinaaro ia haapuai i to’na iteraa papû na roto i te tai‘oraa i te Buka a Moromona. « Nahea vau ia haapii i te tai‘o ? » ua ani atu oia i ta’na vahine faaipoipo. Ua parau Maria ia’na ia hi‘o i te mau reta, ia tuu amui ia ratou i roto i to’na feruriraa, ia tamata i te faahiti i te mau parau e i muri iho ia tamata i te tai‘o puai. Ma te rave-noa-raa ua parau oia ia’na iho, e haapii ïa oia i te tai‘o.
Ua ite o Eduardo, e 45 matahiti i taua taime ra, i te ta‘i o te mau reta e rave rahi, aita râ oia i tamata i te tai‘o mai to’na faaru‘eraa i te fare haapiira fatata e maha ahuru matahiti na mua’tu.
Ua Ite Au i te hoê Auahi.
Ma te hoê pure i roto i to’na aau, ua parahi Eduardo i te hoê mahana ve‘ave‘a no te tau ve‘ave‘a i te hoê vahi marumaru i muri i to’na fare. Ua parau oia, « I reira, ua faaoti au i te tamata ».
Ua parau Maria e aita roa’tu oia i mana‘o noa‘e eaha te tupu mai i muri iho. A rave ai oia i te ohipa i roto i te fare tūtu, ua faaroo oia i tera e tera taime a tamata ai o Eduardo i te parau i te mau reta e te mau parau. Ua parau oia, « Ua faaroo tau‘e au ia’na i te parau vitivitiraa ». « Ua faaroo e ua ite au e te tai‘o— ohie nei oia. Iti mai i te afa hora i muri iho, e te tai‘o nei oia ! »
No to’na haapa‘o-rahi-raa i ta’na tamataraa aita’tu ra Eduardo i ite e te tai‘o nei oia. E a tai‘o ai oia râ, ua haamana‘o oia, « Ua ite au i te hoê auahi i te amaraa i roto ia’u nei ». Ma te ri‘ari‘a e te maere, ua pii Eduardo i ta’na vahine faaipoipo, « E Mami, eaha te tupu nei i ni‘a iho ia’u ? »
Ua pahono atu o Maria, « O te Varua o te Fatu ». « Te tai‘o maitai nei oe ! »
A haamana‘o ai oia i te ohipa tei tupu, ua parau Maria, « O te hoê ïa ohipa eita roa e nehenehe ia maua ia huna ».
Ua parau atoa mai o Eduardo, « Te mahana i haapii ai au i te tai‘o o te mahana atoa ïa i noaa‘i ia’u to’u iteraa papû no ni‘a i te Buka a Moromona e to’na mana ».
Mai taua taime mai â, ua haamata Eduardo i te ti‘a i te hora 4 i te aahiata no te tai‘o i te Buka a Moromona hou a haere atu ai i te ohipa. I muri iho ua tai‘o oia i te Parau Haapiiraa e te Parau Fafau ma te peehia e te Bibilia. Te faaunauna nei te hoê vairaa buka i te fare o Contreras e mea iti hoi te mau buka i itehia hou te matahiti 1987.
A tupu ai te iteraa o Eduardo e o Maria no ni‘a i te evanelia i te rahi, ua tupu atoa to raua iteraa papû i te rahi. I te taime a pohe ai ta ratou tamaiti Osvaldo i roto i te hoê ati pereoo uira, ua tauturu to raua iteraa papû apitihia’tu i te mau iteraa varua puai na roto i te pure e i roto i te Hiero no Buenos Aires Tireni, i reira raua e o Osvaldo i te taati-raa-hia ia raua, i te faaruru i te pohe o ta raua tamaiti.
Ua parau Eduardo, « Peneia‘e e maamaahia te tahi mau metua, ua ite râ maua i te hau o tei parau mai, ‘ E mea maitai ta orua tamaiti.’’ Ua oto ihoa ïa maua. E tamaiti maitai oia, e te mihi nei matou ia’na. Ua taatihia râ matou i roto i te hiero, e ua ite maua tei hea oia ».
Te Maramarama no te Iteraa i te Tai‘o
Mauruuru i te tautururaa a te hoê melo no ta’na paroita, ua haapii atoa Eduardo i te papa‘i. Ua parau oia, « Na mua’tu, aita i nehenehe ia’u ia tarima i to’u i‘oa ».
Na roto i te maramarama o te iteraa i te tai‘o, ua noaa ia Eduardo i te taa i te parau mau o te mau parau a to’na ra papa ruau.
« Tei ô nei tatou i nia i te fenua ia nehenehe ia tatou ia haere rii i mua i te mau mahana atoa », te na ô maira oia. Na roto i te haapiiraa i te tai‘o e i te papa‘i, te na ô maira oia, te faaite nei ïa oia i ta’na mau tamarii e ta’na mau mootua e aita i taere roa ia haapii, ia haamaitai, e ia riro i te mea ta te Atua e hinaaro ia tatou ia riro mai. « No te mea ua nehenehe ia’u ia tai‘o, te haapii nei ïa vau i te tahi mea apî i te mau mahana atoa », te na reira mai ra oia.
I teie nei e nehenehe ta te Taea‘e Contreras e tai‘o i te mau mea atoa ta’na e hinaaro i te tai‘o, e tae noa’tu i te mau ve‘a ta’na i hoo na ei tamarii ite ore i te tai‘o. Ua vai noa te mau papa‘iraa mo‘a ta’na mau buka au-roa-hia, te Buka a Moromona ihoa ra. Ua tai‘o oia i te reira mai te hoê tapo‘i i te tahi atu tapo‘i e va‘u taime.
Ua parau oia, « Ua riro te Buka a Moromona no’u ei uputa » e te mauruuru noa ra oia e nahea te tai‘oraa e te evanelia i te tauiraa i to’na oraraa. Ua riro te Buka a Moromona ei mau mea atoa no’u. E mau mea atoa no’u E ite vau i te Varua i te mau taime atoa e tatara ai vau i te reira no te tai‘o ».
No Eduardo Contreras, i roto i te hoho‘a i ni‘a nei e ta’na vahine faaipoipo, o Maria, ua riro te Buka a Moromona ei opani no te haapii i te tai‘o. Ua parau oia, « Ua ite au i te Varua i te mau taime atoa e tatara ai vau i te reira no te tai‘o ».
Hoho‘a na Michael R. Morris