Ua Tamata Vau i te Fafauraa a Moroni
Francesco Ferraresi, Lombardy, Italia
Tau matahiti i ma‘iri a‘enei tei te fare vau o te hoê hoa a farerei ai au e piti na feia apî tane ahu-maitai-hia tei faaite mai e e mau misionare Feia Mo‘a raua i te mau Mahana Hopea nei. Ua mana‘o vau e mea huru ê roa e ua haere roa mai raua i Italia no te faafariu i te taata tei tiaturi a‘ena i te Faaora.
Ua ani au ia raua i muri iho ia haere mai i to’u ra fare. Ua parau vau, « Mai te mea e hinaaro orua, e nehenehe ta orua e haere mai e farerei ia’u no te hoê faaiteiteraa i te peu ta‘ere ». « Eiaha râ e mana‘o e e taui au i te haapa‘oraa ».
I to matou farereiraa i muri iho, ua parauparau te mau misionare no ni‘a i te Buka a Moromona. Ua mana‘o vau e e mea maere roa aita vau i faaroo noa a‘e i te reira na mua’tu. Ua ani au ia raua ia ho‘i mai, i muri a‘e râ i te piti o te farereiraa ua faaoti ta’u vahine faaipoipo, o Anna Maria e e nau taata maamaa raua e e faaru‘e oia i te fare i te taime o ta matou mau haapiiraa. E au ra aita te mau misionare i afaro maitai e o vau atoa, ua hinaaro râ vau i te ite i te mea ta raua e parau e ua tamau noa vau i te farerei ia raua.
I te hoê pô i to Anna Maria ho‘iraa mai i te fare, ua faaroo oia ia matou i te paraparauraa no ni‘a i te faaipoiporaa mure ore. Ua anaanatae rahi oia e ua faaoti a‘era matou e e haamata faahou matou i te mau haapiiraa. E ite rahi to’na no ni‘a i te mau papa‘iraa mo‘a, e ua vai noa ta’na hoê tabula roa no te mau uiraa. Ua pahono te mau misionare i te tahi o te mau uiraa i te reira ihoa taime, e no te tahi ua ti‘a ïa ia raua ia ho‘i atu i te fare no te ma‘imi. I te mau hebedoma atoa ma te ma‘iri ore ua ho‘i mai raua e te mau pahonoraa, e i te mau hebedoma atoa e tabula ê ta Anna Maria e te mau uiraa.
Aita i maoro i muri noa‘e i to matou faaotiraa i te mau haapiiraa, ua faahitimahuta o Anna Maria ia’u ma te aniraa i ta’u parau faati‘a ia bapetizohia oia. Ua parau vau ia’na e aita ta’u e pato‘iraa mai te mea ua faafariu-mau-hia oia. Ua haere atu vau i to’na bapetizoraa i te 5 no Mati 1995, ma te oaoa i te hoê varua faahiahia i roto i te oro‘a.
Ua tamau vau i te tai‘o rahi no ni‘a i te Ekalesia, e ua tamau noa te mau misionare i te faaitoito ia’u. I te pae hope‘a ua faaoti vau i te tamata i te fafauraa a Moroni (a hi‘o Moroni 10:4–5). Ua hinaaro vau ia ite mai te mea e no ô mai anei te Buka a Moromona i te Atua ra aore râ e buka aamu nehenehe noa te reira.
I te hoê mahana i te ava‘e Tiunu 1995 a faaea ai o vau ana‘e i te fare, ua tuturi au i te pae avae o to’u ro‘i e ua ani i te Metua i te Ao ra, « E parau mau anei te Buka a Moromona, e mai te mea e, afea ïa vau e ti‘a ai ia bapetizohia ? » Ua ite ihora vau i roto i to’u aau e to’u feruriraa i te hoê reo papû maitai tei parau mai ia’u, « E parau mau te Buka a Moromona. Ua farii au i muri iho i te hoê faaiteraa papû e afea e bapetizo ai. Hoê hebedoma i muri iho ua pure faahou vau e ua farii i te hoê â pahonoraa. Ua î roa to’u aau i te oaoa. Ua ite au i teie nei e ua paraparau mai te Atua ia’u: e ua faaûruhia te Buka a Moromona e te Atua e e peropheta mau o Iosepha Semita.
I te hope‘a, i te 17 no Setepa 1995, ua tomo atu vau i roto i te pape no te bapetizoraa, hoê matahiti e te afa mai to’u haamataraa i te farerei i te mau misionare. Aita i maoro roa, ua anaanatae ta maua tamahine, o Aba Chiara, i te Ekalesia e ua bapetizo-atoa-hia oia. I te ava‘e Tenuare 1997 ua taatihia to matou utuafare i roto i te Hiero no Bern Helevetia.
Ua ite matou e teie te Ekalesia mau, tei faaterehia e Iesu Mesia na roto i te hoê peropheta e te autahu‘araa. Ua mauruuru matou i te Fatu no To’na aroha, no te arata‘iraa ia matou i te mau misionare, e no to matou ite no te evanelia.